Jihova u Zuela ni Samuuele

O Mukunji ua Dikota Eli ua kexile ni tuana tuiadi, a kexile mu kalakala mu balaka ia kutakanena, kala akunji. O majina mâ exile Hofini ni Finehase. Ene ka kexile mu belesela o itumu ia Jihova, akexile mu talatala kiaiibha o athu. Kioso o akua Izalaiele kia kexile mu bhana o jisata kua Jihova, Hofini ni Finehase a kexile mu katula o xitu iambote phala ene. Eli uejidile o ima iaiibha ia kexile mu bhanga o tuana tuê, maji ka bhange kima. O kuila Jihova ueji kuehela o ukexilu iú uaiibha?

Né muene Samuuele uexile hanji mona ndenge, maji muéne ka kaiela o phangu ia Hofini ni Finehase. Jihova ua sangulukile ni ukexilu ua Samuuele. Saí kizuua kioso Samuuele kia kexile mu zeka, muéne uevu dizuí dia muthu ua kexile mu muixana. Muéne ua balumuka, iú uai katé kua Eli uixi: ‘Eme bhabha!’ Maji Eli uixi: ‘Eme ki nga ku i xana kana. Ndé ua zeke.’ Samuuele ua vutuka mu zeka. Anga uivua dingi dizuí dia mukuá. Kioso Samuuele kievu o dizuí, mu veji ia katatu, Eli uejidile kuila, Jihova ua kexile mu kuixana Samuuele. Muéne uambela Samuuele kuila se uívua dingi o dizuí zuela kiki: ‘Eme bhabha Jihova. Selevende iê iú uívua.’

Samuuele ua vutuka dingi mu zeka. Anga uivua dingi dizuí: ‘Samuuele! Samuuele!’ Muéne ua tambuijila: ‘Zuela ngana, selevende ié iú uivua.’ Jihova ua muambela uixi: ‘Tangela Eli kuila, eme nga-nda fundisa muéne ni muiji uê. Muéne uejiia kuila o tuana tuê tua mu bhanga ima iavulu iaiibha, maji muéne ka mua bazela.’ Mu kamenemene, Samuuele ua jikula o mabhitu a balaka ia kutakanena, kala kia kexile kia mu bhanga jinga. Muéne ua kexile ni uôma ua kuzuela ku mukunji ua dikota, o maka a mu tangele Jihova. Maji Eli ua muixana, iú ua muibhuidisa: ‘Mon’ami, ihi ia ku tangela Jihova? Ngi tangele o maka oso.’ Samuuele anga u tangela o maka moso kua Eli.

Kioso Samuuele kia kexile mu kula, Jihova ua kexile mu mu kuatekesa. Mu ixi ioso ia akua Izalaiele o athu ejiidile kuila, Jihova ua solele Samuuele phala kukala polofeta ni mufundixi.