Uene mu Katula Mbote mu Mbambe Iê ia ku Boka?

1. O mbambe ihi?

¹ O mbambe ihi? O Mbambe kididi kia ku boka ki tokala ku kilunga, kala muboki u tambula mbambe phala ku boka-mu, nange i zukama bhu ua tungu. O divulu Organizados mu mbandu ia 102 di jimbulula: “O ku kala ni mbambe ia ku boka ku kuatekesa o muboki ku tula o njimbu mu ithangana ioso. Kima kiambote se muboki uixana muboki ni mukuá phala kuia n’ê mu boka mu mbambe iê.”

2. Kiebhi o ku kala ni mbambe ki kuatekesa ku boka ni kibuka?

² Phala ku Kuatekesa ku Boka ni Kibuka: Se o mbambe iê ia zukama mu kididi kiê kia ku kalakala, u tena ku boka mu ola ia ku nhoha, mba mu ola ia ku zumbuka ande dia ku vutuka ku bhata, nange ni muboki ni mukuenu u kalakala bhua butu. Se o mbambe iê ia zukama bhu ua tungu, eie ni muiji uê mu tena ku boka mu suku. Maji se kuí mu kiônge kia ku boka, bhinga o kikuatekesu kua Jihova mu musambu ande dia ku mateka o ku boka. (Fil. 4:6) Kala ni kithangana kia ku boka kumoxi ni kibuka kiê, kana kuia ngó mu mbambe iê. Bhenge-bhenge mu sukilu dia semana, jiphange javulu aia mu kônge kia ku boka, kima kiambote ku kuatekesa o kibuka kiê kia ku boka.

3. Mabesá ahi u tu tambula mu ku kala ni mbambe ia ku boka?

³ Mabesá: Se uene ni mbambe, uejiia kuebhi ku u tena o ku boka mu ithangana ioso. U tena ku kala dingi ni kithangana kia ku boka, mukonda kua-nda sota mbambe phala ku boka. Kiki ki kuatekesa o jiphange ku kala aboki a ithangana ni ithangana mba aboki a thembu ioso. Se o mukua dibhata ua mesena ku di longa o Bibidia, vizinhu iê, ki ki bhonzo ku vutuka dingi ku mu kunda phala ku di longa n’ê o Bibidia. Saí jiphange ejiia kuila o ku boka mu mbambe iâ ia a kuatekesa kuijiia kiambote o mukua dibhata ni ku a dielela, bhenge-bhenge se mu mbambe a tena ku kalakala mu thembu iavulu ande dia ku i bhana muboki uéngi. O kuila o ku kala ni mbambe ia ku boka i ku kuatekesa ni muiji uê ku kumbidila kiambote o ukunji?—2. Tim. 4:5.