Joziia ua Zolele o Itumu ia Nzambi

Joziia ua kituka sobha ia ixi ia Judá kioso kia kexile ni dinake dia mivu. Mu izuua ióio, o mundu ua kexile mu bhanga ima ia uanga ni kubheza iteka. Kioso Joziia kia kexile ni 16 ia mivu, muéne ua soto kulonga o athu kiebhi kia tokalele kubheza Jihova. Kioso kia tenesa 20 a mivu, muéne ua mateka kubuikisa o iteka ni jikalatódio mu ixi ioso. O kioso Joziia kia tenesa 26 ia mivu, muéne ua bhange ioso phala kutungulula o tembulu ia Jihova.

Mu tembulu, o mukunji ua dikota, Hilikiia, ua sange o mikanda mua kexile o Kitumu kia Jihova, nange iene o mikanda ia sonekene Mozé. O seketa ia sobha, Safane ua bheka o mikanda kua Joziia iu ua mateka o kutanga o Kitumu mu dízui dia suína. Kioso Joziia kia kexile mu kuivua o kitangelu, muene ueza mu kuijiia kuila mbé o mundu ua bhukumukine kiá Jihova mu mivu iavulu. Sobha Joziia ua tangela Hilikiia, uixi: ‘Jihova ua dizangala kiavulu n’etu. Ndé mu zuela ni muéne. Jihova ua-nda tu tangela ihi i tua tokala o kubhanga.’ Jihova bhu kaxi ka polofeta ia muhatu, Hulda, ua tambuijila, uixi: ‘O mundu ua Judá ua ngi bhana dikunda. Nga-nda ku a kaxtikala maji kana mu kithangana kia sobha Joziia mukonda muéne ua lenduka.’

Kioso Sobha Joziia kievu o njimbu, uai mu tembulu, iu ua tumu kuixana o mundu ua Judá. Muéne ua tange ni dízui dia suína o Kitumu kia Jihova phala mundu uoso kuivua. Joziia ni mundu uoso ua kanena kubelesela Jihova ni muxima uâ uoso.

Mu mivu iavulu, o mundu ua Judá ka bhangele o fesa ia Phasu. Maji kioso Joziia kia kexile mu tanga o Kitumu kia kuila o fesa ia Phasu a tokalele ku i bhanga mu mivu ioso, muéne ua tangela o mundu: ‘Tua-nda bhanga o fesa ia Phasu phala Jihova.’ Joziia ua sokejeka o ima, phala kubhana jisata javulu. Ua bhange ue ioso phala mu tembulu mu kala jingimbidi. O mundu anga u bhanga o fesa ia Phasu, anga a bhange ue o Fesa ia Jimbolo sé Felemendu mu sambuadi dia izuua. Tundé mu izuua ia Samuuele nuka a bhangele fesa ia Phasu kála ióio. Mu kidi, Joziia ua zolele kiavulu o Kitumu kia Nzambi. O kuila eie ua uabhela kudilonga o Mak’â Jihova?