Misoso

◼ Austrália: Nzuá, diiala ua di longo kiavulu, mu undenge ua kexile múia mu ngeleja, kioso kia kulu ua kituka muthu ka “xikina kuila kuene Nzambi.” Saí muboki ua mu bhana o kadivulu kala ni diambu, A Vida​—Teve um Criador? mu kizuua kia mukuá ua mu bhana o kadivulu A Origem da Vida. O muboki ua suluka ku mu kunda, ni ku mu bhana madivulu a ubhe, ni tudivulu tua lungu ni ibhangelu ni kikanenu kia Bibidia. Kioso kia mono kuila Nzuá ua kexile muene mu tanga o madivulu oso, ua mu bhana o divulu A Bíblia​—Palavra de Deus ou de Homem? Kioso kia tange o divulu didi, mu ku bhita kithagana, Nzuá ua mateka ku “xikina kuila kuene Nzambi.” O muboki ua mu bhana o divulu Bibidia iLonga, ua mu londekesa o kaxi ka 8, mu jimbandu 20 ni kaxi ka 13-16 mu jimbandu 23-24. Nzuá ua tange o ibatulu ia Bibidia iú uambe: “Nange nga tokala ku di longa o Bibidia.”

◼ México: Saí diiala, uambe ku muboki kuila ka xikina kuila o Bibidia ia tokala kua Nzambi. Saí muboki ua mu ambela kuila, ua mesena ku mu londekesa kibatulu kilondekesa kuila o Bibidia ia tokala kua Nzambi. Kioso kia mu jimbuluila kiambote, o diiala ua sanguluka kiavulu mu kuívua o milongi ia Bibidia. Muéne ua uabhela dingi o milongi ia lungu ni ku kala ni ukexilu uambote. Muéne uambe ku muboki: “Kioso ki tua tange o Bibidia mu veji ia dianga, nga monene kuila milongi ia divulu dioso-dioso, o milongi iê ki ia ngi tudile ku muxima. Maji kioso ki tua tange dingi, benge-benge o milongi ia lungu ni ku kala ni ukexilu uambote, o muxima uami ua sanguluka kiavulu.”

◼ Estados Unidos: Kioso kia kexile mu longa bhu kididi, bhu bhita athu avulu ni ka dikalu ka madivulu, saí dikaza dia aboki a sange muhatu ua tungu mu mbanza ia Taiwan, u xikina kuila kuene Nzambi, maji ua banzele kuila o Bibidia a i soneka phala o athu a tokala mu jixi ja América. Muéne ua zukama ku ka dikalu ka madivulu, mukonda ua banzele kuila kala ni kidielelu ku muenhu uê. Muéne ua mesenene kuila o Bibidia i mu kuatekesa ku sanga o ku zediua ku muenhu. O dikaza dia mu bhana o divulu Bibidia i Longa, ni kadivulu Como Ter Verdadeira Paz e Felicidade. Mu veji dia ku di longa o kibatulu kia 2, kia divulu, ene a mateka ku mu longa o kadivulu mu diambu: “Um Guia Prático para Beneficiar Toda a Humanidade.” Kioso kia di longo o kaxi ka samanu ia kadivulu, o muhatu uambe kuila o milongi ia Bibidia, ki i sokela ni milongi ia jingeleja. Kioso kia di longo o ikanenu ia Bibidia ia di kumbidila, muéne uambe: “Se-ku dingi divulu diéngi di longa o kidi kioso kála o Bibidia!”

◼ Japão: Saí mukua dibhata uambe ku muboki kuila ka xikina kuila kuene Nzambi, né kiki o muboki ua mu xindi, ua mu longo o milongi iala mu Despertai! iambe “Foi Projetado?” Mu ku bhita kithangana, ua mateka ku lungulula o ibanzelu iê, iú ua mateka o ku xikina kuila kuene Mubhangi. Lelu muéne u xikina kuila kuene Nzambi, o muboki ua mu di longa nê mu kadivulu Njimbu Iambote ia Nzambi!

◼ Canadá: Saí muhatu ua tambula madivulu, kioso kia kexile mu tunda mu inzo iê iú ua kexile kiá mu sambela mu dikalu diê. Kioso o phange ia muhatu kia vutuka dingi phala ku mu kunda, ni njinda ioso o muhatu ua ditunu, uambe kuila ka xikina kuma kuene Nzambi. O phange ka bhuila kana, ua pelepalala dingi o kadivulu Como Ter uma Vida Satisfatória. Kioso kia sange o muhatu mu inzo iê, ua mu ambela kuila né muene ua kijidile kiá kuma muéne ka xikina kuila kuene Nzambi, muéne ua mu suu, mukonda ua mono kuma ua mu sasa o tuana ubheka uê. Ua mu londekesa o kadivulu bhu kaxi ka 6, mu mbandu 4, ka jimbulula kuebhi ku tu tena ku sanga milongi iambote. Ua mu tendelesa ku tanga o disá 2, muala o milongi ia lungu ni ku sasa o tuana. O muhatu ua sangulukile kiavulu mu ku tanga o kadivulu.