Tembulu Phala Jihova

Kioso Solomá kia kituka sobha ia Izalaiele, Jihova ua mu ibhudisa: ‘Ihi i ua mesena kuila ngi kubhana?’ Solomá ua tambuijila: ‘Eme ngi munzangala hanji, ki ngejiia i nga tokala kubhanga. Nga ku diondo ngi bhane unjimu phala kulanga o mundu ué.’ Jihova uambe: ‘Kuma ua bhingi unjimu, eme nga-nda ku bhanga o muthu ua beta-o-kota mu unjimu mu ixi ioso. Nga-nda ku bhana ué umvuama uavulu. Se u ngi belesela, ua-nda kola o muenhu.’

Solomá ua mateka o kutunga o tembulu. Muéne ua kexile mu kalakala ni ulu, phalata, mabaia, ni mátadi a kexile ni valolo iavulu. Jimidi ja maiala ni ahatu a kexile ni uhete, a kalakala mu kutunga o tembulu. Mu kubhita sambuadi dia mivu, o tembulu ia kexile kiá polondo phala ku i bhakula kua Jihova. Kua kexile kalatódio, mua kexile jisata javulu. Solomá ua fukama bhu pholo ia kalatódio anga u samba: ‘Jihova tembulu íii ki ia fuama kiavulu phal’eie, maji tua ku diondo xikina o ubhezelu uetu, ni kuivua o misambu ietu.’ Kiebhi Jihova kia monene o tembulu, ni musambu ua bhangele Solomá? Kioso Solomá kia zubha kubhanga o musambu uê, o túbhia tua tundu ku diulu, anga tu jokotesa o jisata joso ja kexile bhu kalatódio. Kiki kia londekesele kuila, Jihova ua xikinine o tembulu. Kioso akua Izalaiele kia mono kiki, ene a sangulukile kiavulu.

Sobha Solomá a muijidile kiambote mu Izalaiele ioso, ni mu jixi ja mukuá mukonda dia unjimu uê. Athu avulu a kexile muia kua Solomá phala kua kuatekesa kubatula o maka mâ. Katé muene ni nvuale ia Saba, uendele phala kulola o unjimu ua Solomá ni ku mu bhanga ibhuidisu ia bhonzo. Kioso o nvuale kievu o itambujilu iê, muéne uambe: ‘Ki nga xikinine mu ima ia kexile mu ngi tangela o athu, maji mu kindala ngejiia kiá kuila, eie mbé o unjimu ué ua beta o kota u nga kexile mu kuivua ndenge. O Nzambi ié Jihova, uene mu ku besoala.’ Akua Izalaiele akexile ni muenhu uambote, o mundu ua sangulukile kiavulu. Maji o ima ieji lunguluka.