Disá 13
Timote ua Mesenene ku Kuatekesa o Athu
Timote, uexile munzangala ua zolele ku kuatekesa o athu. Muéne uendele ididi iavulu phala ku kuatekesa o athu. Mukonda dia kiki, muéne ua sangulukile kiavulu ku muenhu uê. Ua mesena kuijiia dingi ia lungu ni muéne?—
O kuku a Timote ni manh’â, a mu longo ia lungu ni Jihova
Timote ua kudila mu mbanza ia Listra. Kioso kiexile mona-ndenge, o kuku’ê Loue ni manh’â Unice, a mateka ku mu longa ia lungu ni Jihova. Kioso kia kexile mu kula, muéne ua mesenene ku longa o athu ia lungu ni Jihova.
Kioso Timote kia kexile hanji munzangala, Phaulu ua mu bhingile phala kuia né mu boka mu ididi ia mukuá. Timote ua ‘xikina!’ Muéne ua kexile polondo phala kuia mu kuatekesa akuâ.
Timote uai ni Phaulu ku ixi ia Masedonha, mu mbanza ia Tesalonika. Phala ku bhixila mu mbanza íii, ene ende kiavulu, mu ku suka-ko, a kuata baluku. Kioso kia bhixila kuenhoko, ene a kuatekesa athu avulu kuijiia ia lungu ni Jihova. Maji saí athu akexile ni njinda, a mesenene ku a beta. Kiki kia bhangesa Phaulu ni Timote ku xisa o mbanza ienioió, phala kuia mu boka mu ididi ia mukuá.
Timote ua sangulukile ku muenhu
Mu ku bhita jimbeji, Phaulu ua bhingi kua Timote phala kuia mu mbanza ia Tesalonika mu tala o jiphange. Kua bhingile ku suína kuavulu, phala Timote ku vutuka mu mbanza ienioió mua kexile o jinguma jâ! Maji Timote uai, mukonda ua thandanganhele ni jiphange a tungile mu mbanza ienioió. Kioso kia vutuka, ua bhekele njimbu iambote kua Phaulu. O jiphange mu Tesalonika akexile kiambote!
Timote ua kalakala ni Phaulu mu mivu iavulu. Saí kithangana, Phaulu ua soneka kuila, Timote muene o muthu ua tokalele ku mu tumikisa phala ku kunda o jiphange. Timote ua zolele kiavulu Jihova, ni athu.
Eie ua zolo ué o athu? Eie ua mesena ku a kuatekesa kuijiia ia lungu ni Jihova?— Se kiene, u tena ku sanguluka ku muenhu uê, kála kia kexile Timote!