Di Longe o Mak’â Nzambi

Kiebhi ki u Tena ku Zukama Kua Nzambi?

O mbandu íii, ia-nda tambuijila o ibhuidisu nange i ua di bhangele kiá, ia-nda kulondekesa se kuebhi ku u tena ku sanga o itambuijilu mu Bibidia iê. O Jimbangi ja Jihova, a mesena kiavulu ku di longa o itambuijilu íii ni eie.

1. O kuila Nzambi uivua o misambu ia athu oso?

Jihova uexana athu a ifuxi ioso ku mu zukama bhu kaxi ka musambu. (Jisálamu 65:2) Maji muéne kene mu kuívua o misambu ia athu oso. Mu kifika, kioso akua Izalaiele kia kolokotele mu bhanga o ima ia iibha, Nzambi ua ditunine kuívua o misambu iâ. (Izaia 1:15) Kiene kimoxi ué, o musambu ua diiala u zukutisa o muhatu’ê, kene mu ívua. (1 Phetele 3:7) Maji, Nzambi uivua o misambu ia ió, a ta ituxi ia dikota, se ene a diela.—Tanga 2 Tilunda 33:9-13.

2. Kiebhi ki tua tokala o ku samba?

O ku samba ujitu ua dikota, u bhanga mbandu ku ubhezelu uetu, tua tokala ku samba ngó kua Jihova. (Matesu 4:10; 6:9) Mukonda tu akua ituxi, tua tokala kusamba mu dijina dia Jezú, mukonda muene o “njila.” (Nzuá 14:6) Jihova ka mesena kuila tu tanga o misambu mu mukanda, maji tu samba o ima i tu kala na-iu ku muxima uetu.—Tanga Matesu 6:7; Filipe 4:6, 7.

O Mubhangi uetu uivua ué o musambu u tu bhanga ku muxima. (1 Samuuele 1:12, 13) Muéne u tu suínisa ku samba mu ithangana ioso, mu kamene, ku disukilu dia kizuua, mu ithangana ia kudia, ni kioso ki tu kala ni maka.—Tanga Jisálamu 55:22; Matesu 15:36.

3. Mukonda diahi o Jikidistá ene mu diongeka?

O ku zukama kua Nzambi kuene mu bhonza, mukonda tuala bhu kaxi ka athu ka xikina Nzambi, ene mu xonguena o kikanenu kiê kia ku bheka o kutululuka mu ixi. (2 Timote 3:1, 4; 2 Phetele 3:3, 13) Mukonda dia kiki, kua bhingi ku dilunga ni jiphange jetu phala ku di suínisa.—Tanga Jihebeleu 10:24, 25.

Eie u tena ku zukama kua Nzambi, se u kala ni ukamba ni athu a zolo Nzambi. O iônge ia Jimbangi ja Jihova, kididi kiambote phala ku suínisa o kixikanu kiê, bhu kaxi ka kixikanu kia akuenu.—Tanga Loma 1:11, 12.

4. Kiebhi ki u tena ku zukama kua Nzambi?

Eie u tena ku zukama kua Nzambi, mu ku xinganeka mu ima i u di longa mu Mak’â mê. Ku mona o ibhangelu iê, ni ku belesela o milongi iê, ni ku xikina mu ikanenu iê. O ku xinganeka kiambote, ku tu suínisa ku sakidila o henda ia Nzambi, ni unjimu uê.—Tanga Josuué 1:8; Jisálamu 1:1-3.

Eie u tena ku zukama kua Nzambi, se u mu dielela, se u mu xikana. O kixikanu kia difu ni kima kiala ni muenhu, ki bhinga ku ki dikila. Eie u tena ku suínisa o kixikinu kiê, mu ku xinganeka mu milongi i ua di longo.—Tanga 1 Tesalonika 5:21; Jihebeleu 11:1, 6.

5.Mbote iahi i ua-nda katula mu ku zukama kua Nzambi?

Jihova u langa oso ala ni kixikanu kua muéne. Muéne u a langa ku ima ioso i ta mu iluezu o kixikinu kiâ, ni kidielelu kiâ ku muenhu ua kalelaku. (Jisálamu 91:1, 2, 7-10) Muéne u tu dimuna ku ukexilu u tena ku ta o muenhu uetu, ni ku zediua kuetu mu iluezu. Jihova u tu longa o ukexilu uambote u tua tokala ku kala nau ku muenhu.—Tanga Jisálamu 73:27, 28; Tiiaku 4:4, 8.

Phala kuijiia dingi, tanga o kibatulu 17 kia divulu didi, a di bhange ku Jimbangi ja Jihova. Mu Kidi Ihi i Longa o Bibidia?