KUKUNDA DINGI O MUTHU
DISÁ 7
Kolokota, Kana Kubhwila
Kitumu: “Asulukile ni kulonga ni kuboka o njimbu yambote.”—Ikalakalu 5:42.
Ihi Yabhange Phawulu
1. Tala o VIDYU, mba tanga Ikalakalu 19:8-10. Mukusuluka xinganeka ku ibhwidisu yiyi:
Muveji ya kubhwila mukonda dya kumuzukutisa, kyebhi Phawulu kyakolokota mu kukwatekesa yó amesenene kwivwa o njimbu?
Mu ithangana yavulu, kyebhi Phawulu kyakexile mu vutuka phala kulonga yó amesenene? Mwene wasuluka mu kubhanga kiki mu mivu ikuxi?
Kima Kyahi Kitulonga o Phangu ya Phawulu?
2. Twabhingi kungastala kithangana ni kubhanga nguzu phala kuvutuka kukunda dingi o muthu ni kumateka kudilonga-ne o Bibidya.
Kayela Phawulu
3. Vutuka mu kunda o muthu mu kithangana kyawabhela o muthu. Dibhwidise kiki: ‘Kizuwa kyahi ni kwebhi kungatokala kudikunda-ne dingi? Kizuwa kyahi ni kwebhi mwene wandamesena kudikunda dingi n’eme?’ Mukunde dingi ne mwene se o muthu usola kithangana kya bhonzo phala eye.
4. Mwibhule se kizuwa kyahi kimutena dingi o kudisanga. Veji joso ki uzubha kuzwela-ne, bakanenu o ola imutena o kudikunda dingi. Bhanga yoso phala mu disange mu kididi ni mu ola yatange mwene.
5. Dyelela jinga. Se muthu ubhonza kumusanga kubhata, mba ola joso umusanga wamukalakala, kana kubanza kya kwila muthu yú kamesena kwivwa o maka ma Nzambi. (1 Ko. 13:4, 7) Mu veji dya kiki, kolokota mu kumusota, maji kana we kuzanga o kithangana kyé.—1 Ko. 9:26.