O Jingongo ki ji Difuile

MIZANGALA iiadi íii ka difuangana, ki kiene? Uejiia o majina mâ? O mukongo Izaú, o muzangala ua mu kuinga o jimbudi, Jakobo.

Izaú ni Jakobo exile an’a jingongo ja Izake ni Bebeka. O tata Izake, ua zolele kiavulu Izaú, mukonda muéne uexile mukongo uambote u bheka kúdia ku muiji. Maji Bebeka ua zolele dingi Jakobo mukonda, muéne uexile muzangala ua tululuka.

O kuku’â Mbalahamu, uakexile hanji ku muenhu, tu tena ku xinganeka kuma Jakobo ua zolele kiavulu, kuívua kuku’ê ku mu tangela maka alungu ni Jihova. Mu kusukáko, Mbalahamu ufuá ni 175 ia mivu, kioso o jingongo ja kexile kiá ni 15 ia mivu.

Kioso Izaú kia kexile ni 40 a mivu, muéne ua kazala ni ahatu kiiadi kia akua Kanana. Kiki kia luualesa Izake ni Bebeka, mukonda ahatu iâ, ka kexile abhezi a Jihova.

Saí kizuua, kua bhitile kima kia bhangesa Izaú ku dizangala kiavulu ni phangi’ê Jakobo. O thembu ia bhixile kiá phala Izake ku bhana dibesá kua mon’ê ua dikota. Mukonda Izaú uexile o mona ua dikota, ua kingile kiá o dibesá didi. Maji Izaú ua diangele kiá ku sumbisa o dibesá diê, kua Jakobo. Kioso o mizangala iiadi a a vuala, Nzambi uambele kuma Jakobo ueji tambula o dibesá. Kiki kiene ki kia bhiti. Izake ua bhana o dibesá kua mon’ê Jakobo.

Kioso Izaú kiévu kienhiki, ua dizangala ni Jakobo. Muéne ua dizangala kiavulu ni uambe kuma ueji jibha Jakobo. Kioso Bebeka kievu, ua thandanganhele kiavulu. Muéne uambela muadi uê Izake: ‘Ia-nda iibha se Jakobo u kazala ué ni muhatu mukuá Kanana.’

Kienhiki, Izake uexana mon’ê, Jakobo, iu ua mu ambela: ‘Kana ku kazala ni muhatu mukuá Kanana. Ndé ku dibhata dia kuku’ê Betuuele mu Halane. U kazale ni mulaul’ê, mon’a Labano.’

Kienhiki, Jakobo uévu tat’ê iu uende o njila katé mu Halane, kua tungile o jindandu jê.