O Kifuxi Kionene Kia Jihova

O sobha ia Sídia, Benehadade, ua kolokota mu kubhânga ni akua Izalaiele. Maji polofeta Ilizeu ua dimuna o sobha ia Izalaiele ithangana ioso, iu ua lengele. Kienhiki, Benehadade ua banze kukuta ni kuambata Ilizeu mu ixi iê. Ueza mu kuijiia kuila Ilizeu ua kexile mu mbanza ia Dotane, mu kiki ua tumikisa o masoladi akua Sídia kuia mu kuta Ilizeu.

Akua Sídia a bhixila mu mbanza ia Dotane mu usuku. Mu kizuua kia mukuá kioso ki kuaki, o selevende ia Ilizeu uai bhu kanga iu ua mono kuila o mbanza a i kondolokele ku kifuxi kia dikota. Uôma ua mu kuata, iu ua dikola: ‘Ilizeu, ihi i tua-nda bhanga?’ Ilizeu ua mu tangela: ‘O ala n’etu a beta o kuvula, o ala ni ene ndenge.’ Bhenhobho, Jihova ua bhangesa selevende ia Ilizeu kumona kuila o milundu ioso mua’xaxi ka mbanza iezalele ni jikabalu javulu ja túbhia ni makalu a ita.

Kioso o masoladi akua Sídia kia mesenene kukuta Ilizeu, muéne ua sambe: ‘Jihova, nga ku dióndo, ta-u mua vundu.’ Bhenhobho, sumbala a tenene hanji kumona, o masoladi kejidile kuoso kua kexile. Ilizeu ua tangela o masoladi uixi: ‘Enu muala mbonge iengi. Ngi kaielienu, phala ku mi londekesa o muthu u mua mu sota.’ Ene a kaiela Ilizeu katé mu mbanza ia Samádia, mua tungile o sobha ia Izalaiele.

Kua bhitile kiá ithangana iavulu, kiene ngó akua Sídia kieza mu kuijiia kuoso kua kexile. O sobha ia Izalaiele uebhuidisa Ilizeu: ‘Ng’a jibha kiá?’ O kuila Ilizeu ua banzele kuila kiki kithangana kiambote phala kujibha ió a mesenene ku mu bhanga kiaiibha? Kana. Ilizeu ua tambuijila: ‘Kana kua jibha. U a bhana kia kudia anga u a vutukisa mu njila iejila.’ Mu kiki, o sobha ua a bhana kia kudia iu ua a tumikisa kubhata diâ.