“Ioso ia Jimbila Ngi i Kenga”

JIHOVA ua soko kiavulu ni mubhidi iú. Mu Maka mê, muéne u tu kanena: “Eme-muène muene, nga-nda kusota o mbudi jami inga ngi ji takana.”—Izekiiele 34:11, 12.

“Jimbudi ja Dikèla Diami”

A nanhi o jimbudi ja Jihova? O jimbudi ja Jihova, o athu oso a mu zolo, ene ku mubheza. O Bibidia izuela: “Ndokuenu tu bhetame, phala tu bhezienu, tu fukame bhu pholo ia Jihova ua tu bhanga. Mukonda muene Nzambi ietu; etu tu athu ku makèla mê, tu jimbudi uala ku tu inga ni lukuaku luê.” (Jisálamu 95:6, 7) Kála o jimbudi ja kidi ji kaiela o mubhidi, o abhezi a Jihova, a mesena kiavulu ku kaiela o mubhidi uâ. O kuila ene kene mu ta kituxi? Kana. Saí ithangana o jiselevende ja Nzambi, ji kala kála “jimbudi ja di muange,” mba “jimbudi ja jimbidila,” mba “jimbudi ja jimbila o njila.” (Izekiiele 34:12; Matesu 15:24; 1 Phetele 2:25) Maji né kiki, se muthu u xisa o kilunga Jihova ka mu landuka kana, kála muthu ka-nda vutuka dingi mu kilunga.

O kuila u banza hanji kuila Jihova Mubhidi uê? Kiebhi Jihova kiene mu londekesa kuila muéne mubhidi uambote lelu? Xinganeka phangu jitatu:

Muéne u tu disa mu nzumbi. Jihova uambe: “Mu sabhelela ia mbote, muene mu nga-nda ku ji disila, muenhomo ja kà zeka mu kibhanga kia mbote, hé ja k’ènda ni kudila mu makèla a nete.” (Izekiiele 34:14) Jihova nuka ua kambele ku tu disa mu nzumbi mu kithangana kia tokala. O kuila u tena ku lembalala milongi mu madivulu metu, diskursu, mba vidiu ia tambuijila o musambu uê, kioso ki ua bhingi kikuatekesu? O kuila uala hanji ni phata kuila Jihova uene mu ku suua?

Muéne u tu langa, u tu kuatekesa. Jihova ua kanena: “O ia di texi ngiza na-iu dingi, o ia bukula kinama ngi i tá mu kitanda, o ia kate ngi i tumba.” (Izekiiele 34:16) Jihova u suínisa o jiselevende jê ja zoza mu nzumbi, a toloka o mixima mukonda dia hele. Muéne u tumba o jimbudi jê, u ji kuatekesa ku di sanza se a ji kuama—nange ku abhezi ni akuâ. Muéne u bheka mu kilunga oso a xisa o kilunga, ni ió ala ni ndolo ku muxima.

Muéne uejiia kuila tu jimbudi jê. Jihova uambe: “Ngi ji takana mu ididi ioso mu ja di muangena, ioso ia jimbila ngi i kenga.” (Izekiiele 34:12, 16) Jihova ka banze kuila o mbudi ia texika ki i tena dingi ku vutuka. Muéne uejiia kioso ki bhu kamba mbudi, anga u i sota, o kia i sanga u sanguluka kiavulu. (Matesu 18:12-14) Mukonda muéne uixana o abhezi’ê, “mu jimbudi jami, jimbudi ja dikèla diami.” (Izekiiele 34:31) Eie uala ué mu dikèla didi.

‘Tu Bhane Dingi Izuua ia Ubhe Kála ki Tua Kexi mu Xiahulu’

Mukonda diahi Jihova u ku sota ni ku ku bhinga phala u vutuke dingi kua muéne? Mukonda muéne ua mesena kuila eie u sanguluka ku muenhu. Muéne u tu kanena kuila, o mabesá a “kà kala mvula ia kizediuise,” phala o jimbudi jê. (Izekiiele 34:26) Iá ki makutu kana. Eie ua mono kiá kuila Jihova ki mukua ku tanga makutu.

Xinganeka hanji kiebhi ki uéza mu kuijiia Jihova. Mu kifika, kiebhi ki ua divu kioso kia ku longo o kidi kia lungu ni dijina dia Nzambi, ni vondadi iê phala o athu? Ua mu dilembalala o kusanguluka ku ua kexile na-ku, mu ku dilunga ni jiphange jê mu iônge ia makota? Kioso ki ua bokele o njimbu iambote ku muthu ua mesenene kiavulu kuívua o njimbu ia Nzambi, kiebhi ki ua divuile, ku sangulukile kiavulu?

Eie u tena ku sanguluka dingi kála ki ua kexile. O jiselevende ja Nzambi m’ukulu a sambe: ‘Tu vutule dingi kokué, U Jihova, nda etu tu tene o ku ku vutukila; tu bhane dingi izuua ia ubhe kála ki tua kexi mu xiahulu.’ (Kuditenda 5:21) Jihova ua tambuijila o musambu iú, anga o mundu uê u vutuka ku mu sidivila dingi ni kisangusangu. (Nehemiia 8:17) Kiki kiene kia-nda bhanga ué Jihova n’eie.

Né kiki, o kuzuela kiki, ki ki bhonzo, maji o ku ki bhanga ki bhonza. Tanga o ibhidi i tena ku ku fidisa kuvutuka, ni kiebhi ki u tena ku i tolola.