DISÁ 4

Jezú Kristu Nanhi?

1. Kiebhi kia mateka o muenhu ua Jezú?

1. Jezú ku diulu; 2. Jezú bhu maku ni Madiia ni Zuze; 3. Jezú ua mu longa ana-ndenge — Ídifua iebhi ia londekesa Jezú kuila ua uabhela o ku mu zukama?—MATESU 11:29; MARKU 10:13-16.

Muéne ua kexile ku diulu ande dia kuíza mu ixi, se-ku muthu ua ituxi ua kexile ku diulu kála muéne. (Nzuá 8:23) Jezú o muthu a diangela o ku mu bhanga kua Nzambi, muéne ua kuatekesa tat’ê ku bhanga o ima ioso mu ngongo. Muéne ngó a mu bhange kua Jihova ubheka uê, mukonda dia kiki muéne ngó a tokala ku mu ixana Mon’a “umoxi-élele” ua Nzambi. (Nzuá 1:14) Jezú uexile Mukunji ua Nzambi, kiene kia mu ixanene ‘Njimbu.’—Tanga Jisabhu 8:22, 23, 30; Kolose 1:15, 16.

2. Mukonda diahi Jezú uéza mu ixi?

Nzambi ua tumikisa Mon’ê mu mala dia Madiia, muzeletete mukua Judeia. Mukonda dia kiki, Jezú ka mu vuala ku tata mukua ituxi. (Luka 1:30-35) Jezú uéza mu ixi (1) phala ku longa o kidi kia lungu ni Nzambi, (2) phala ku bhana phangu ia ku bhanga o vondadi ia Nzambi sumbala ni ibhidi, (3) ni ku bhana o muenhu uê mu ku tu “kula.”—Tanga Matesu 20:28.

3. Mukonda diahi kua bhingile ku tu kula?

O kukula, o kifutu kia bhana phala ku bhulula o muthu phala ka fué. (Makatukilu 21:29, 30) Tundé ku dimatekenu, Nzambi ka mesenene kuila o athu a fuá, a kuka. Kiebhi ki tua kijiia? Nzambi uambe ku diiala dia dianga Adá, kuila se muéne u ta “kituxi” ueji fuá. Se muéne ka tele o kituxi, keji fuá. (Dimatekenu 2:16, 17; 5:5) Kala ki tanga o Bibidia, o kufuá “kuejila” mu ngongo mukonda dia Adá. Kienhiki, o muiji uoso ua Adá ua lundula o kituxi ni kufuá. Mukonda dia kiki tua bhingi ku tu kula phala ku tu bhulula ku kituxi ki tua lundula kua Adá.—Tanga Loma 5:12; 6:23.

Nanhi ueji tu kula phala ku tu bhulula mu kufuá? Kioso ki tu fuá tua bhuluka kiá ku kituxi. Se-ku muthu mukua ituxi ueji tena ku bhulula muthu mukua ituxi.—Tanga Jisálamu 49:7-9.

4. Mukonda diahi Jezú uafú?

Jezú ua mu fuá a mu phapela ku taka maji mu kubhita thembu a mu fukununa kindala Sobha ua mu tumina ku diulu

Jezú kexile kála etu, muéne kexile ni kituxi. Muéne ka bhingile kufuá mukonda dia ituxi—mukonda muéne ka tele kituxi. Nê kiki muéne uafú mukonda dia ituxi ia akuâ. Nzambi ua londekesa o henda iê ku mundu, mu ku tumikisa o mon’ê ua kazola phala ku tu bhulula. Jezú ua londekesa ué o henda iê mu ku belesela Tat’ê, phala ku tu bhulula ku ituxi.—Tanga Nzuá 3:16; Loma 5:18, 19.

Tala o vidyu Mukonda Diahi Jezú Uafu?

5. Ihi ia mu bhanga Jezú lelu?

Kioso kia kexile mu ixi, Jezú ua sake athu, ua fukununa athu, iu ua bhulula athu ku iluezu. Muéne ua londekesa o ima ia-nda bhanga phala o athu a belesela. (Matesu 15:30, 31; Nzuá 5:28) Kioso kiafu Jezú, Nzambi ua mu fukununa kala muthu mu nzumbi. (1 Phetele 3:18) Ua kingila bhu mbandu ia kadilu, katé Jihova kia mu bhana o kutena kua ku tumina o ngongo ioso. (Jihebeleu 10:12, 13) Lelu Jezú uala Sobha ku diulu, o akaiedi’ê ene mu boka o njimbu iambote mu ixi ioso.—Tanga Daniiele 7:13, 14; Matesu 24:14.

Kua kambe ngó, Jezú ku Usobha uê ua-nda zubha o jiphaxi joso, ni ió ene mu bheka o jiphaxi. Uoso u dielela kua Jezú, n’a mu belesela, ua-nda tambula muenhu ua kalelaku mu ixi.—Tanga Jisálamu 37:9-11.

Phala kuijiia dingi, tanga o kibatulu 4 ni 5 kia divulu Ihi i Tu Longa o Bibidia?