O Sobha ia Dianga ia Izalaiele

Jihova ua bhanene afundixi kua akua Izalaiele phala kua endesa, maji ene a ditunine a mesenene sobha. Ene a tangela Samuuele, exi: ‘Ifuxi ioso mu’axaxi ketu ala ni jisobha. Tua-ndala ué sobha.’ Samuuele ua mono kuila kiokio kiexile kima kiaiibha, mu kiki ua sambe kua Jihova. Jihova ua mu tangela, uixi: ‘O mundu ki ua mu dituna eie kana. A mu dituna eme. U a tangela kuila, a-nda kala ni sobha, maji o sobha íii ia-nda ku a bhinga ima iavulu.’ Né kiki o mundu ua vutuila: ‘Sé-ku maka. Né kiki, tua-ndala muene sobha!’

Jihova ua tangela Samuuele kuila, o diiala ni dijina dia Saulu muéne ueji kala o sobha ia dianga. Kioso Saulu kiendele mu menekena Samuuele mu mbanza ia Lama, Samuuele ua undu Saulu kala sobha mu ku mu ta máji ku mutué.

Mu kubhita thembu, Samuuele uexana o mundu uoso ua Izalaiele phala kua londekesa o sobha iâ. Maji ene ka tenene kumona Saulu. Uejiia se mukonda diahi? Mukonda muéne ua disuekele kuema dia imbamba. Kioso kia sange Saulu, ene a mu bheka ia a muimanesa bhu kaxi ka mundu uoso. Ku athu oso, Saulu ua betele mu kulebha ni kuuabha o pholo. Samuuele uambe: ‘Talenu o muthu a mu solo kuala Jihova.’ O mundu ua dikola, uixi: ‘Sobha, a kole muenhu!’

Ku dimatekenu, Sobha Saulu ua kexile mu kuivua Samuuele ni kubelesela Jihova. Maji mu kubhita thembu, muéne ua lunguluka. Mu kifika, o sobha ka tokalele kuoha o jisata. Saí kithangana, Samuuele ua tangela Saulu phala ku mu kingila katé kieji kuiza, maji Samuuele ua lalekele o kubhixila. Mu kiki, Saulu muéne uoha o sata ubheka ué. Kiebhi kia divu Samuuele? Muéne ua mu tangela: ‘Eie ku tokalele kubhukumukina Jihova.’ O kuila Saulu ua katula phangu mu kituxi kia tele?

Mu kubhita thembu, kioso Saulu kiendele mu bhânga ni akua Amaleke, Samuuele ua tangele Saulu phala kubuikisa o ima ioso. Maji Saulu ka buikisa Sobha Akake. Jihova ua tangela Samuuele: ‘Saulu ua ngi bhana dikunda, ka mu ngi belesela.’ Samuuele ua luualele kiavulu, ua tangela Saulu: ‘Mukonda eie ku belesela Jihova, muéne ua-nda sola sobha iéngi.’ Kioso Samuuele kia kexile mu kuenda, Saulu ua mu kuata ku ponda ia divunga, anga di tanduka. Samuuele ua tangela Saulu: ‘Lelu, Jihova ua tandula o utuminu uê.’ Jihova ueji bhana o utuminu ku muthu uengi ueji mu zola ni ku mu belesela.