Dielela Kua Jihova Mukonda O Dizubhilu Dia Zukama

“Dielelenu Jihova mu thembu joso.”—IZA. 26:4.

1. Ihi ki i difu mu kaxi ka jiselevende ja Nzambi, ni athu ku mundu?

KU MUNDU IÚ, athu kejiia dingi se a-nda dielela kua nanhi, mukonda athu enhá, ene mu a nganala kiavulu. Maji kiki, ki kiene mu bhita ni jiselevende ja Jihova! Mukonda a endesa ku unjimu u tunda ku diulu, ene ka dielela ku mundu iú, né ku “jingana mu ngongo.” (Jisá. 146:3) Kienhiki, ene a dielela o mienhu iâ bhu maku ma Jihova, mu kuijiia kuila muéne ua a zolo, ni kuila muéne u kumbidila o Ikanenu iê ioso.—Lom. 3:4; 8:38, 39.

2. Ihi ia zuela Josuué ia lungu ni ku dielela kua Nzambi?

² Mu ku kuka kuê, Josuué ua dielele kua Nzambi. Ande dia kufuá, muéne uambela o jiphange jê akua Izalaiele, kuila: “Enu-phe mua k’ijiia ni muxima uenu uoso, ni muenhu uenu uoso, kuila ima ioso ia mi dielelesele Jihova Nzambi ienu, ki kua sonoka kima; iene ioso ia mi bhiti muene, ki bhuala kizuelu kia sukamena.”—Josu. 23:14.

3. O dijina dia Nzambi, di londekesa ihi ia lungu ni muéne?

³ Jihova ka kumbidila ngó o ikanenu iê, mukonda dia ku zola o jiselevende jê, maji mukonda dia dijina diê. (Mak. 3:14; 1 Sam. 12:22) Ia lungu ni dijina dia Nzambi, The Emphasized Bible a di bhange ku Joseph Bryant Rotherham, diambe: “O kikanenu [kiki] kia bheka kisangusangu kia dikota; Nzambi u tena ku kuatekesa o muthu ku dibhana ni ibhidi, ni ibhindamu i moneka . . . o kikanenu [kiki], . . . dijingunuinu, lembalasa, kikanenu. Nzambi ua-nda kala muthu ua kidi phala o Dijina didi; mukonda dia kiki, Muéne ka-nda kamba ku kumbidila o ikanenu iê ioso.”

4. (a) O divulu dia Izaia 26:4, di tu suínisa ku bhanga ihi? (b) Ihi i tua-nda di longa mu milongi íii?

⁴ Dibhudise: ‘O kuila ngejiia kiambote Jihova, ngene ku mu dielela ni muxima uami uoso? O kuila nga dielela ku ima ia-nda bhita ku hádia mu kuijiia kuila Nzambi, muéne ua tena ioso?’ O divulu dia Izaia 26:4, diambe: “Dielelenu Jihova mu thembu joso; mbata Jihova, Nzambi, ndanji i nangenena.” Tuejiia kuila lelu, Nzambi kene mu bhanga madiuanu phala o jiselevende jê, kála kia bhangele ku jiselevende jê j’ukulu. Maji né kiki muéne “ndanji i nangenena,” muéne a tena ku mu dielela “mu thembu joso.” Kiebhi o Nzambi ietu kiene mu kuatekesa o abhezi’ê lelu? Tua-nda di longa maukexilu atatu: Muéne u tu kuatekesa kioso ki tu mu bhinga kikuatekesu phala ku dibhana ni jitendasá, muéne u tu kuatekesa kioso ki tu sanga athu ka mesena kuívua o maka mê, ni ku tu zukutisa, u tu bhana ué nguzu kioso ki tu kala ni hele. Mu ku di longa o maukexilu iá, xinganeka se kiebhi ki u tena ku suínisa dingi o kidielelu kiê kua Jihova.

Dielela kua Nzambi Kioso Kia ku Tendala o ku Bhanga Ima ia Iibha

5. Ihi i tena ku tu bhonza o ku dielela kua Nzambi?

⁵ Tua dielela kua Jihova kuila muéne ua-nda kumbidila o kikanenu kiê kia ku bheka o Palaízu, ni ku difukunukinu—o ima íii iene i tua mesena. Maji nange ki tu bhonza ku mu dielela kioso kia tu bhana itumu ia lungu ni ku kala ni ukexilu uambote, ni ku xikina kuila o ku belesela o itumu iê kiene kia tokala, phala o ku zediua kuetu. O Sobha Solomá ua soneka: “Dielela kua Jihova ni muxima ué uoso, kana ku dielela ku kilunji kiê. Mu suue muene ngó mu mauendelu mê moso, muene a iudike o njila jê joso.” (Jisa. 3:5, 6, NW) Tonginina kiambote o izuelu “jinjila” jetu ni “mauendelu.” Kiki kilombolola kuila, o ukexilu uoso ua muenhu uetu—ko kidielelu kietu ngó ku hádia—maji tua tokala kulondekesa o kidielelu kietu kua Nzambi. Kiebhi ki tu tena kulondekesa o kidielelu kietu, kioso ki tu dibhana ni jitendasá?

6. Kiebhi ki tu tena ku kolesa o vondadi ietu ia ku dituna ku bhanga o ima iaiibha?

⁶ O ibanzelu ia iibha i mateka ku muxima. (Tanga Loma 8:5; Efezo 2:3.) Kiebhi ki u tena ku dituna ku kala ni ibanzelu ia iibha? Tu di longe jipondo jitanu: 1. Bhinga o kikuatekesu kia Nzambi mu kaxi ka musambu. (Mat. 6:9, 13) 2. Xinganeka mu phangu ia jiselevende j’ukulu a belesele Jihova, ni ió ka belesele. Xinganeka mu ima ia bhitile na-iu.a (1 Kol. 10:8-11) 3. Xinganeka mu ndolo i ku bhekela o kituxi, ni ku athu u ua zolo. 4. Xinganeka kioso kia divua Nzambi, kioso o jiselevende jê kia ta kituxi. (Tanga Jisálamu 78:40, 41.) 5. Xinganeka o kisangusangu ki kala nakiu Jihova ku muxima, kia mona o jiselevende jê ku dituna o ima iaiibha, ni ku bhanga o ima iambote, ki kale mu kasuekele, mba mu kaxi ka athu. (Jisá. 15:1, 2; Jisa. 27:11) Eie ué u tena kulondekesa kuila ua dielela kua Jihova.

Dielela Kua Nzambi Kioso ki u Dibhana ni Kizukutisu ni Athu ka Mesena o Mak’â Nzambi

7. Jipolova jahi ja bhiti naju Jelemiia, ni kiebhi muéne kia divu?

⁷ Saí jiphange ene mu boka mu ididi muene athu ka mesena o mak’â Nzambi. O polofeta Jelemiia ua bokele ué mu ididi kala íii—mu utuminu ua Judá, mu izuua ia hadi. Izuua ioso akexile mu ku mu beta phala ku polovala o kixikanu kiê mukonda dia ku tula o njimbu ia kufundisa kua Nzambi. Katé muéne ni seketa iê Mbaluke, ua kexile mu dikola mukonda dia ku bhuila kuê. (Jel. 45:2, 3) O kuila Jelemiia ua luualele? Saí kithangana muéne ua luualele. Muéne ua dikola: “Kokolo dia kizuua kia ngi vuala;” “Phala’hi ngó nga tundu mu divumu, eme ngeza ngó ku tala hadi ni lamba, o izuua iami anga iia ngó ni kujidila mu lusebu?”—Jel. 20:14, 15, 18.

8, 9. Kála kia soneka mu divulu dia Jelemiia 17:7, 8, ni Jisálamu 1:1-3, ihi i tua tokala o ku bhanga phala tu kolokote o ku bhana ibundu iambote?

⁸ Né kiki, Jelemiia ka bhuila. Muéne ua kolokotele o ku dielela kua Jihova. Mu ku bhanga kiki, o polofeta íii, ua mono o kizuelu kia Jihova ku dikumbidila, ki tu sanga mu divulu dia Jelemiia 17:7, 8, NW, diambe: “Muthu uoso-phe u dielela kua Jihova, muéne ua zediua, uedi o ku dielela kuê, kua Jihova ngó. Kuma muéne ua ka kala kála muxi uo-phaphe ku mbandu’a ngiji, u tanda jindanji jê katé ku menha, kiza muzukuta ua kalolo ka kala ni hele ia munza, maji o dífue diê di buingita, o bhu muvu ua kukuta, ki u tate, mba u kamba ku uima kibundu.”

⁹ Kála o muxi uima ibundu, “uo-phaphele ku mbandu’a honga ia menha,” Jelemiia ka kambele ‘ku bhana ibundu.’ Muéne kehela kuila o athu ka mesenene o mak’â Nzambi, ku mu nganala. Muéne ua xikinine o Mubhangi ua muenhu ku mu dikila ni “menha” iu ua te ku muxima uê ioso ia mu tangele Jihova. (Tanga Jisálamu 1:1-3; Jel. 20:9) Jelemiia phangu iambote phala etu, bhenge-bhenge phala ió ene mu boka mu ididi muene athu ka mesena o mak’â Nzambi! Se kiki kiene ué kiene mu bhita ni eie, kolokota o ku dielela kua Jihova, muéne u ku bhana nguzu kioso ki u “fisala o dijina diê.”—Jihe. 13:15.

10. Mabesá ahi u tua-nda tambula, ni ibhuidisu iebhi i tua tokala o ku di bhanga?

¹⁰ Phala ku tu kuatekesa ku dibhana ni ibhindamu ia muenhu mu izuua íii isukidila-ku, Jihova uene mu tu bhana kudia kuavulu mu nzumbi. Muéne ua tu bhana o Mak’ê, o Bibidia ia tenena, ió soneke mu madimi avulu. Muéne ua tu bhana kudia kuavulu mu nzumbi, mu kaxi ka kibuka ka kimbadi kia fiiele. Muéne uene ué mu tu kuatekesa mu kaxi ka jiphange jetu mu kilunga, ni mu iônge ionene. O kuila tua mu katula mbote ku ima ioso ia mu tu bhana? Athu oso a bhanga kiki, “a ka kala mu kuimba mukonda o mixima iâ ia sanguluka.” Maji ió ka belesela Nzambi, “a kà ta jingololo . . . ni kukumba mukonda dia kikote kia muxima.”—Iza. 65:13, 14.

Dielela Kua Nzambi Kioso ki u Kala ni Jihanji

11, 12. Kioso ki tu mona o maka oso ene ku mundu, kuebhi ku tu tena ku sanga o unjimu ua kidi?

¹¹ Kala kia ki kanena mu Bibidia, o athu ku mundu a mu tala hadi iavulu. (Mat. 24:6-8; Dij. 12:12) Kioso ki ku moneka nvula ia mu bobesa o imbamba mu menha, o kima kia dianga ki bhanga athu, o ku lengela ku thandu’a sabhalalu—mba ku kididi kioso-kioso kia lebha. Kiene kimoxi ué ku mundu, mukonda dia jiphaxi javulu, mazunda ni mazunda a athu, a sota dilengelu ku kitadi, ku jinguvulu, ku jingeleja, ni ku jingijiie. Maji enhá ka tena ku bhana kidielelu kia kidi. (Jel. 17:5, 6) Maji o jiselevende ja Jihova, ala ni dilengelu dia kidi—o “ndanji i nangenena.” (Iza. 26:4) O mukua jisalamu uambe: “[Jihova] muene ngó ditadi diami muene kubhuluka kuami; kua muene ku nga kondamena.” (Tanga Jisálamu 62:6-9.) Kiebhi ki tu bhanga o Ditadi didi dilengelu dietu?

¹² Etu tu naminina kua Jihova kioso ki tuívua o Maka mê, ka difu ni unjimu ua athu ku mundu. (Jisá. 73:23, 24) Mu kifika, o athu ene mu ku a nganala ku unjimu ua mundu, nange a zuela: ‘Eie uala ngó ni muenhu umoxi; bhanga kiá o ima i ua tokala o ku bhanga’ ‘Kala ni ufunu uambote.’ ‘Kala ni kitadi kiavulu.’ ‘Sumba kiki, ni kiki.’ ‘Ndai ku jixi jengi; phala ni u katule mbote ku ima ioso iene ku mundu.’ Maji o unjimu u tunda ku diulu u tu dimuna: “O oso a sota imbamba iambote mu ngongo mumu, ka landukile kiá ngó iene mu iene. Kuma o funza ia mundu iú, ki ual’iki, ki i nange kubhita.” (1 Kol. 7:31) Kiene kimoxi ué, Jezú ua tu tendelesa o ku dianga kuta o Utuminu ua Nzambi ku pholo, ni ku bhaka “jimbongo mu diulu,” se-ku muthu u tena ku ji nhana.—Mat. 6:19, 20.

13. Mu ku xinganeka mu divulu dia 1 Nzuá 2:15-17, ihi i tua tokala ku dibhudisa?

¹³ O kuila o ibanzelu iê, ia lungu ni “mundu,” ni “ima ioso iene ku mundu,” ilondekesa kuila ua dielela kua Nzambi? (1 Nzuá 2:15-17) O kuila o jimbongo mu nzumbi, ni sidivisu mu kilunga, iene o ima ia beta-kota phala eie, o ima iene ku mundu ndenge? (Fil. 3:8) O kuila eie ua mu suína phala ku kala ku ‘mesu a zele?’ (Mat. 6:22) Mu kidi, Nzambi ka mesena kuila eie u bhanga phoko mu ima i ua tokala ku bhanga, bhenge-bhenge se eie uala ni muiji phala ku u dikila. (1 Tim. 5:8) Maji muéne ua kingila kuila o jiselevende jê, ji mu dielela—ka dielele ku mundu ua Satanaji—Jihe. 13:5.

14-16. Mbote iahi ia katula o jiphange jetu, mu ku kala ku ‘mesu a zele,’ ni mu kuta o Utuminu ua Nzambi ku pholo?

¹⁴ Xinganeka o phangu ia Richard, ni Ruth, ala ni ana kitatu a minzangala. Richard uambe: “Nga xinganeka kuila nga tokalele ku bhanga dingi mu sidivisu ia Jihova.” “Eme nga kexile ni ioso i nga mesenene, maji nga mono kuila nga kexile mu bhana kua Nzambi, o ima ia kexile mu subhuka. Kioso ki nga sambe, ia lungu ni maka enhá, eme ni Ruth, tua mono kuila eme nga tokalele ku bhinga kua ngana iami, phala ku sosola o ji ola ja ku kalakala mu izuua iuana mu semana—sumbala mu ixi, mua kexile ibhindamu ia kitadi. O ngana iami ua xikana, eme nga mateka ku kalakala mu mbeji ienioió, kála ki nga bhingi.” Kiebhi kia mu divua Richard lelu?

¹⁵ Muéne uambe, ‘ki nga mu tambula dingi o kitadi ki nga kexile mu tambula,’ “maji lelu ngala ni 50 a izuua phala ku kala ni muiji uami, ni ku longa o an’ami. Ngala ni kithangana kiavulu phala kuboka, ku longa athu avulu, ni ku kala kafunga mu kilunga. Mukonda dia ku kala ni kithangana kia ku kuatekesa o ana, Ruth uene mu tena ku kalakala kála muboki ua ithangana ni ithangana. Nga mesena ku kolokota mu sidivisu iami ia ubhe.”

¹⁶ Roy, ni Petina, akexile hanji ni mona umoxi ua muhatu, kioso kia sosola o kikalakalu kiâ phala ku kalakala mu sidivisu ia thembu ioso. Roy uambe: “Eme nga kexile mu kalakala veji lutatu ku semana,” “Petina, ua kexile mu kalakala luiadi. Tuai mu tunga mu inzo iofele, ki ia bhingile thembu iavulu phala ku i xixila. Etu tua kexile kiá tu aboki a thembu ioso, ande dia ku kala ni tuana tuiadi, nuka tua jimbi o vondadi ietu ia ku kala tu aboki a thembu ioso. Kienhiki, kioso kia kulu o tuana tuetu, tua vutuka dingi mu sidivisu ia thembu ioso. Se-ku kitadi ki sokela ni mabesá u tuene mu tambula.”

Ehela “o Kutululuka Kua Nzambi” ku Langa o Muxima uê

17. Mukonda dia ku kamba kuijiia o kizuua kia mungu, kidielelu kiahi ki tu bhana o Bibidia?

¹⁷ Se-ku muthu uejiia o kizuua kia mungu, mukonda “o ibatu ni jithembu” jene mu kuíza ku athu oso. (Ndo. 9:11) O ku kamba kuijiia o kizuua kia mungu, ki ki tokala ku tu kuatesa uôma, kála kia bhanga ió kala ni ukamba ni Nzambi. (Mat. 6:34) O poxolo Phaulu ua soneka: “Ki mu kale ni hele ia kima, ki mu ile bhidibhidi, maji ima ioso-phe iiza-ku, mu ila ni kusamba ni kudionda, kumoxi ni kusakidila, mu ende ni kubhinga kua Nzambi ioso i mua mesena. Bhenhobho o kutululuka kua Nzambi kua somboka o kitongoluelu kioso kia muthu, kuanda ku mi bateka mixima ni ilunji.”—Fil. 4:6, 7

18, 19. Kiebhi Nzambi kia tululukisa o mixima ietu? Bhana phangu.

¹⁸ Phange jetu ja mala, ni ja ahatu ene mu bhita ni jiphaxi, a tambula o kutululuka kua Jihova. Saí phang’etu ia muhatu, uambe: “O dotolo ua kexile mu ngi jijidika ku tambula manhinga. Muéne ua dianga ku ngi ebhuidisa, ‘ua fika unjimu ku dituna ku tambula manhinga?’ Eme-phe nga kexile mu samba kua Jihova, o kutululuka kuê kua kexile mu langa o muxima uami. Eme nga kexile mu kala ni nguzu iavulu. Sumbala nga kexile mu bhuila mukonda dia manhinga a tolele mu mukutu, maji nga tenene hanji ku londekesa mu Bibidia se mukonda diahi ki ngi xikina ku tambula manhinga.”

¹⁹ Saí ithangana, Nzambi u tu kuatekesa mu kaxi ka jiphange jetu, ni mu kaxi ka milongi ia Bibidia, mu kithangana kia tokala. Nange uévu kiá phang’etu kuzuela kuila: “O milongi íii iene muene i nga bhindamena. A isoneka muene phala eme!” kiki kilondekesa kuila, kabasa maka u tu kala nau, Jihova ua-nda tu londekesa o henda iê se tu mu dielela. Mukonda etu tu “jimbudi” jê, muéne ua tu bhana o dijina diê.—Jisá. 100:3; Nzuá 10:16; Ikalakalu 15:14, 17.

20. Mukonda diahi o jiselevende ja Jihova, a-nda kala bhu kididi kia kondama, kioso kia-nda buika o mundu iú, ua Satanaji?

²⁰ Mu ku zukama o “kizuua kia njinda ia Jihova,” athu oso a dielela ku mundu ua Satanaji, a-nda ku a buika. O ulu, ni phalata, ni ima ia mukuá ia valolo, ki ia-nda tena ku a langa. (Sof. 1:18; Jisa. 11:4) Kua-nda subhuka ngó o dilengelu dietu, o “ndanji i nangenena” (Iza. 26:4) Tu londekese o kidielelu kietu kua Jihova mu kuenda mu jinjila jê ja iuka, ni kuboka o njimbu ia Utuminu, sumbala saí athu ka mesena kuívua o maka mê, a tu zukutisa, ni ku dielela kuila muéne ua-nda tu kuatekesa kioso ki tu kala ni hanji. Mu ku bhanga kiki, ‘tua-nda tunga bhu kididi kia kondama, tua-nda soma, kana-ku kia iibha kia-nda tu kuatesa uôma.’—Jisa. 1:33.

[Tanga mu luji]

U Tena ku Jimbulula?

Kiebhi ki tu tena ku dielela kua Nzambi

• Kioso kia tu tendala ku bhanga ima ia iibha?

• Kioso ki tu dibhana ni kizukutisu?

• Kioso ki tu kala ni jihanji?

[Foto ku mbandu 15]

O ku belesela o itumu ia Nzambi ku bheka ku zediua

[Foto ku mbandu 17]

“Jihova, Nzambi, Ndanji i nangenena”