MBANDU 5

Vutuka ku “Mubidi, Muingi ua Mienhu Ienu”

O kuila ua mu bhita mu ibhidi io jimbulule mu kadivulu kaka? Se ua mu bhita mu ibhidi íii, ejiia kuila k’eie ngó. Jiselevende javulu ja Nzambi—m’ukulu ni mu izuua ietu—a mu dibhana ué ni ibhidi kála íii. Ene a tambula kikuatekesu kia Jihova phala kudibhana ni ibhidi, eie ué a-nda ku kuatekesa kudibhana na-iu.

Jihova uala polondo phala ku ku kuatekesa, se u vutuka kua muéne

IJIIA KUILA Jihova uala polondo phala ku ku kuatekesa, se u vutuka kua muéne. Muéne ua-nda ku kuatekesa kudibhana ni ibhidi, ku katula o ndolo ku muxima, ni ku kala ni kutululuka ku muxima, kuijila mu kukala ni kitongoluelu kia zele. Kiki-phe eie ua-nda mesena dingi kusidivila Jihova kumoxi ni jiphange jê mu kilunga. Eie ua-nda kala kála o Jikidistá ku hama ia dianga, a a tange Phetele mu mukanda ua soneka: “Enu mua jimbidile kala mu jimbudi ja jimbila o njila. Maji kiki-phe a mi vutula dingi mu bhongolokela kukaiela o Mubidi, Muingi ua mienhu ienu.”—1 Phetele 2:25.

O kuvutuka kua Jihova, kiene o kima kia beta-o-kota ki ua tokala o kubhanga. Mukonda diahi? Mukonda ua-nda sangulukisa o muxima ua Jihova. (Jisabhu 27:11) Kála ki uejiia, Jihova uivua ndolo kioso ki tu bhanga kima kiaiibha, u sanguluka kioso ki tu bhanga kima kiambote. Tuejiia ué kuila Jihova ka tu jijidika ku mu zola mba ku mu sidivila. (Matendelelu 30:19, 20) Saí diiala mukua kutokuesa o Bibidia, uambe: “Se-ku kikuatelu bhu kanga dia dibhitu dia muxima ua muthu. Ka tena ku di jikula bhu kanga.” Mukonda dia kubheza Jihova ni muxima uezala ni henda, tu tena kusola kujikula o dibhitu didi. Kioso ki tu bhanga kiki, tua mu mu bhana ujitu ua katunda—o ufiiele uetu—kienhiki tu sangulukisa o muxima uê. Se-ku kima ki soka ni kisangusangu ki tu kala na-kiu, mu kubhana kua Jihova o ubhezelu ua mu tokala.—Ikalakalu 20:35; Dijingunuinu 4:11.

Phang’etu ia muhatu ua xile o kilunga a mu mu tambulula kiambote ku jiphange mu kilunga

Kioso ki ua-nda vutuka kubheza Jihova, ki kua-nda ku kamba kudia mu nzumbi. (Matesu 5:3) Kiki kilombolola ihi? O athu ku mundu uoso ene mu dibhuidisa, ‘mukonda diahi tuala ku muenhu?’ Ene a mesena kiavulu kusanga o itambuijilu ia ibhuidisu ia lungu ni muenhu. O athu ene ni ukexilu iú, mukonda kiene kia a bhange Jihova. Muéne ua tu bhange phala tu sanguluke mu ku mu bheza. Se-ku kima ki tu bhana kisangusangu kia dikota, kála o kuijiia kuila, tua mu bheza Jihova mukonda dia henda.—Jisálamu 63:1-5.

Tua ku bhingi, ijiia kuila Jihova ua mesena u vutuka kua muéne. Kiebhi ki u tena kuijiia kuila kiene kiandala muéne? Xinganeka: Tua sambe kiavulu phala ku iudika o kadivulu kaka. A ku bhekela-ku, ku kafunga mba phange mu kilunga. Kindala eie ua mu ka tanga, eie ua mu xinganeka mu njimbu iê. Kiki kilombolola kuila Jihova ka ku jimbi. Muéne ua mu ku sunga ni henda ioso.—Nzuá 6:44.

Tua tokala ku tululuka mu kuijiia kuila Jihova ka jimbi o jiselevende jê ja xisa o kilunga. Kiki kiene kiambe phang’etu a muixana Donna. Muéne uambe: “Eme bhofele bhofele, nga kexile mu xisa o kilunga, maji mu ithangana iavulu nga kexile mu xinganeka mu divulu dia Jisálamu 139:23, 24, dizuela: ‘Nzambi ngi solokote, u ng’ijiie muxima moxi; ngi lole, u ngi tongolole o ilunji ioso; ngi tangele, se ua ngi mono ngala kuila muengi; u ngi vutukise mu kikoka ki nangenena.’ Ngejidile kuila ki ngi tokalele ku mundu—ki ngi sangulukile mu bhanga o ima ia mundu—ngejidile ué kuila eme nga tokalele mu kilunga kia Jihova, muene mu nga tokala ku kala. Nga mateka kumona kuila Jihova nuka ua ng’ehelele; Nga tokalele ngó kusanga o njila phala kuvutuka kua muéne. Nga sanguluka mu kuvutuka!”

“Nga mateka kumona kuila Jihova nuka ua ng’ehelele; Nga tokalele ngó kusanga o njila phala kuvutuka kua muéne”

Tua mu samba ni kidi kioso phala eie ué u kale dingi ni “kusanguluka kua [Jihova.]” (Nehemiia 8:10) Kua-nda diela se u vutuka kua Jihova.

Itambuijilu ia Ibhuidisu ia Lungu ni Kuvutuka Kua Jihova

NGI MATEKA KIEBHI?

O muthu ua katele kiavulu, mu ku disanza, muéne u kala hanji mu bhanga o ima bhofele-bhofele katé kia-nda disanza kiambote. Eie ué u tena kukala dingi ni nguzu mu nzumbi mu kudia bhofele-bhofele o kudia kua nzumbi. Eie ku bhingi kiá kubhanga o ima ioso mu nzumbi, mu kithangana kimoxi. U tena ku katula tu ithangana, phala kutanga mba kuívua o milongi ia Bibidia, kudilonga o madivulu metu mba kujikula o kijimbuete jw.org/kmb. Sota ué kuia mu iônge mu kilunga ni lusolo-luoso. Maji o kia beta-o-kota, samba kua Jihova phala ku ku kuatekesa. “Héle ienu ioso xilenu-iu Nzambi, kuma muène ua mi kuatela muanu.”—1 Phetele 5:7.

“Kioso ki nga xisa o kilunga kia Jihova, nga kexile ni jisonhi kate muene ja kusamba. Kioso ki nga sange nguzu ia kusamba, a ngi kundu ku kafunga ka kilunga kietu. Muene ua ngi kuatekesa kumona kuila Jihova ka ngi’ehele ubheka. O kafunga ua ngi suýnisa kumateka kutanga o Bibidia izuua ioso. Mu kubhanga kiki, nga kuata nguzu ia kuia dingi mu iônge. Mu kubhita thembu, nga mateka dingi o kuia mu boka. Nga sanguluka kiavulu mukonda Jihova nuka ua ngi bhana dikunda.”—Eeva.

KIEBHI KIA-NDA NGI TAMBULULA O JIPHANGE MU KILUNGA?

Ijiia-kiu kuma, o jiphange joso mu kilunga a-nda ku tambulula kiambote. Ene ka-nda ku tatela mba ku ku fundisa, mu veji dia kiki a-nda londekesa kuila a ku zolo kiavulu, a-nda bhanga ioso phala ku ku kuatekesa.—Jihebeleu 10:24, 25.

“Nga kexile ni jisonhi ja kuia mu kiônge. Nga kexile mu dibhuidisa kiebhi kia-nda ngi mona ku makamba mami. Kioso ki ngai mu kiônge, phang’etu ia muhatu ua kuka kiá, ua kexile kiá mu kilunga mu 30 a mivu, ua ngi tangela: ‘Ua bhange kiambote mon’ami!’ O izuelu íii ia ngi suínisa kiavulu. Nga divu kiambote.”—Javier.

“Ngai mu kiônge, maji nga xikama ku hota, phala ka ngi mone ku jiphange. Maji jiphange javulu a ngi mono, mukonda tundé undenge, nga kexile múia mu iônge. Ene a ngi tambulula kiambote, a ngi bhubhala ni henda ioso, nga divu kiambote.”—Marco.

KIEBHI KIA-NDA NGI KUATEKESA KU TUFUNGA?

O tufunga a-nda ku tambulula ni henda ioso. Ene a-nda ximana o henda iê ia ‘kuzola dingi kala ku dimatekenu.’ (Dijingunuinu 2:4) Ni henda ioso, ene a-nda ku kuatekesa kukala ni uendelu uambote, maji a-nda bhanga kiki “ni muxima uabatama.” (Ngalásia 6:1; Jisabhu 28:13) O tufunga nange a-nda sota phange mu kilunga phala kukala ku ku longa o Bibidia nange ni kikuatekesu kia divulu, Sanguluka Katé Kuhádya ni Hadya!,” mba “Achegue-se a Jeová.” O tufunga a-nda ku suínisa ni ku ku kuatekesa mu uendelu uê.—Izaia 32:1,2.

“Nga xisa o kilunga mu dinake dia mivu, maji o tufunga a sulukile ni ku ngi kuatekesa. Saí kizuua, kafunga mu kilunga ua ngi londekesa jifoto ji tua katuile. O jifoto jiji ja ngi kuatekesa kulembalala ima iavulu iambote, eme nga mesenene dingi kusanguluka kála ki nga sangulukile m’ukulu, ki nga mateka kubheza Jihova. O tufunga ni henda ioso a ngi kuatekesa kukala dingi ni ukamba uambote ni Nzambi.”—Victor.

Jihova Wa-nda ku Swinisa

O kadivulu ketu ka kuimba, Imbila Jihova ni Muxima Woso, kala ni mimbu iambote i tena ku ku suínisa ni ku ku kolokotesa, kioso ki u vutuka mu kubhanga dingi o ikalakalu mu nzumbi. Xinganeka o izuelu ia muimbu ua 38. A u katula mu izuelu i tu sanga mu divulu dia 1 Phetele 5:10, ni diambu diambe: Jihova Wa-nda ku Swinisa.

Ihi ya bhangesa o Nzambi ya kidi,

ku kwendesa katé bhwal’o kidi?

Mwene wa mono-phe, o henda yé kokwê,

vondadi yeˊ ya ku mu bhikila.

Mukonda wa di bhakula kokwê,

Jihova Nzambi, wa-nda ku langa.
Jihova wa bhana o mwenyu wa mon’ê;

mukonda wa ku zolo kyavulu.

Ku kale ni phata, wa-nda ku dikila,

mukonda wa tokala kwa mwene

Jihova Nzambi, muthu wa yuka.

Ka-nda jimba i wene mu bhanga.

(KOLO)

Kindala, mwenyu weˊ-phe, wa ngene wa Nzambi.

Wa-nda ku swinisa, wa-nda ku kolesa.

Ka-nda ku kwehelela, wa-nda ku ku langa.

Wa-nda ku swinisa, wa-nda ku kolesa.

Phala kuivua o muimbu iú ni mimbu iakamukuá ia Utuminu, ndé ku jw.org.