Kaiela o Phangu ia Jipolofeta—Amoji
1. Kiebhi o phangu ia Amoji i tu kolokotesa mu ukunji uetu?
1 O kuila uene mu banza kuila ki uala ni uhete ua ku boka, mukonda ki ua di longo kiavulu? Se kiene, ua-nda kolokota dingi mu ku di longa o phangu ia Amoji. Muéne uexile mubhidi ua jimbudi ni kidimakaji, maji Jihova ua mu bhana njimbu phala ku boka. (Amo. 1:1; 7:14, 15) Lelu, Jihova uehela ué o athu a lenduka ku tula o njimbu iê. (1 Kol. 1:27-29) Mbote iahi i tu katula mu phangu ia Amoji, ia lungu ni ukunji uetu?
2. Kiebhi ki tu tena ku kolokota, se tu dibhana ni kizukutisu mu ukunji uetu?
2 Ua Kolokota mu ku Dibhana ni Kizukutisu: Kioso Amaziia kiexile mukunji, ua bhangele kiteka phala o dikuinhi dia ifuxi ia Izalaiele ku ki bheza, mu kuiva o njimbu ia Amoji, muéne uambe: ‘Ndaié kiá! Kana ku tu bhanga jibuia! Tuala kiá ni Nzambi ietu! (Amo. 7:12, 13) Amaziia ka bhanene matuí mu izuelu ia polofeta, iu ua funhisa o Sobha Jelobouamu ku zubha ni kikalakalu kia kexile mu bhanga Amoji. (Amo. 7:7-11) Né kiki, Amoji ka kexile ni uôma. Lelu saí atuameni a jingeleja, a bhanga mbandu ku jinguvulu, phala ku funhisa o jinguvulu ku zukutisa o mundu ua Jihova. Maji Jihova u tu kanena kuila, sé-ku muthu u mesena ku bhanga kia iibha ku mundu uê u ditunda kiambote. —Iza. 54:17.
3. Njimbu iahi i tuene mu boka lelu?
3 Boka o Njimbu ia Nzambi, ni Mabesá u Tua-nda Tambula ku Hádia: Né muene Amoji ua tula o njimbu ia ku fundisa, ku dikuinhi dia ifuxi ia Izalaiele, muéne ua soneka o divulu dia Bibidia diambata o dijina diê, ua soneka uê ia lungu ni kikanenu kia Jihova kia ku bhanga o ima ia ubhe, ni mabesá mê. (Amo. 9:13-15) Lelu, tuene mu boka ué o “Kizuua kia Kufundisa” kia Nzambi, íii iene o “Njimbu Iambote” i tua tokala o ku boka. (2 Phet. 3:7; Mat. 24:14) Kioso Jihova kia-nda buika o athu a iibha ku Alumajedone, mu ku bhita kathangana o ixi a-nda i bhanga palaízu. —Jisá. 37:34.
4. Kikanenu kiahi ki tuala na-kiu, kuila tua-nda tena ku bhanga o vondadi ia Jihova?
4 O ku boka o njimbu ia Utuminu, ku mundu kuene athu avulu a zembe o njimbu íii, ki tu bhangesa ku kolokota ku kala fiiele kua Jihova, ni ku suína ku bhanga o vondadi ia Jihova. (Nzu. 15:19) Se-ku phata kuila Jihova ua-nda tu kuatekesa ku bhanga o vondadi iê, kála kia kuatekesa Amoji.—2 Kol. 3:5.