A mu Bhingi Kima Kia Bhonzo

Mbalahamu ua zolele Jihova iu ua dielele kua muene, mu kiki ua longele ue mon’ê Izake ku zola ue Jihova. Maji kioso Izake kia kexile ni 25 a mivu, Jihova ua bhingi kua Mbalahamu phala kubhanga kima kia bhonzo. Kima kiahi?

Nzambi uambela Mbalahamu: ‘Nga ku dióndo kuata mon’ê umoxi-élele, u muambate katé ku ixi ia Modiia, ku mulundu u nga-nda ku ku londekesa phala ku mu bhana kala sata.’ Mbalahamu ka tendela se mukonda diahi Jihova ua mu bhingi kubhanga kiki. Maji né muene kiki, ua belesela Jihova.

Kioso ki kuaki, Mbalahamu uai ni mon’ê Izake ni kiiadi kia abhika bhu kididi kia mu tumine Jihova. Mu kubhanga izuua itatu mu njila, a mateka kumona o milundu. Mbalahamu uambela o jiselevende jê, xalenu bhabha, eme ni Izake tua muia mu bhana sata kua Jihova. Mbalahamu uambela Izake phala kuambata o jihuinhi, muene anga uambata o phoko. Izake uebhuidisa Tat’ê: ‘Kuebhi kuala o kiama ki tua-nda satela kua Jihova?’ Mbalahamu ua tambuijila: ‘Mon’ami, Jihova muéne ua-nda ki bhana.’

Kioso kia bhixila ku mulundu, ene a tungu o kalatódiu. Mu kiki, Mbalahamu ua kutu o maku ni inama ia Izake, iú ua mu tula ku thandu dia kalatódiu.

Mbalahamu anga u kuata o phoko. Mu kithangana kienhókio, uívua o anju ia Jihova tundé ku diulu ixi: ‘Mbalahamu! Kana kujibha o mona! Kindala ngejiia kuila eie uala ni kixikanu kua Nzambi, mukonda kua ditunu ku satela mon’é.’ Mu kiki Mbalahamu ua mono ndumbe ia mbudi ia naminina o jingela mu isasa ia muxi. Muene u kuata o kambudi anga u ka satela bhu kididi kia Izake.

Tundé mu kizuua kienhókio, Mbalahamu ua kituka kamba dia Jihova. Uejiia se mukonda diahi? Mukonda Mbalahamu né muene sé kutendela kiambote o kitumu kia Jihova, ua belesela.

Mu kiki, Jihova ua bhitulula dingi o kikanenu kia bhangele kua Mbalahamu: ‘Nga-nda ku ku besoala kiavulu, ua-nda kala ni muiji ua dikota.’ Kiki ki lombolola kuila, Jihova ueji besoala o athu a uabha bhu kaxi ka muiji ua Mbalahamu.