Balaka Phala Kubheza-mu Nzambi

Kioso Mozé kia kexile ku Mulundu ua Sinai, Jihova ua mu tangela phala kutunga kididi kia katunda a kixana balaka, phala akua Izalaiele kubheza-mu Nzambi. Ene eji tena kuambata o balaka íii mu ididi ioso-ioso mueji ditela.

Jihova uambe: ‘Tangela o mundu phala kubheka ioso iala na-iu phala kukuatekesa mu kutunga o balaka.’ Akua Izalaiele a bhana ulu, phalata, matádi a ngôndo, ni jingoji ja uabha. A bhana ua ndemba ja jihombo, linhu ia fina, ibha ia jimbudi ni ima ia mukuá dingi. Ene akexile mu bheka ima iavulu, mu kiki Mozé ua a tangela: ‘Kuabhu kiá! Kanenu kubheka dingi ima.’

Athu avulu ni uhete, mala ni ahatu, a kuatekesa mu kutunga o balaka. Jihova ua a bhana unjimu phala kubhanga kiambote o kikalakalu. Amoxi akexile mu tunga milele ni kubhanga jilenda. Amukuá akexile mu bhanga ima iavulu ni matádi a uabha ni mabaia.

O mundu ua tungu o balaka kála kiandalele Jihova. Ene a bhange kulutina phala kuuana o balaka mu mbandu jiiadi, o Kididi-Kikôla ni Kididi-Kikôla-Kinene. Mu Kididi Kikôla Kinene, mua kexile o álaka ia kikutu, a i bhangele ni mabaia a akásia ni ulu. O mu Kididi-Kikôla mua kexile jikandeia ja ulu, meza ni kalatódio phala kuoha-mu o uasu ua dizumba. Mu kithádi mua kexile mbasiia ia ngóndo ni kalatódio ka dikota. O álaka ia kikutu ia kexile mu lembalesa akua Izalaiele o kikanenu kiâ kia kubelesela Jihova. Eie uejiia se kikutu ihi? Kikanenu kia katunda.

Jihova ua solo Alá ni an’ê phala kubhanga o kikalakalu kia ukunji mu balaka. Ene a tokalele ku i tambula konda, ni kubhana-mu jisata phala Jihova. O mukunji ua dikota, Alá, muéne ngó ua tokalele kubokona mu Kididi-Kikôla-Kinene. Muene ua kexile mu bhanga kiki, lumoxi ku muvu phala kubhana sata ia muloloki ua ituxi iê, ia muiji uê ni ia mundu uoso ua Izalaiele.

Akua Izalaiele a zubha kutunga o balaka mu kubhita muvu umoxi ni kaxaxi kioso kia tundile mu Ijitu. Kindala ene akexile kia ni kididi phala kubheza Jihova.

Jihova uezalesa o balaka ni fuma iê, o ku thandu dia balaka kua moneka dituta. Kioso o dituta ki di kala ku thandu dia balaka, akua Izalaiele ka katukile. Maji kioso o dituta ki di zanguka, ene ejiidile kuila kiexile kithangana kia kuenda. A kexile mu sokomona o balaka mu jimbandu-jimbandu ni kukaiela o dituta.