Mbalahamu Diiala Dia Kixikanu

Mbalahamu u tunda bhu kanga mu usuku ua tululuka. U mona o ku bhenha kua jithéthembua ku diulu, u diuana kiavulu mu kikanenu kia Nzambi kia kuila o mbutu iê ieji kala kála o jithéthembua ku diulu. (Dimatekenu 15:5) Phala Mbalahamu, o jithéthembua jexile kijimbuete kia ikanenu ia Jihova. Ja kexile ué mu londekesa kuila muéne ueji kumbidila muene o kikanenu kia bhangele. Se Jihova uala ni kutena kua ku bhanga o ngongo ioso ni ima ioso iala-mu, hinu muéne keji tena ku bhangesa kuila Mbalahamu ni Sala a kala ni mona? Kiki kiene o kixikanu kia Mbalahamu.

O KIXIKANU IHI? Kala ki zuela o Bibidia, o “kixikanu” kilombolola ku xikina mu ima ki luua i moneka. Ijila ué mu ima i tua mono kiá. O muthu uala ni kixikanu u kingila mu ki kumbidilu kia ikanenu ia Jihova, u dielela kuila iene ia kidi, sumbala ki ia dikumbidila luua.

KIEBHI MBALAHAMU KIA LONDEKESA O KIXIKANU? Mbalahamu ua londekesa kuila ua dielele mu ikanenu ia Nzambi. Mu ku xikana kuê, Mbalahamu ua xisa o ixi iê kua mu vualela, mu ku dielela kuila Jihova ueji kumbidila o kikanenu Kiê kia ku mu londekesa ixi iéngi. Mu ku xikana kuê, Mbalahamu ua nhungu o ixi ioso ia Kanana, mu ku dielela kuila o mbutu iê ieji lundula o ixi ioio. Mu ku xikana kuê, Mbalahamu ua belesela kioso kia mu bhingile ku satela Izake, mu ku dielela kuila, se Jihova ua mesenene, ueji fukununa Izake.—Jihebeleu 11:8, 9, 17-19.

Mbalahamu ua tale ku pholo, ka tale ku dima. Sumbala Mbalahamu ni Sala akexile ni muenhu uambote mu ixi ia Uli, mu ixi ia Kanana, ndenge, “ene ka kexile mu xinganeka ku vutuka mu ixi mua tundu.” (Jihebeleu 11:15, Biblía na Linguagem de Hoje) Mu kiki, ene akexile mu xinganeka se kiebhi Nzambi kieji ku a besoala, ni ku besoala ué o mbutu iâ ku hádia.—Jihebeleu 11:16.

O kuila Mbalahamu ua tokalele muene ku dielela kua Nzambi? Ua tokalele. Mukonda Jihova ua kumbidila o ikanenu ioso ia bhangele. O mbutu ia Mbalahamu ia divuala, ia kituka o kifuxi kionene, a uijidile mu dijina dia Izalaiele. Mu kithangana kieniókio akua Izalaiele a lundula o ixi ia Kanana, o ixi ia kanene Jihova kua Mbalahamu.—Josuué 11:23.

PHANGU IAHI I TU KATULA KUA MUÉNE? Tu tena ku dielela kuila Jihova ua-nda kumbidila o ikanenu iê. Né muene se saí ikanenu bhu pholo ia athu i bhonza ku i xikina kuila ia-nda bhita, etu tua dielela kuila “kua Nzambi-phe ima ioso i xikina.”—Matesu 19:26.

O phangu ia Mbalahamu i tu longa ku tala ngó ku pholo, mu ima i tua-nda tambula ku hádia. Saí diiala a mu ijidile mu dijina dia Jason, ua kaiele o phangu íii. Jason ua kexile ni uhaxi ua dikota, ka tenene ku bhanga dingi kima. Jason uambe: “Saí ithangana ngene mu banza hanji mu ima i nga kexile mu bhanga.” Uambe dingi: “Ima iofele i nga xisa ku dima, maji o kima kia beta-kota phala eme, o ku kala ni muhatu uami, Amanda.”

Né kiki, Jason ua dielela kuila Jihova ua-nda kumbidila o ikanenu iê, ia lungu ni ku bhanga o ixi ietu ku kala palaízu, ni kuila o athu a-nda kala ni muenhu ua kalelaku, ni sauidi iambote.a (Jisálamu 37:10, 11, 29; Izaia 35:5, 6; Dijingunuinu 21:3, 4) Jason uambe: “Ngi xinganeka mu ithangana iambote i tua kingila hádia, kua kambe ngó bhofele o ima ioso ia iibha ia-nda bhua—o ndolo, o jiphaxi, o ku luuala, ni ku kala ni kitongoluelu kia neme—ki ia-nda kala-ku dingi.” Muéne ué phangu iambote ia kixikanu kála kia Mbalahamu!

[Tanga mu luji]