Mukanda ua Kimbadi kia Fiiele

Phange jetu ja kazola:

Tua sanguluka kiavulu, mu ku mi tumikisa o mukanda iú, ku muvu iú ua katunda! Ku muvu ua 2014, o Sobha ietu Jezú Kristu, ua tenesa hama ia mivu, tundé kia mateka ku tumina bhu kaxi ka jinguma jê.​—Jisá. 110:1, 2.

Ku dimatekenu dia muvu ua 2013, mu kiônge kia Associação Torre de Vigia de Bíblias e Tratados, o kibuka kia Tradução do Novo Mundo, kia lungulula o Bibidia ia ubhe, mu dimi dia Kingileji, a zubha kiá ku i soneka mu dimi didi. Bhu kaxi ka an’a Nzambi, a a undu ni nzumbi ikola, Jihova ua kuatekesa, phala ku bhanga o Tradução do Novo Mundo, ia ubhe. (Lom. 8:15, 16) O kuila o kuijiia o kidi kiki, ki ku bhangesa ku xikina kuila, o Bibidia a i lungulula kiambote?

Tundé ukulu o Kimbadi kia Fiiele, kiene mu bhana valolo iavulu ku maka a lungu ni ku lungulula o Bibidia. Lelu, o Tradução do Novo Mundo, a i lungulula mu 121 a madimi. Tua mi dióndo, londekese-nu kua Jihova kuila, mu bhana valolo ia Bibidia. Tanga o Bibidia izuua ioso ni ku xinganeka mu milongi iê. Se u bhanga kiki, ua-nda zukama dingi kua Jihova Nzambi, ua bhange o Bibidia.​—Tiia. 4:8.

Tuene mu luuala ué, kioso ki tuívua o malamba ni mavuua, a bhita na-u o ji phange jetu. Tuejiia kuila, saí ithangana ki bhonza kiavulu ku sanguluka ni ji phange, mukonda dia ibhidi. Mu kifika, saí mutuameni ua muiji ku Ásia, ua mu dibhana ni ibhidi iavulu, mukonda dia unema ua muhatu’ê. Ki kale muéne ni tuana tuê, a thandanganhele kiavulu, mukonda o milongo ki i tenene phala ku saka o uhaxi. Malamba a dikota! O diiala, u bhita 24 a ithangana, mu ku langa o muhatu’ê. O mon’ê ua diiala, ni ilumba iiadi ia Jikidistá, a bhana phangu iambote ia ku kuatekesa o jitata jâ. O muiji iú, ni miji ia mukuá, ene mu dibhana ué ni ibhidi, o kixikanu kiâ, ki mi bhangesa ku sanguluka ni ku kolesa o kixikanu kienu, né muene ni malamba. (Tiia. 1:2-4) Jihova u kanena kuila, o kimbadi kia fiiele ni mundu uavulu, a-nda sanguluka ku pholo dia kuenda, né muene a dibhana ni malamba avulu lelu, mukonda ku hádia a-nda tambula o muenhu ua kalelaku!​—Tiia. 1:12.

Ku muvu ua tundu-mu, 19.241.252 a athu ai mu Lembalasa ia Kufua kua Jezú. Mu ku mona athu avulu, a ximana Jihova ni Jezú Kristu, mu kuíza mu kiônge kia beta-kota, phala o mundu ua Nzambi, ki suínisa kiavulu o kixikanu. Mu kithangana kia Lembalasa, mazunda ni mazunda a jiphange, a kalakala kála aboki a ithangana ni ithangana mu mbeji ia Katanu, ni Kasamanu. Kisangusangu kia dikota! Ki mu sangulukile kioso ki muevu kuila, o jiphange a kalakala kála aboki a ithangana ni ithangana, kioso o kafunga ka ilunga kia kunda o kilunga, a tena ku kala mu kiônge kioso, né muene se ka kundu o kilunga mu mbeji ia Katanu, ni Kasamanu? O jiphange ala ni kilunji, a bhana valolo ia ku bandekesa dingi o ukunji uâ ua ku boka, ni ku di bhakula dingi mu ikalakalu ia kilunga. O ku di bhakula mu sidivisu ia Jihova, kua-nda tu kuatekesa ku lenga o mibhetu ia Diabhu, ua mesena ku zozesa o kixikanu kietu ni ku tu katula mu njila ia kidi.​—1 Kol. 15:58.

Tua sanguluka kiavulu mu kuijiia kuila, 277.344 a a batizala ku muvu ua tundu-mu, iâ ala mu njila ia kidi, kumoxi ni jiphange jâ ku mundu uoso! (Mat. 7:13, 14) Phala ku kolokota mu njila i bheka o muenhu, kua bhingi ku a kuatekesa n’a kale ni ‘kixikanu kia kolo.’ (Kol. 2:7) Tu kolokote mu ku di suínisa mudietu, katé k’iza o dizubhilu. (Mat. 24:13) ‘Suínise-nu oso a toloka o mixima, kuatekese-nu oso a bhuila mu nzumbi, ni ku kala ni muanhu ua athu oso.’ (1 Tes. 5:14) Tu kolokote mu ‘ku samba,’ ni ku bhinga kuila, o ‘Utuminu ué uíze.’​—1 Tes. 5:17; Mat. 6:10.

Tua mi dióndo, tange-nu o Anuário, ejiienu-kiu kuila tua mi zolo kiavulu, mukonda dia henda i muene na-iu kua Jihova!

Phange jenu

Kimbadi kia Fiiele, kia Jimbangi ja Jihova