O Njimbu Iambote Ihi?

1. O njimbu iambote ia Nzambi ihi?

Nzambi ua mesena o athu a kale ni muenhu mu ixi. Muéne ua bhange o ixi ni ioso iala-mu, mukonda ua zolo o athu. Kua kambe ngó bhofele, muéne ua-nda bhangesa athu oso ku kala kiambote mu ixi ioso. Ua-nda bhulula o mundu ku jiphaxi joso.—Tanga Jelemiia 29:11.

Se-ku unguvulu u tena ku zubha o mauhaxi, o usuéia, ni kalunga. Maji né kiki, saí hanji njimbu iambote. Kua kambe ngó bhofele, Nzambi ua ka sasujula o mautuminu oso, o utuminu uê uene ua-nda ku a bhingana. O mundu uoso, ua ka kala mu ku tululuka ni sauidi iambote.—Tanga Izaia 25:8; 33:24; Daniiele 2:44.

2. Mukonda diahi o njimbu íii iambote, ia tokala ku i tula ni lusolo?

O hadi ia-nda bhua ngó kioso Nzambi kia-nda buika o athu oso a iibha mu ixi. (Sofoniia 2:3) Kiki kia-nda bhita thembu kuxi? O Mak’â Nzambi a kanena o ukexilu ua ima ia iibha iene mu ta o mienhu ia athu mu iluezu. O izulukutu ia mu bhita ilondekesa kuila o thembu ia Nzambi ia ku buika o mundu iú ua Diabhu, ia zukama kiá.—Tanga 2 Timote 3:1-5.

3. Ihi i tua tokala o ku bhanga?

Tua tokala ku di longa ia lungu ni Nzambi, mu Maka mê, o Bibidia. Iene iala kála mukanda u tumikisa o tata ia henda, phala etu, i tu tangela kiebhi ki tu tena ku kala ni muenhu uambote lelu, ni kiebhi ki tu tena ku kala ni muenhu ua kalela-ku mu ixi ku hádia. Tuejiia kuila saí athu, ka-nda ki uabhela se u di longa o Bibidia. Maji kana kuehela kuila o athu enhá a ku fidisa ku tambula o muenhu ua kalelaku.—Tanga Jisabhu 29:25; Dijingunuinu 14:6, 7.