Kiebhi Kia Bhulula o Kamona Mozé

TALA o kamona ka mu dila iu ua kuata ku mulembu ua kilumba. Muéne Mozé. Eie uejiia nanhi o kilumba kiki kia uabha? Muéne mon’a Falaó, sobha ia Ijitu.

Manh’a Mozé ua mu suekele katé kia tenesa mbeji jitatu, mukonda muéne ka mesene kuila a mu jibha ku akua Ijitu. Maji muéne uejidile kuma Mozé eji mu sanga, kienhiki muéne ua bhange kiki phala ku mu bhulula.

Muéne ua kuata o kinda ua ki iudika kiambote phala ki ki bokone menha. Kiki-phe, muéne ua tula-mu Mozé, iu ua tula o kinda mu iangu ia Ngiji ia Nilu. Midiiana phange ia Mozé uakexile mu zongojola phala ku mona se ihi ieji bhita.

Mu kithangana kieniókio, mon’a Falaó uéza mu zóua mu Ngiji ia Nilu. Muéne ua mono o kinda mu iangu. Uexana o selevende iê: ‘Ka ngi takanene o kinda kiná.’ O mon’a sobha kia ki jikula, ua mono kamona ka uabha! O kamona Mozé uakexile mu dila, iu ua mu kuatele henda. Muéne ka mesenene kuila a mu jibha.

Kienhiki, Midiiana ua zukama. Ua mu mu mona mu fikula. Midiiana uebhula mon’a Falaó: ‘Ua-ndala ngia mu takana muhatu ua mukuá Izalaiele phala ku sasela o kamona?’

Mon’a sobha ua tambuijila ‘Ndé, nga ku dióndo.’

Midiiana uai ni lusolo mu tangela manh’â. Kioso kia bhixila manh’a Mozé, o mon’a sobha, uixi: ‘Ngi sasele o mona iú, nga-nda ku fute.’

Kienhiki, manh’a Mozé ua sase o mon’ê. Kioso Mozé kia kulu manh’â ua mu ambata kua mon’a Falaó, iu uexile mon’ê. Kienhiki, Mozé ua kudila kubhata dia Falaó.