Ngidiione u Tolola Akua Midiiana

Mu kubhita kithangana, akua Izalaiele a xisa o ubhezelu ua Jihova anga a mateka dingi kubheza jinzambi ja makutu. Ku sambuadi dia mivu, akua Midiiana a nhana o iama ni kudia kua akua Izalaiele. Phala kulenga akua Midiiana, akua Izalaiele akexile mu di sueka mu mabanda ni mu milundu. Ene a diondela Jihova phala kua bhulula. Mu kienhiki, Jihova ua tumikisa anju ku munzangala a mu ixana Ngidiione. O anju uambe: ‘Jihova ua ku solo eie, u diiala dia nguzu.’ Ngidiione uebhuidisa: ‘Kiebhi ki ngi tena kubhulula Izalaiele? Eme ki ngala ni kima.’

Kiebhi Ngidiione kieji kuijiia kuila, Jihova ua mu solele phala kubhulula akua Izalaiele? Muene ua te bhoxi o ndemba ia mbudi anga uambe kua Jihova: ‘Mu kimenemene, se dimume di kala ku ndemba, anga bhoxi bhuoso bhu kukuta, nga-nda kuijiia kuila, eie ua mesena kuila ngi bhulula akua Izalaiele.’ Mu kimenemene, o ndemba iexile ni dimume, maji bhoxi bhua kukutile muene! Anga, Ngidiione ua bhingi kuila kuma ki kukia, o ndemba i kukuta maji bhoxi bhu kala dimume. Kioso kia bhiti kiki, Ngidiione ua xikinine kuila, Jihova ua mu solele phala kubhulula akua Izalaiele. Muene ua bhongolola o masoladi mê phala kubhânga ni akua Midiiana.

Jihova uambela Ngidiione: ‘Nga-nda bhana o kikoue ku akua Izalaiele. Kuma eie uala ni masoladi avulu, ua-nda banza kuila, ua tolola o ita mu nguzu ié. Tangela ió ala ni uoma phala kuvutuka kubhata.’ Mu kienhiki 22.000 a masoladi a vutuka kubhata, anga kuxala 10.000. Mu kusuluka Jihova ua muambela: ‘Kua subhuka hanji masoladi avulu. Ua ambata katé bhu ngiji, u a tangela phala kunua o menha. U xala ngó ni masoladi a tena kumona o jinguma kioso kiaia ni kunua o menha.’ Hâma jitatu ngó ja masoladi a dimukine kioso kia kexile munua. Jihova ua kanena kuila, ene ngó eji tolola o 135.000 a masoladi akua Midiiana.

Mu usuku uenhó, Jihova ua tangela Ngidiione: ‘Kindala kiene o kithangana kia tokala phala kubuikisa akua Midiiana!’ Ngidiione ua bhana jimbungu ku masoladi mê ni makongolo a túbhia. Muene ua tangela: ‘Ngi talesienu, bhangenu jinga kala ki nga mu bhanga.’ Ngidiione ua xiki o mbungu iê, o mbinda iê ia budika, ua kuata dikongolo diê anga ua dikola: ‘Ku xibhata ia Jihova ni ia Ngidiione!’ O 300 kiene ué kia bhange. O akua Midiiana uôma ua a kuatele anga ai ni kulenga. Mukonda dia kiki, a mateka ku di jibha mudiâ. Jihova ua kuatekesa dingi akua Izalaiele kutolola o jinguma jâ.