O Sobha Iaiibha i Tumina mu Ijitu

OMAIALA ua mu mona bhobha, a mu jijidika athu ku kalakala. Tala o diiala dia mu beta o mukalakadi ni xikote! O akalakadi muiji ua Jakobo, akua Izalaiele. O a mu a jijidika o ku kalakala, akua Ijitu. Akua Izalaiele exile abhika a akua Ijitu. Kiebhi kiki kia bhitile?

Mu mivu iavulu o muiji ua Jakobo uakexile ni paze mu Ijitu. Zuze, o diiala dionene mu Ijitu u mu tunda ngó Falaó o sobha, uakexile mu a tambula konda. Maji Zuze uafú. O Falaó sobha iobhe ia Ijitu, kazolele akua Izalaiele.

O Falaó íii, uexile muthu uaiibha kinene, ua bhange Izalaiele abhika. Muéne ua tumu athu aiibha phala ku a tumina. Ene a jijidika akua Izalaiele ku tunga ji mbanza ja Falaó. Maji-phe Izalaiele akexile mu dimendala. Kienhiki, akua Ijitu akexile ni uôma ua akua Izalaiele kuila a-nda vula, ni a-nda kala ni nguzu iavulu.

Eie uejiia se ihi ia bhange Falaó? Muéne ua tumina ahatu akexile mu kuatekesa o ji mama ja akua Izalaiele mu vuala, ua ambela uixi: ‘Enu mua tokala mu jibha ana maiala oso, kia vuala.’ Maji ene exile ahatu ambote ka jibhile ana a tokala ku ahatu akua Izalaiele.

Kienhiki, Falaó ua bhele o kitumu kiki ku athu oso: ‘Kuate’nu an’a maiala oso a akua Izalaiele mu a jibhe. Xisenu ngó an’a ahatu ni muenhu.’ Kiki kiexile kitumu kiaiibha, ki kiene? Ndoko tu tale kiebhi kia bhulula o kamona.