O Kidi ki Tena ku Lungulula o Muenhu uê
NANGE uevu kiá, mba a ku longo kiá makutu alungu ni Nzambi, alondekesa o milongi ioso ia bhiti. Né kiki, nange uala hanji ni phata ia ku lungulula o ima ioso i ua di longo kiá, bhenge-bhenge se ua xikina mu milongi íii ia makutu tundé ukulu.
Se-ku maka se u dituna o ku xikina. Saí jingeleja ka uabhela kuila athu a sokesa o milongi iâ, ni ia Bibidia. A mukuá a zokela o milongi iâ, mu kuzuela kuila o Bibidia ia bhonzo, muthu uoso-uoso ka tena ku i tendela. Sumbala, maxibulu avulu a Jezú exile athu ka di longele kiavulu, maji ene a tendela kiambote o ima ia kexile mu a longa Jezú.—Ikalakalu 4:13.
Nange u kala ni uôma ua ku lungulula o ima i ua di longo kiá, mukonda o ku bhanga kiki, kieji londekesa kuila ki uala ni kixikanu. Maji o kuila Nzambi u luuala ni eie se u tokuesa o Bibidia, o njimbu iê phala o athu, phala kuijiia ihi ia mesena ko kuê? Maji o Maka mê a ku suínisa ku tanga o Mikanda Ikola u bheka uê, mu kuzuela: “Phala mu tongolole ioso o vondadi ia Nzambi, iauabha, ia ujitu, iatenena, i mu uabhela kiambote.”—Loma 12:2.
O ku di longa o kidi kia lungu ni Nzambi kia beta-kota, o ku di longa ima ia mukuá ndenge—iene i tena ku lungulula o muenhu uê phala o mbote. (Nzuá 8:32) Deanne, o muhatu a mu tange mu milongi ia dianga, uene mu suínisa dingi o kixikanu kiê mu Mak’â Nzambi. Muéne uambe: “Ki nga kijidile kuila o Mikanda Ikola i longa o kidi, tundé ki nga mateka o ku di longa o Bibidia.” Kindala ngejiia kiá Jihova, ngejiia kuila Nzambi ki kiphata, maji kala Tata iami ia henda uene ku diulu. Kienhiki nga sange o valolo ia kidi ku muenhu uami.
Nange ua di longo kiá o Bibidia sé ku mona o mbote ijila mu ku di longa. Se kiki kiene, kana kueha o ku di longa. O ku fikisa ku tendela o Bibidia, se a ku longo o milongi ia makutu ia lungu ni Nzambi, kia difu ni ku fikisa ku sokejeka ima mu ididi iê, maji ku tena ku i sokejeka, mukonda o kididi kia ku bhana ki muene mu ia tokala. Nange ku tena ku i sokejeka ioso, u luuala, u bhuila, mukonda o jimbandu ki ji tena mu ididi ia ku bhana. Maji se a ku bhana o kididi kia tokala, ua-nda tena ku sokejeka o ima ioso mu ididi iê.
Ua mesena kuijiia o kididi kia tokala ni kuijiia dingi ia lungu ni Nzambi? Tua ku suínisa mu ku sota o Jimbangi ja Jihova ku diembu diê, mba ku soneka ku kijimbuete kiala ku dífue 4 ku mulangidi iú, phala na ku longe o Bibidia ku dibhata diê, sé ku futa kitadi.
[Kilombuelelu ku bandu 9]
“Phala mu tongolole ioso o vondadi ia Nzambi, iauabha, ia ujitu, iatenena, i mu uabhela kiambote.”