Eye Wakijidile?

Mukonda dyahi o kuxikina o membe ni jipomba kala sata kwexile mubhekela mbote?

MUKIJILA kyabhele kwa akwa Izalayele, exile muxikina kikale o membe kixi o jipomba kala jisata phala Jihova. O jinjila jiyadi jiji mu ithangana yoso a jitumbula kumoxi mu itumu yalungu ni jisata. O wakambele o membe wejitena kubhana jipomba, o wakambele o jipomba wejitena kubhana membe. (Iji. 1:14; 12:8; 14:30) Mukonda dyahi kiki kyexile mubhekela mbote? Kya dyanga, o membe kexile mumonekena mbeji joso kumuvu. Mukonda dyahi?

O membe kakala ngó mukididi kimoxi muvu woso. Muthembu yamvula exile muvula mu ixi yoso ya Izalayele, maji mu mivu yoso, mu mbeji ya Kamusasadi, ene axisa o ixi ya Izalayele, anga aya mu jixi jengi mwatema dingi, avutuka ngó mu mbeji ya Katanu kate Kanake. (Miku. 2:11, 12; Jel. 8:7) Kifwaphe, m’ukulu, kya bhonzele phala akwa Izalayele kubhana o dyembe kala sata mu thembu ya kixibhu.

Maji o jipomba, muveji javulu jawabhela kukala ngó kididi kimoxi, kyenyiki, akwa Izalayele atenene kujibhana kala jisata mu mbeji joso ku muvu. Kumbandu yengi, o athu exile muvwa mba kusasa jipomba. (Sokesa ni Nzwá 2:14, 16.) O divulu Bible Plants and Animals, (Isasa ni yama mu thembu yasoneka o Bibidya) dyamba: “Mumadyembu ni jisanzala joso mu mbandu ya Palestina, o athu exile muvwa jipomba. Kumabhata o athu exile mubhanga kadikungu kuphalelu phala o jinjila jiji kukalamu.”—Sokesa ni Izaya 60:8.

Mu ukexilu yú, Jihova walondekesa o henda yê mukuxikina kala sata o jinjila jexile mutena kubhana akwa Izalayele, kabasa o kithangana kya muvu.