Jihova u Bhana Nguzu Kua Sansau

Athu avulu mu Izalaiele a vutukile dingi mu kubheza iteka, mu kienhiki, Jihova uehela akua Fidíxia kutambula o ixi iâ. Maji mu Izalaiele muexile athu a zolele Jihova. Kála o diiala a mu ixana Manoua. Muéne ni muhatu uê ka kexile ni tuana. Saí kizuua, Jihova ua tumikisa anju kua muhatu ua Manoua. O anju ua muambela uixi: ‘Eie ua-nda vuala mona. Muéne ua-nda bhulula Izalaiele bhu maku a akua Fidíxia. Muéne ua-nda kala Nazilé.’ O kuila uejiia se a nanhi exile o Jinazilé? Ene exile jiselevende ja katunda ja Jihova. O Jinazilé ka tokalele kubhuta o ndemba iâ.

Mu kubhita kithangana, Manoua ua vuala mona, ua mu luku o dijina dia Sansau. Kioso Sansau kia kulu, Jihova ua mu bhanene nguzu iavulu. Muene ua tenene kujibha hoji ni maku mê. Saí kizuua, Sansau ua jibhile 30 a masoladi akua Fidíxia ubheka uê. O akua Fidíxia a mu zembele kiavulu, a kexile mu sota ndunge phala ku mu jibha. Kioso Sansau kia kexile mu zeka mu mbanza ia Ngaza, o masoladi akua Fidíxia ai katé bhu muelu ua mbanza íii, ia a mu kingila phala ku mu jibha mu kimenemene. Maji bhu kaxi ka usuku, Sansau ua balumuka, iu uai katé bhu dibhitu dia mbanza, anga ua di takula bhu muelu. Muene uambata o dibhitu bhu isuxi iê katé ku thandu’a mulundu bhua zukamene ku Hebolone!

Mu kubhita thembu, akua Fidíxia ai katé kua saí ia Sansau, Dalila, anga a muambela exi: ‘Tua-nda ku bhana midi ni hama ia itadi ia phalata se eie u tu tangela kuebhi ku tunda o nguzu ia Sansau. Tua mesena ku mu kuata ni ku mu takula mu kaleia.’ Kuma Dalila ua mesenene kitadi, ua xikina. Kia dianga Sansau ka xikina ku mu tangela se mukonda diahi ua kexile ni nguzu iavulu. Maji Dalila ua mu jijidika katé kia mu tangela o kikutu kiê. Muéne uambela Dalila: ‘Nuka a ngi bhutile o ndemba, mukonda ngi Nazilé. Se a ngi bhuta o ndemba, nguzu ibhua.’ Sansau ua luezele kiavulu mu ku mu tangela o kikutu kiê, ki kiene?

Ni lusolo, Dalila ua tangela akua Fidíxia uixi: ‘Ngejiia kiá o kikutu kiê!’ Muéne ua bhangesa Sansau kuzeka mu jihata jê, anga ua tumina muthu kubhuta o ndemba ia Sansau. Dalila ua dikola: ‘Sansau, akua Fidíxia ala bhabha!’ Kioso Sansau kia balumuka ku kilu, o nguzu iabhuile kiá. Akua Fidíxia a mu kutu, a mu tubula o mesu, anga a mu te mu kaleia.

Sai kizuua, athu avulu akua Fidíxia a di bundu kumoxi mu tembulu ia nzambi iâ, a mu ixana Dangoni, akexile mu dikola: ‘O nzambi ietu ua tu bhakula Sansau! Katulenu Sansau bhu kanga! Phala tu tonoke n’ê.’ Ene a mu imanesa bhu kaxi ka philadi jiiadi, anga aia ni ku mu tobhesa. Sansau ua dikola: ‘Ngana iami Jihova, tata, nga ku dióndo, ngi bhane dingi nguzu.’ Kuma o ndemba ia Sansau ia kudile dingi, muéne ua lundula o jiphiladi ni nguzu iê ioso. O sábhalalu ioso ia lundumuka, mu kienhiki, athu oso a kexile mu tembulu afu.