Kiebhi o Kikalakalu Kia Akuatekexi a Tufunga?

O Bibidia i zuela kuila mu kilunga muala ibuka iiadi i langa o ikalakalu, “o tufunga ni akuatekexi a tufunga.” (Filipe 1:1, NW) Mu kidi, kuene jiphange javulu a mu sidivila kála tufunga ni akuatekexi a tufunga mu ilunga. Kikalakalu kiebhi kia bhanga o akuatekexi a tufunga phala o mbote ietu?

Ene a kuatekesa o kibuka kia tufunga. O akuatekexi a tufunga maiala a kulu mu nzumbi, jifiiele, akua kilunji, sai iá minzangala a mukua adiakimi. Ene a langa ikalakalu iavulu mu kilunga. Kiki, ki bhangesa o tufunga kukala dingi ni kithangana kia kulonga ni kuinga o kilunga.

Ene a bhanga ikalakalu iavulu mu kilunga. Saí akuatekexi a tufunga, a a sola kala alondekexi phala kusangesa oso eza mu iônge. A mukua a langa o mutelembe, akuâ a langa o madivulu, o kitadi ni kikalakalu kia ku uanena o jimbambe ku jiphange mu kilunga. Ene ué a kuatekesa mu ku iudika mba kuzelesa o Kididi kia Kubheza. Nange o tufunga a tena kua bhinga phala ku kuatekesa o adiakimi mu kilunga. Kikalakalu kioso-kioso kia bhana ku jiphange jiji, mu kukala polondo phala ku kumbidila o ikalakalu, kia a bhangesa kua xila ku jiphange joso.​—⁠1 Timote 3:13.

Ene a bhana phangu iambote. O akuatekexi a tufunga, a a sola mukonda dia ídifua iâ iambote. Kioso ene kia langa o jimbandu mu iônge, ene a kolokotesa o kixikanu kietu. Mukonda dia kukala kupholo mu sidivisu ia kuboka, ene a tu suínisa. Mukonda dia kukuatekesa kiambote o tufunga, ene a suínisa oso kukalakala kumoxi ni kusanguluka. (Efezo 4:16) Mu kubhita kithangana, a tena ué kua sola phala kusidivila kala tufunga.

• Ífua iahi iala na-iu o akuatekexi a tufunga?

• Kiebhi o akuatekexi a tufunga a kuatekesa phala o kilunga kiende kiambote?