Ene a Bhukumukina Jihova

Mu kubhita thembu, kioso akua Izalaiele kia kexile hanji mu kikangalakata, Kolá, Datane ni Abilamu kumoxi ni 250 a athu a mukuá a bhukumukina Mozé. Ene a mu tangela: ‘Mua tu kumu kiá! Mukonda diahi eie u tu kalela ku pholo, o Alá u kala mukunji ua dikota? Jihova uala n’etu oso, kalé ngó n’eie ni Alá.’ Jihova ka sangulukile ni ukexilu uâ. Phala Jihova, ene akexile mu bhukumukina muene!

Mozé ua tangela Kolá ni akuatekexi’ê, uixi: ‘Mungu zenu mu balaka, zenu ni itutu ia kuambatela-mu túbhia, iezala ni uasu ua dizumba. Jihova ua-nda lombuesa se nanhi a mu solo kua muene.’

Mu kukia, Kolá ni 250 a mala ai phala kudisanga ni Mozé mu balaka. Kuenhoko ene a te mu túbhia o uasu ua dizumba, kala akunji. Jihova ua tangela Mozé ni Alá, uixi: ‘Tundenu mu kaxi ka Kolá ni kifuxi kiê.’

Sumbala Kolá uendele ku balaka phala kudisanga ni Mozé, maji Datane ni Abilamu ni miji iâ, a ditunine kuia-ku. Jihova ua tangela akua Izalaiele phala kutunda mu kaxi ka jibalaka ja Kolá, Datane ni Abilamu. Ni lusolo luoso, akua Izalaiele a tundu. Datane, Abilamu ni miji iâ emanene bhu mbandu ia mukuá ia jibalaka. Bhenhobho o mavu a mateka o kutunguta, a jikuka ia a a minha enoso! Ku thandu dia balaka kua tuluka túbhia tu tua jokotesa Kolá ni kifuxi kiê kia 250 a mala.

Jihova anga u tangela Mozé: ‘Kala mutuameni ua muiji, mu tambule o mbangala iê, u soneka-ku o dijina diê. Maji ku mbangala ia muiji ua Levi, soneka-ku o dijina dia Alá. Mbangala joso u ji ta mu balaka, o mbangala ia ió u nga mu solo, ia-nda bhana ithulu.’

Mu kizuua kia kaiela, Mozé ua bheka o jimbangala joso iu ua ji londekesa ku atuameni. O mbangala ia Alá ia sabhukile ithulu, ia kexile jiamendua. Kienhiki, Jihova ua londekesa kuila muene ua solele Alá phala kukala mukunji ua dikota.