Ihi i Ua-nda Sanga mu Iônge Ietu ia Ukidistá?

Athu avulu kene múia dingi mu jingeleja, mukonda ka tambula kikuatekesu mu nzumbi mba kua suínisa. Mukonda diahi eie ua tokala kuia mu iônge ia bhanga o Jimbangi ja Jihova? Ihi i ua-nda sanga-mu?

Kusanguluka ni henda ni athu ambote. Mu hama ia dianga, o Jikidistá akexile mu diongeka mu ilunga, ni kubhanga iônge phala kubheza Nzambi, kudilonga o Bibidia, ni ku di suínisa mudiâ. (Jihebeleu 10:24, 25) Mu kukatula mbote mu kithangana kieniókio, ene a divuile kuila ala bhu kaxi ka makamba a kidi​—⁠o jiphange jâ. (2 Tesalonika 1:3; 3 Nzuá 14) Etu tuene mu kaiela o phangu iâ, ni kulondekesa o kusanguluka.

O mbote ijila mu kubelesela o itumu ia Bibidia. M’ukulu, o maiala ni ahatu kumoxi ni an’a jindenge, akexile mu diongeka phala ku bheza kumoxi. Alongexi ala ni uhete ua ku longa o Bibidia, a tu kuatekesa ku tonginina kiambote o itumu ia Bibidia ku muenhu, ni ku i belesela izuua ioso. (Matendelelu 31:12; Nehemiia 8:8) Enioso aia mu kilunga a tena ku bhana kiximanu ni mizumbu iâ, bhu kaxi ka itambuijilu mu kilunga ni kuimba, ni kulondekesa o kidielelu kietu kia ukidistá.​—⁠Jihebeleu 10:23.

O dibesá dia ku kolesa o kixikanu kiê kua Nzambi. O poxolo Phaulu uambe ku ilunga mu izuua iê: ‘Kuma nga m’indi kiavulu ku mi mona, . . . kuila etu enioso, tu di konda malamba mu ku d’ijiia mudietu o kixikanu, mu ku di suínisa mudietu.’ (Loma 1:11, 12) O iônge, i suínisa dingi o kixikanu kietu kioso ki tu diongeka kumoxi ni jiphange jetu, mu ku tu bhana nguzu ia kuambata o ukexilu ua muenhu uetu ua ukidistá.

O kuila u xikina o kuia mu iônge mu kilunga kietu phala kumona o ima íii? A-nda kusangesa ni kisangusangu kioso. U bokona ngó kà ku bhingi kitadi.

• Mu ukexilu uebhi mua bhanga o iônge ietu?

• Kiebhi ki tu tena kukatula mbote mu kuia mu iônge?