Kana ku Banza—Kuila Eie Kuala ni Uhete ua ku Longa Dixibulu
1. Mukonda diahi a mukuá kala ni maxibulu phala ku a longa?
1 O kuila eie uene mu banza kuma ku tena ku longa dixibulu mukonda kuala ni uhete? M’ukulu o jiselevende ja Nzambi, kála Mozé ni Jelemiia, a divuile kuila ka kexile ni uhete phala ku bhanga o ikalakalu ia a bhanene. (Mak. 3:10, 11; 4:10; Jel. 1:4-6) O ku banza kiki, ki kima kia iibha. Kiebhi ki tu tena dibhana ni ibanzelu íii?
2. Mukonda diahi ki tu tokala ngó ku sanguluka mukonda dia kuia nzo ni nzo ni ku boka, maji o athu a xikina tu a ehela akuetu ku a longa?
2 Tua tokala tu di lembalala kuma, Jihova ka tu bhana kima kia ku bhanga, sé ki tuijiia ku ki bhanga. (Jisá. 103:14) O kikalakalu kietu ‘o ku longa,’ ni ku ‘bhanga maxibulu,’ kiki tu tena ku ki bhanga. (Mat. 28:19, 20) Ujitu ua tu bhana Jihova, mu ku tu longa, ni ku tu bhana uhete. (1 Kol. 1:26, 27) Ki tu tokala ngó ku sanguluka mukonda dia kuia nzo ni nzo ni ku boka, maji o athu a xikina tu a ehela akuetu ku a longa.
3. Kiebhi Jihova kiene mu tu bhana o uhete ua ku longa o Bibidia ku dixibulu?
3 Jihova u tu Bhana Uhete ua ku Longa: O uhete uetu ua ku bhanga o maxibulu, u tu longa-u Jihova. (2 Kol. 3:5) Bhu kaxi ka kilunga kiê, uene mu tu longa o kidi kia Bibidia, katé muene ni athu a di longo kiavulu ku mundu iú, o kidi kiki ka kijiia. (1 Kol. 2:7, 8) Muéne ua tumina ku soneka o milongi ia Mesene ia Dikota Jezú, phala etu ku i kaiela, ni ku tu bhana na-iu bhu kaxi ka kilunga kiê. Jihova ka tuehelela o ku sola se kiebhi ki tua tokala o ku longa o Bibidia. Muene ua tu bhana o jifalamenda, ja tokala kála o divulu Bibidia i Longa, ki i bhonzo phala ku i tendela. O ku longa o Bibidia ku dixibulu ki ku bhonzo kala ki tua banze.
4. Mukonda diahi tu dielela kuila Jihova ua-nda tu kuatekesa?
4 Mozé ni Jelemiia a kumbidila o kikalakalu kiâ ni kikuatekesu kia Jihova. (Mak. 4:11, 12; Jel. 1:7, 8) Etu ué tu tena ku bhinga o kikuatekesu kia Jihova. Mukonda kioso ki tu longa o Bibidia ku dixibulu, tua mu longa o kidi kia lungu ni Jihova, o kiki ki sangulukisa o muxima ua Nzambi. (1 Nzu. 3:22) Mu kiki, bhanga ioso phala ku longa o Bibidia ku dixibulu, mukonda kiki ki bhekela kisangusangu ni mabesá mu ukunji.