“O Kwila Kwene Nzambi?”
O Bibidya i tambwijila
Kyene, mu Bibidya mwala ima yavulu itulondekesa kwila kwene Nzambi. O Bibidya ituswinisa kukala ni kixikanu kwa Nzambi, phala kitukale mwavundu, kituye ni kuxikina mu ilongesu ya jingeleja ja makutu, maji tukale “ni kilunji” ni “kutongoloka.” (Loma 12:1; 1 Nzwá 5:20, nota) Tala o jipondo ja kayela jitusanga mu Bibidya:
O ngongo kuma a isokejeka kyambote ni kwila kwene we mwenyu, kilondekesa kwila kwene Mubhangi. O Bibidya yamba: “Mu kidi, dibhata dyoso dibhinga muthu uditunga, maji wabhange o ima yoso Nzambi.” (Jihebelewu 3:4) Sumbala o izwelu yiyi kibhonzo ku itendela, maji sayi athu avulu adilongo kyavulu ene axikina mu ilongesu yiyi.a
Etu tu athu twala ni hânji ya kutendela o dilombolwelu ni valolo ya mwenyu. Né mwene kyoso kitubhanga o ima yoso itwabhindamena ku mwenyu, maji o hânji yiyi ki ibhu. Kala kyamba o Bibidya kiki kibhanga mbandu kwa “yó ejiya kwila abhindamena Nzambi,” kwalungu we ni hânji ya kwijiya ni kubheza Nzambi. (Matesu 5:3; Dijingunwinu 4:11) O kukala ni ibhindamu yiyi mu nzumbi ki kilombolola ngó kwila kwene Nzambi, maji kilondekesa kwila mwene Mubhangi wa henda, wa mesena kwila tudilonga o maka mê.—Matesu 4:4.
Ikanenu yavulu ya Bibidya a isoneka mu jihama javulu ja mivu kudima, i ya dikumbidila ni kidi kyoso. Kiki kilondekesa kwila o ima yiyi ki yejila mu vondadi ya athu muxitu kana.—2 Phetele 1:21.
O asoneki a Bibidya ejidile ima yavulu ya lungu ni jingijiye ka ijidile ku athu akexile ku mwenyu mu thembu yâ. Mu kifika athu avulu axikinine kwila o ixi yexile kuthandu dya kyama, kala o nzamba, kyombo ni ngombe. Maji o Bibidya yamba kwila, Nzambi “ u bhangesa ixi kuzenzamena bhwa kambe kima.” (Jobe 26:7) Ku mbandu ya mukwa, o Bibidya ilombolola kyambote o ukexilu wa ixi kala “dikende dya ixi.” (Izaya 40:22) Avulu axikina kwila, o asoneki a Bibidya a tambula o ilongesu yiyi kwa Nzambi.
O Bibidya yene ngó itambwijila ibhwidisu yavulu ya bhonzo. O kukamba o itambwijilu ya ibhwidisu yiyi, kutena kubhangesa o muthu kuxikina kwila ki kwene Nzambi. Mu kifika: Se Nzambi mukwa henda, ni muteni wa yoso, mukonda dyahi kwene usweya ni hadi yavulu mu ngongo? Mukonda dyahi sayi bhabha o jingeleja a funyisa o athu kubhanga o ima yayibha muveji dya kubhanga o ima yambote?—(Titu 1:16)
a Mu kifika, yalungu ni ngongo o astrônomo ngana Allan Sandage wambe kiki: “Ngimona kwila o ima yiyi ya moneke ngó mu kavwanza. Nange kudimatekenu a isokejeka kyambote. Phala eme kikwene Nzambi, maji o dilombolwelu dya madiwanu dya kwila o ima ya moneka, muveji dya kwila seku kima.”