KIBHUIDISU 2
Mukonda Diahi Ngi Thandanganha ni Pholo Mba Mukutu Uami?
IHI I UEJI BHANGA?
Tala o kifika kiki: O jitata ni makamba a Júlia ene mu zuela kuila muéme ua “bhele” kiavulu. Maji kioso Júlia kia ditala mu lumuenu u dimona kala ua nete kiavulu mu kiki muéne u zuela: “Kala ngi bhela ni lusolo!”
Júlia ua mesena kubhela “kilu jiiadi” mu kiki, ua mu bhanga ioso ni ioso phala kutena kubhela, katé muene saí izuua kadié . . .
Eie se uexile mu kididi kia Júlia, ihi i ueji bhanga?
XINGANEKA!
O ukexilu ué ua kudimona, mu kidi nange ki uene o ukexilu ué
Ki kima kiaiibha kuthandanganha ni pholo ié. Mu kidi, o Bibidia i ximana kiavulu mala ni ahatu avulu kala Sala, Lakele, Abingaile, Zuze, Davidi ni kuila a uabhele kiavulu o pholo ni mukutu. O Bibidia i zuela ia lungu ni muhatu a muixanene Abisaki kuila ‘ua uabhele kiavulu.’—1 Jisobha 1:4.
Maji kuene minzangala iavulu i thandanganha kiavulu ni pholo iâ. Kiki ki tena kubheka maka avulu. Mu kifika:
O jingijiie a tokuesa, iá a mono kuila 58 dia jipursentu ja ahatu ambele kuila a netene kiavulu, maji a mono kuila mbé a netene ngó 17 dia ahatu.
Lua mukuá, 45 a jipursentu ja ahatu a bhelele kiavulu, a fikile kuila ene a netene kiavulu.
Mu kumesena kubhela, saí minzangala a kuata uhaxi ua kukala ni uôma ua kudia, o uhaxi iú u jibha.
Se u divua kala ua kuata ué o uhaxi iú mba mauhaxi a mukuá alungu ni uôma ua kudia, sota kikuatekesu! U tena kuzuela ni jitata jé mba muthu ua mukuá u ua mu dielela. O Bibidia i zuela: “Dikamba u zola mu thembu joso; o undandu u di monekena mu jiphaxi.”—Jisabhu 17:17.
Langa O Kima Kia Beta Kota Ki Uala Na-kiu!
Mu kidi, o u uabhesa kiavulu muthu, ko pholo iê kana maji o ukexilu uê. Tala o musoso ua Abisalone, mon’â Sobha Davidi. O Bibidia i zuela:
“Ki bhuala muthu a mu ximana o kuiuka kua kuuabha o mukutu ni pholo. . . . Ka moneka ngó kisemu.”—2 Samuuele 14:25.
Maji o munzangala iú muxima uê uezalele ni kudizangeleka, luímbi, uexile muthu ua kambele ufiiele! Kienhiki, o Bibidia ki i ximana Abisalone kana; i mu tumbula kala kijibhangânga.
Mukonda dia kiki, o Bibidia i tu dimuna:
“Zuata muthu uobhe.”—Kolose 3:10.
“O kukemba kuenu ki ku kale kukemba kua kanga . . . , Ku kale-phe kukemba kua muthu ua suama moxi.”—1 Phetele 3:3, 4.
Sumbala ki kima kia iibha kukala ni pholo ia iuka, maji o kia beta-o-kota o ukexilu ué. O athu a-nda ku uabhela dingi mukonda dia kukala ni ukexilu uambote, ki mukonda dia kukala ni pholo mba mukutu ua iuka kana! Kilumba a muixana Phylicia, uambe: “O athu a tena ku ku mona mukonda uala ni pholo ia iuka, maji a-nda ku lembalala ngó se u kala ni ukexilu mba ídifua iambote.”
U SANGULUKA KIOSO KI U MONA O PHOLO MBA O MUKUTU UÉ?
O kuila eie u luuala kiavulu mukonda dia pholo ié?
Ua banzele kiá kudia ngó bhofele mba kudituna kudia phala kukala ni mukutu ua iuka?
Se ua kexile ni kutena, ihi i ueji lungulula ku pholo ié mba mukutu? (Xinda o ima i ueji lungulula.)
KULEBHA
KUNETA
NDEMBA
MUKUTU
PHOLO
KIKONDA
Se ua tambuijila kiene mu ibhuidisu iiadi ia dianga, eie ua xindi ima itatu mba iuana i ueji lungulula ku pholo mba mukutu, ijiia kuila: Athu a mukuá ka mu ku mona kala ki ua mu dimona eie mudié. Aluka, kana kuthandanganha kiavulu ni pholo mba ni mukutu ué ni kubhanga ima iavulu iaiibha.—1 Samuuele 16:7.