“O Kwila Kwene Mwene Dyabhu?”
O Bibidya itambwijila
Xe, kwene mwene Dyabhu. Mwene “o nguvulu ya ngongo,” mwene muthu mu nzumbi wa bhukumukina Nzambi. (Nzwá 14:30; Efezu 6:11, 12) O Bibidya ijimbulula o idifwa ya Dyabhu bhukaxi kamajina akayela:
Satanaji, dilombolola “Nguma.”—Jobe 1:6.
Dyabhu, dilombolola “Mukwa makutu.”—Dijingunwinu 12:9.
Nyoka, mu Bibidya dilombolola mukwa ku “nganala.”—2 Kolindu 11:3.
Mukwa kutendala.—Matesu 4:3.
Mukwa makutu.—Nzwá 8:44.
Kikima kyala ku muxima wetu
Sayi athu abanza kwila Satanaji o Dyabhu, kima kyayibha kyala ku muxima wetu. Mu kidi o Bibidya izwela kwila Nzambi wa zwelele ni Satanaji. Kuma Nzambi muthu wayuka, mwene keji zwela ni kima kyayibha kyexile moxi dye. (Matendelelu 32:4; Jobe 2:1-6) Satanaji, watendala we Jezú, muthu kexile ni kituxi. (Matesu 4:8-10; 1 Nzwá 3:5) Mukonda dya kiki o Bibidya ilondekesa kwila o Dyabhu muthu mu nzumbi, ki kima kyayibha, kyala ku mixima ya athu kana.
O kwila twatokala kudiwana mukwijiya kuma sayi athu avulu kaxikina kwila ki kwene Dyabhu? Kana ngana, mokonda o Bibidya yamba kuma Satanaji ubhanga jindunge javulu phala kubhanga o ima yamesena mwene. (2 Tesalonika 2:9, 10) O ndunge ye imoxi o kubhangesa o athu kukala mwavundu phala axikine kuma ki kwene Dyabhu.—2 Kolindu 4:4.
Ixinganeku yamukwa yamakutu yalungu ni Dyabhu
Makutu: Lucifer, o dijina dyamukwa dya tokala kwa Dyabhu.
Kidi: O kizwelu mu dimi dya Hebalayku ene mu kilungulula mu ji Bibidya kala “Lucifer” kilombolola “kubhenya.” (Izaya 14:12) O Bibidya ilondekesa kwila o dijina didi dya tokala ku miji ya jisobha ya Babilonya. (Izaya 14:4, 13-20) O jisobha jiji exile mu dizangeleka kyavulu, mukonda dya kiki Nzambi weji kwa kwatekesa jisonyi.
Makutu: Satanaji ukalakala phala Nzambi kala “muzokedi wa kutatela.”
Kidi: O Dyabhu nguma ya Nzambi, ki selevende ye kana. Satanaji uzukutisa ni kutatela makutu kwa yó asolo kusidivila Nzambi.—Phetele 5:8; Dijingunwinu 12:10.