Endesa ni Unjimu o Jihome jê
1. Kiebhi o divulu dia dianga dia Kolindo 9:26, diene mu dikumbidila mu ukunji?
1 O poxolo Phaulu ua soneka: “Kiene ue ki ngi lenga katé bhu mbambe, phala ki ngiie ni kubelajaka. Ngi di bhanga ue kala ngi mutonoki a bokisi, home jê ki ji lueza.” (1 Kol. 9:26) Phaulu ua kexile mu zuela o vondadi iê ia ku di bhakula mu jimbambe mu nzumbi. Mu kidi, o izuelu íii ué, i di kumbidila mu ukunji. Tua mesena kulondekesa ni unjimu o “jihome” jetu mba o nguzu ietu, phala iene i kuatekese athu avulu. Kiebhi?
2. Kiebhi ki tu tena ku kaiela o phangu ia Phaulu ni akunji engi mu hama ia dianga, mu ku sola kuebhi ni kiebhi ki tu boka?
2 Ndé Kuoso Kuala Athu: Phaulu ni akunji engi mu hama ia dianga, a boko kuoso kua kexile athu. (Ikalakalu 5:42; 16:13; 17:17) Mu kiki, se athu avulu mu mbambe ietu ala bhu bhata mu usuku, kiki ki tena ku kala o kithangana kia tokala phala ku boka inzo ni inzo. O kuila o kididi kia ku kuata o dikalu mba kumbóio kizala ni athu mu kamene ni ku tádidi, kioso o athu kiaia ku salu mba kia vutuka ku salu? Kioso ki uia mu diloja, o kuila u mona kuma mbambe iezala ni athu? O umbangi mu ikoka, u tena ku di tunda dingi kiambote mu ithangana íii.
3. Kiebhi ki tu londekesa unjimu mu kuendesa o jihome jetu, kioso ki tuia ni ku kalakala mu mbambe ietu?
3 Boka ni Unjimu mu Mbambe: A tokala ué ku di langa, phala kulondekesa kiambote o jihome jetu, kioso ki tu boka mu mbambe ietu. Mu kifika, mu veji dia kuambata kibuka kia dikota kia jiphange mu mbambe, kua bhingi kithangana kiavulu ni nguzu, phala ku langa o kibuka, kota ku uana o kibuka mu jimbandu. Kiene kimoxi, kioso ki tu kalakala mu mbambe ia sondoloka, (rural) tu kala dingi ni kithangana kia kuzuela se o kibuka kia makalu kia tolo. O kuila tueji kala ni mbambe ia zukama ku bhata dietu, phala ku sosolola o kithangana kia kuia mu mbambe?
4. Ihi ia-nda tu kuatekesa o ku kala tu ‘a thambi a athu’ a di tunda kiambote?
4 Jezú ua sokesa o akunji kála ‘athambi a athu.’ (Marku 1:17) O mu thambi a athu, ka tokala ku takula ngó o uanda mu menha, maji phala ku kuata jimbiji. Mu kiki, o mu thambi a jimbiji u di tunda kiambote, se uia kuoso kua sanga o jimbiji, muene u mateka ku tamba sé ku laleka. Kienhiki, ene a katula mbote ni unjimu mu nguzu iâ. Tu tena kulondekesa kisangusangu mu ukunji uetu.—Jihe. 6:11.