Polova ku Mulundu ua Karmelo

O utuminu ua dikuinhi dia ifuxi dia Izalaiele, ua kexile ni jisobha javulu ja iibha, maji katé mu kithangana kienhókio, Akabe ua tundile mu kuiibha. Muéne ua kazala ni muhatu uaiibha kiavulu, ua kexile mu bheza Bahale. Dijina diê Jezabele. Akabe ni Jezabele, a zalesele o ixi ni ubhezelu ua Bahale, ia a kexile mu jibha o jipolofeta ja Jihova. Ihi ia bhangele Jihova? Muéne ua tumikisa o polofeta iê Elija, phala kuambata njimbu kua Akabe.

Elija ua tangela Sobha Akabe kuila, mukonda dia ima iaiibha ia kexile mu bhanga, mu ixi ioso ia Izalaiele ki mueji noka mvula. Mu mivu itatu, mu ixi ki mu sabhukile idima, kiki kia bheka nzala iavulu ku athu. Mu kubhita kithangana, Jihova ua tumikisa dingi Elija kua Akabe. O sobha ua zuela: ‘Eie u mukua maka! Ioso íii mukonda di’eie.’ Elija ua mu vutuila: ‘K’eme nga bheka o kixibhu kiki. Eie muene ua ki bheka, mukonda dia kubheza Bahale. Zá tu bhange polova. Bhongolola o mundu uoso, ni jipolofeta ja Bahale ku thandu dia Mulundu ua Karmelo.’

Mundu uoso anga a di bhongolola ku mulundu. Elija uambe: ‘Tonenu o mesu. Se Jihova muéne o Nzambi ia kidi, mu kaielienu. Maji se Bahale, mu kaielienu. Tu bhange kiki. O 450 a jipolofeta ja Bahale, a sokejeka sata anga a dikola ku nzambi iâ, eme nga-nda sokejeka ue sata anga ngi dikola ué kua Nzambi iami Jihova. Uoso ua-nda tambuijila ni túbhia, ió muene o Nzambi ia kidi.’ Mundu uoso anga u xikina.

O jipolofeta ja Bahale ja sokejeka o sata. Kizuua kioso kia muvimba, a dikola kua nzambi iâ: ‘Bahale tata, tu tambuijile!’ Kuma Bahale ka kexile mua tambuijila, Elija ua kexile mua tobhesa. Muéne uambe: ‘Kota se mua dikola dingi. Nange ola íii ua mu zeka kilu kiê, kubhinga muthu phala ku mu balumuna.’ Usuku ua bhixila, o jipolofeta ja Bahale, a sulukile hanji ni kudikola. Maji ki ku kexile muthu phala kua tambuijila.

Elija ua tula o sata iê bhu kalatódio, anga ua lundula menha ku thandu dia kalatódio. Muéne anga u samba: ‘Jihova tata nga ku diondo, ejidisa o mundu kuila eie u Nzambi ia kidi.’ Mu kithangana kienhokio, Jihova ua tumikisa túbhia tunde ku diulu, phala ku jokotesa o sata. O mundu uoso anga u dikola ni dizuí dia suína: ‘Jihova muéne o Nzambi ia kidi!’ Elija uambe: ‘Kanenu kueha o jipolofeta ja Bahale kulenga!’ Mu kizuua kienhokio 450 a jipolofeta ja Bahale a a jibha.

Kioso ki kua kexile mu moneka kadituta ku thandu dia kalunga, Elija ua tangela Akabe: ‘Nga mu kuivua kiá kinuminu kia mvula. Banda mu dikalu, uie kubhata dié.’ O diulu dia xiketele ni matuta, o kitembu kia bhusu, anga o mvula ia dikota ia mateka kunoka. Mu kusukaku, o kixibhu kiabhu, Akabe ua kexile mu kuendesa ni lusolo-luoso, o dikalu diê. Ni kikuatekesu kia Jihova, Elija ua xisa Akabe ni dikalu diê ku dima! Maji o kuila o maka oso a kexile na-u Elija a bhu kiá? Tu mone.