Jezú u Moneka ku Atambi

Mu ku bhita kithangana, Jezú ua tukulukila o jipoxolo. Phetele uai mu tamba mu Kalunga ka Ngalileia. Tomé, Tiiaku, Nzuá ni maxibulu a mukuá, ai ni muene. A tambe usuku uoso, maji ka kuata kima.

Mu kimenemene, a mono diala uemana ku ndundu. Muene ua ebhuidisa: “Mua kuata kama koso-koso?” Ene atambuijila: “Kana!” O diala diambe: ‘Takulenu o uanda ku mbandu ia kadilu ia bote.’ Kioso kia bhange kiki, o uanda uezala ni jimbiji, ka tenene ku u sunga. Nzuá ua mono kuila, o diiala diódio diexile Jezú, iú uambe: “Ió Ngana Jezú!” Sé kulaleka, Phetele ua di takula mu menha, iú ua zouo katé ku ndundu. O maxibulu a mukuá a mu kaiela ni bote.

Kioso kia kexile mu bhixila ku ndundu, a mono makala ma uama, ni mbiji íi’adi zuza, ni mbolo. Jezú ua a bhingi, phala kubheka jimbiji ja kuatele, phala kubandekesa o kudia. Mu ku suluka, muene uambe: ‘Zenu mu die.’

Kia zubha kudia, Jezú uebhula Phetele: ‘Eie ua ngi zolo o ku tamba ndenge?’ Phetele uixi: ‘Xé, Ngana. Eie ua k’ijiia, kuma nga ku zolo.’ Jezú uambe: ‘Langa o tumbudi tuami.’ Jezú ua mu ibhuidisa dingi: ‘Phetele, eie ua ngi zolo?’ Phetele uixi: ‘Eue, Ngana. Eie ua k’ijiia kuma nga ku zolo.’ Jezú uambe: ‘Langa jimbudi jami.’ Jezú u mu ibhula lua katatu. Phetele ua luualele kiavulu. Muene uambe: “Ngana, eie uejiia ima ioso, ua k’ijiia kuma eme nga ku zola!” Jezú ua mu tangela: “Disa jimbudi jami.” Mu ku suluka, ua tangela Phetele: ‘suluka ni ku ngi kaiela.’