Jihova u Suínisa Elija

Jezabele uevu o ima ia bhitile ni jipolofeta ja Bahale, anga njinda ia mu kuata. Muéne ua tumikisa njimbu kua Elija: ‘Mungu, eie ua-nda fua kála kiafu o jipolofeta ja Bahale.’ Elija uexile ni uôma, iu ua lengela mu kikangalakata. Muéne ua sambe: ‘Jihova, muenhu ua ngi kumu kiá. Sembele ngi fue kiá.’ Ni kubhuila, Elija ua zeka bhoxi dia muxi.

Sai anju ua mu zambesa: ‘Fundumuka, u dié.’ Elija ua mono o mbolo ia tema bhu mátadi, ni disanga dia menha. Muéne ua di, ua nu, anga u zeka dingi. O anju ua mu balumuna dingi, anga ua muambela: ‘Dia dingi. Eie ua bhingi nguzu, mukonda dia njila ia lebha i ua-nda kuenda.’ Mu kienhiki, Elija ua di dingi. Elija ua bhixila katé ku Mulundu ua Holebe, muéne uende 40 a izuua ni 40 a usuku. Kuenhoko, Elija ua bokona mu dibánda iu ua zeka. Maji Jihova ua zuela n’ê. Muéne ua mu ibhuidisa: ‘Elija, ihi i ua mu bhanga bhabha?’ Elija ua tambuijila: ‘Akua Izalaiele ka mu kumbidila o kikanenu kiâ, kia bhangele. Ene a bulu o jikalatódio jé, ia a jibha o jipolofeta jé. Kindala, a mesena ku ngi jibha.’

Jihova ua mu tangela: ‘Tunda bhabha, emana hanji ku mulundu.’ Kia dianga, kitembu kia dikota kia bhusu ku dibánda. Ixi ia tunguta, anga kukaiela o túbhia. Mu kusuka-ku, Elija uevu dizui dia tululuka, dia lenduka. Muéne ua futu o pholo ni divunga diê, iu uemana bhu kanga dia dibánda. Anga Jihova ua mu ibhuidisa se mukonda diahi muéne ua lengele. Ejila ua tambuijila: ‘Eme ngó, nga subhuka.’ Maji Jihova ua mu tangela: ‘Ki uala ubheka. Ngala hanji 7.000 dia athu mu Izalaiele ene mu ngi bheza. Ndé, sola Ilizeu kála polofeta bhu kididi kié.’ Ni lusolo luoso, Elija uai mu bhanga o kima kia mu tumine Jihova. O kuila, u xikina kuma, Jihova ua-nda ku kuatekesa ué, se u bhanga kima kia mesena muéne kokué? Kiene, muéne ua-nda ku kuatekesa. Tu di longe hanji o ima ia bhitile mu kithangana kia kixibhu.