Mbandu 4
Kiebhi ki u Tena ku Langa o Kitadi
“Kaiula, kene ka fikidila kioso muthu kia kana ku bhanga.”—Jisabhu 20:18
Etu oso tua mesena kitadi phala ku dikila o muiji. (Jisabhu 30:8) O Bibidia i zuela kuila o “kitadi ki vungina kala kilembeketa.” (Ndongixi 7:12) Mukonda mu makaza, nange ki mi bhonza kuzuela ia lungu ni kitadi, maji kana kuehela o kitadi ku zanga o ukaza uê. (Efezo 4:32) O makaza a tokala ku di dielela ni ku kala ni ibanzelu imoxi ia lungu ni ku ngastala o kitadi.
1 XINGANEKE-NU KIAMBOTE MU IMA I MUA-NDA SUMBA
IHI I ZUELA O BIBIDIA: ‘Nanhi muthu mudienu kia-ndala ku tunga sabhalalu, u kamba ku xikama hanji, ni ku xinganeka o ngasu, mbé ku tala se uala ni kia soko ku i zubha.’ (Luka 14:28) Kima kiambote ku zuela kiebhi ki mua-nda ngastala o kitadi kienu. (Amoji 3:3) Zuelenu o ima i mua mesena o ku sumba ni kitadi ki mua-nda bhinga phala ku i sumba. (Jisabhu 31:16) O ku kala ni kitadi phala ku sumba ima ki kulombolola kuila, ua tokala ku sumba ioso i mua mesena. Kana ku di ta mu makongo. Ngastalenu ngó o kitadi ki muala na-kiu.—Jisabhu 21:5; 22:7.
IHI I U TENA O KU BHANGA:
Se ku subhuka kitadi mu disukilu dia mbeji, di kundienu ihi i mua-nda bhanga ni kitadi kiki
Se mu kamba kitadi phala ku sumba o ima i mua bhindamena, sosole-nu ku ima i muene mu sumba, sumbe-nu ngó o ima i mua bhindamena. Mu kifika, mu veji dia ku sumba o kudia kuo lambe kiá, mukonda diahi ki mu lambe kubhata?
2 ZUELENU O KIDI
IHI I ZUELA O BIBIDIA: ‘Tua mesena kubhanga ioso mu kidi, kana ngó bhu pholo ia Ngana, maji ni bhu pholo ué ia akuetu.’ (2 Kolindo 8:21) Zuela kua kaza diê se kikuxi ki uene mu tambula ku salu iê, ni kikuxi ki uene mu ngastala.
Ande dia ku sumba kima kioso-kioso, zuela hanji ni kaza diê. (Jisabhu 13:10) O ku di kunda mudienu ia lungu ni kiebhi ki mua tokala o ku ngastala o kitadi, kua-nda kuatekesa o ukaza uenu. Tala o kitadi ki u nganhala ku salu kana kála kitadi kiê ngó kana, maji kala kitadi kia muiji.—1 Timote 5:8.
IHI I U TENA O KU BHANGA:
Mu di kunda se kitadi kuxi ki tena ku ngastala kala muthu sé ku bhinga kua mukuá
Ki mu kingile kuzuela ia lungu ni kitadi, kioso ngó ki moneka maka