Kiebhi ni Mukonda Diahi Tuene mu Tunga—Ididi Ia Ubhezelu?

Mu Kididi kia Ubhezelu, tu di longa o milongi ia Bibidia ia lungu ni Utuminu ua Nzambi​—⁠uexile mu boka Jezú.​—⁠Luka 8:1.

Ididi mua bhanga o ubhezelu ua kidi mu madiembu. Mu ididi íii, a bhanga-mu ué o iônge phala kuia mu sidivisu ia kuboka o njimbu iambote. (Matesu 24:14) O Ididi ia Ubhezelu ki i difu, kala kididi kiala ni kídifua kiê, maji ioso ididi iambote, mu kididi kimoxi, a tena ku diongeka-mu ilunga iavulu. Ku mivu ia bhiti tua tungu ididi iavulu ia ubhe (kala kizuua ididi itanu) phala o ilunga ietu ia mu dibandekesa, i kale ni ididi ia fuama. Kiebhi kia tena kutunga o ididi íii?​—⁠Matesu 19:26.

O ididi íii, a i tunga ni kitadi kia sangela. Mu ididi ioso ia ubhezelu, saí-mu kaxa ia ku sangela, phala ku Tunga o Ididi ia Ubhezelu ku Mundu Uoso. O kitadi kiki, kia sangela a ki tumikisa ku filiiale phala ku ki bhaka kioso, o ilunga kia ki bhindamena kutunga Ididi ia Ubhezelu, o filiiale u bhana o kitadi kiki.

O athu a tunga o ididi íii, athu a ukexilu uoso a di bhakula mu vondadi iâ sé ku a futa. Mu jixi javulu muala Ibuka i Tunga o Ididi ia Ubhezelu. O ibuka íii, aia ilunga ni ilunga mu tunga o ididi íii, né muene kioso ki ku bhinga ku kuatekesa o jiphange ja mukua ku maxokololo a ixi ienioió. Mu jixi jengi muala ibuka ia kutunga mu madiembu (Comissões Regionais de Construção) a o solo phala kubhana o kikalakalu kia kukala kupholo mu ku tunga o Ididi ia Ubhezelu. O tufunga ala ni ufunu ua kutunga, a kala kupholo kioso kia mu tunga o kididi kia Ubhezelu katé kia ki zubha ni jiphange ja di bhakula a kuatekesa uá. Kioso kia tunga, o jiphange a tokala ku kilunga kieniókio ene a tokala ku beta-kota mu ku kuatekesa. O nzumbi ia Jihova, ni nguzu i bhanga o jiselevende jê, i bhangesa kuila a tena kutunga o ididi íii.​—⁠Jisálamu 127:1; Kolose 3:23.

• Mukonda diahi o ididi ietu ia kubheza, a ixana Ididi ia Ubhezelu?

• Kiebhi kia tena kutunga o Ididi ia Ubhezelu ku mundu uoso?