Mukonda Diahi Kima Kiambote ku Belesela o Itumu ia Bibidia?
O KUILA o milongi ia Bibidia ia lungu ni ku di zeka ki iala ni valolo, i bhonza ku i belesela? Kana. O milongi ia Bibidia ia lungu ni ku di zeka, i tu langa:
▪ Ku mauhaxi ejila mu ku bhanga undumbu
▪ O kuimita sé ku kazala?
▪ Mu ku luuala mukonda dia ku kamba ku zediua mu ukaza
▪ Ku kitongoluelu kia neme
▪ Mu ku kamba ku ku xila ku athu u ua zeka nau
O Mubhangi uetu, Jihova Nzambi,a ua mesena kuila tu katula mbote ku ujitu uê. Nzambi, “u ku longa kioso kia uabha.” (Izaia 48:17) O muthu u belesela o itumu ia Bibidia ia lungu ni ku di zeka, u nganhala, u kala ni:
▪ Ukamba ni Nzambi
▪ Kutululuka kua muxima
▪ Ukamba uambote ku muiji
▪ Ku mu xila kiambote
▪ U di xila mudiê
Kienhiki, ihi i u banza ia lungu ni ku belesela o itumu ia Bibidia? O kuila u tena ku lungulula o ukexilu ua muenhu uê? O kuila Nzambi ua-nda lembalala o ukexilu uê uokulu?
Xinganeka: Saí athu a tokalele mu kilunga mu hama ia dianga, exile jindumbu, akua jiphánda, ni ku zeka ni mala ni akuâ. Ene a solo ku lungulula o ukexilu ua muenhu uâ, ia a tambula mabesá avulu. (1 Kolindo 6:9-11) Lelu mazunda ni mazunda a athu ku mundu uoso, ene mu lungulula o mienhu iâ. Ene, ene mu xisa o maukexilu a iibha, ni ku katula mbote mu ku belesela o itumu ia Bibidia. Mu kifika, xinganeka o musoso ua Sarah ia tange mu milongi ia dianga.
“Mu Kithangana Kieniókio Nga Divu Kiambote”
Sarah ua mono kuila, o ukexilu ua iibha ua muenhu ué ki ua mu bhana ufolo ni kisangusangu kia mesenene. Muéne uambe: “Nga divu kuila o kitongoluelu kiami kia kexile hanji mu ngi bazela. Nga kexile ni jisonhi, ni uôma ua kuimita, mba ku kala ni uhaxi u sambukila mu ku bhanga undumbu. Nuka nga di jimbile kuila kuene Nzambi, nga kijidile ué kuila o ukexilu uami ua mu luualesele. Nga divu kála nga xidi, kiki kia ngi bhangesa ku divua kia iibha.”
Maji Sarah ua sange nguzu phala ku lungulula o ukexilu ua muenhu uê. Muéne ua soto kikuatekesu kia jitata jê, Jimbangi ja Jihova. Muéne ué, ua bhingi kikuatekesu ku tufunga mu kilunga. Sarah uambe: “Nga diuana kiavulu mu ku mona o kikuatekesu kia jitata jami, ni henda ia londekesa o tufunga mu kilunga. Mu kithangana kieniókio nga divu kiambote.”
Kindala Sarah ua mu sasa tuana tu iiadi ubheka uê. Sarah uambe: “Ngi zuela sé hele ni tuana tuami ia lungu ni njila i nga solele. Nga mesena kuila ene ejiia kuila o ku xibhaka o itumu ia Nzambi, ia ngi bhekela ibhidi iavulu. O mbambe iami o ku a kuatekesa ku zola o mbote mu ukexilu ua xitu, ua muxima ni ua kilunji, uijila mu ku belesela o itumu ia Nzambi, ia lungu ni ku di zeka. Nga kijiia kuila Nzambi u tu bhana o itumu ia tokala mukonda muéne ka mesena kuila tu tala hadi.”
Eie ué u tena ku katula mbote, mu ku belesela o itumu ia henda ia Nzambi. O Bibidia i bhanga o kikanenu kiki: “Ijila ia Jihova ia tetuluka, i bheka ngalasa ku muxima; kitumu kia Jihova kiazele ki muikina o mesu. . . . ‘O kia kuata ku a aluka ku bhanduluka kuê kuvula.’”—Jisálamu 19:8, 11.b
[Tanga mu luji]
a Jihova, o dijina dia Nzambi, kála ki longa o Bibidia.
b Phala ku di longa dingi ia lungu ni itendelesu ia Bibidia, sota o Jimbangi ja Jihova ku diembu diê. Mba soneka ku kijimbuete kiala mu mbandu 4, mba u xinda mu kijimbuete kiki, www.watchtower.org.
[Foto ku bandu 8]
Oso a xibhaka o itumu ia Bibidia, a kala ni ibhidi
[Foto ku bandu 9]
Oso a belesela o itumu ia Bibidia, a kala ni kitongoluelu kia zele, ni ukamba uambote ku muiji