Mbalahamu—Kamba Dia Nzambi

OKIDIDI kua tungile athu tundé kia bhiti o Dilúvio a ki xanene Uli. Iexile mbanza ionene, ni jinzo jauabha. Maji athu exile abhezi a jinzambi ja makutu. Kála kia bhangele ué mu Babele. Athu mu Uli ni mu Babele ka kexile kala Noué ni mon’ê, Seme, a kolokotele ku sidivila Jihova.

Mu kusukáko, kioso kia bhitile 350 a mivu tundé kia bhiti o dilúvio Noué o diiala dia kixikinu, uáfu. Kua bhitile ngó mivu iiadi, o diiala di ua mu mona mu fikula, a mu vuala. Muéne uexile muthu ua kazola ka Nzambi. Dijina diê Mbalahamu. Muéne ua tungile mu mbanza ia Uli ni muiji uê.

Saí kizuua, Jihova uambela Mbalahamu: ‘Xisa Uli ni jindandu jê, uie ku ixi, i nga-nda kuidikisa.’ O kuila Mbalahamu ua belesela Nzambi iu ua xisa o jimbote joso ja Uli? Kiene, muéne ua belesela. Mukonda Mbalahamu ua belesele Nzambi, a muijidile kála kamba dia Nzambi.

Saí akua muiji ua Mbalahamu endele ni muéne, kioso kia xisa Uli. Tat’ê Tela uendele nê kumoxi. Ni muebhué Lote uendele nê. O muhatu’ê, Sala uendele ué. A bhixila kiá bhu kididi a ki xana Halane, kuene kua fuila Tela. O mbanza ia Uli, ai xisa kiá dikanga.

Mu kusukáko, Mbalahamu ni muiji uê a xisa Halane, ni a bhixila mu ixi ia Kanana. Muenhomo, Jihova uixi: ‘Íii iene o ixi i nga-nda bhana ku an’ê.’ Mbalahamu ua tungu mu Kanana, iu uakexile mu jibalaka.

Nzambi ua kuatekesa Mbalahamu, muéne uakexile ni kibhanga kionene kia jimbudi ni ibhaku ia kamúkua ni jihama ja jiselevende. Maji muéne ni Sala ka kexile ni ana.

Kioso Mbalahamu kia tenesa 99 dia mivu, Jihova uixi: ‘Eme ngi ku kanena kuma ua-nda kala tata ia miji iavulu.’ Maji kiebhi kieji bhita, se Mbalahamu ni Sala a kukile kiá phala ku vuala ana?