Atangi a Madivulu Metu Ebhula . . .

O Kuila o Ixi A-nda i Buika?

▪ Saí athu a xikinine kuila o dizubhilu dia ixi dieji kuíza mu kizuua kia 21 ku mbeji ia Kamusasadi ua 2011. Kiki ki ki bhiti. O kikanenu kia bhange Harold Camping, mu mutelembe ku Estados Unidos, ki ki dikumbidila. Muéne ua kanene kuila o Kizuua kia ku Fundisa kieji kuíza mu kizuua kia 21 ku mbeji ia Kasambuadi ku muvu ua 2011—kueji kuíza kitungutu kia dikota kia ixi, kieji tula mu ixi, mu ku bhita mbeji jitanu, mu kizuua kia 21 ku mbeji ia Kamusasadi ua 2011, kueji kuíza o dizubhilu dia ixi.

O ixi, nuka, a-nda ku i buika. O Mubhangi ua ixi, ka-nda kuehela kuila kiki ki bhita. O Maka mê, exi: ‘Kala ki ua iudika o ixi íii, ia kuata, ia nange.’—Jisálamu 119:90.

Kienhiki, saí atangi a Bibidia, nange a tena kuzuela kuila o ixi a-nda ku i buika ni túbhia. Ene a zuela kiki, mukonda dia izuelu mu divulu dia 2 Phetele 3:7, 10, diambe: ‘O maúlu ala-ku, ni ixi-phe, mu kizuelu kiene kimoxi kia Nzambi, a xikamena túbhia. A a bhake katé bhu Kizuua kia Kufundisa, kia ku buikisa athu abhumu. Maji kizuua kia Jihova-phe, hinu k’iza kála muii. Mu kizuu’okio o maúlu ma ka jimuka ni mutendu ua dikota, ima ioso ia moneka ku mesu iala mu dimbinza, ia ka jokota ku túbhia. O ixi ni imbamba iê ioso iala-mu, ia ka jimuka.’ O kuila o izuelu ia Phetele ia tokala ku i tendela mu ukexilu iú?

Kana. Mukonda diahi? Mukonda o dijimbuluilu dia jivelusu jiji, nange ia lungu ni izuelu ia mukuá ia mukanda ua Phetele ni jivelusu ja mukuá ia Bibidia. Se o jivelusu jiji ka ji tendela kiambote, jeji londekesa kuila o maúlu mba o ngongo—mazunda ni mazunda a jithéthembua ni ima ia mukuá mu ngongo—ia-nda jokota mu túbhia, mukonda mu ngongo muala ngó athu a iibha. O kuila eie ueji buika museke oso, mukonda dia kuijiia kuila saí-ku mbundu imoxi ia museke ki ia ku uabhela? Kiki ki kieji fuama! Kiene kimoxi ué, Jihova keji buika o ibhangelu iê ioso mukonda dia muthu umoxi ku mu bhukumukina.

O kibanzelu kiki, ki ki lungu ni izuelu ia Jezú Kristu, kiambe: “A zediua alenduka, ene a lundula o ixi.” (Matesu 5:5; Jisálamu 37:29) O kuila o tata ia henda ueji tunga inzo iambote phala o muiji uê, mu kusuka-ku u i jokotesa kumoxi ni inzo? (Jisálamu 115:16) Ki kola! Jihova ki Mubhangi ngó, muéne Tata ia henda.—Jisálamu 103:13; 1 Nzuá 4:8.

Phetele ua tumbula o kizuelu “ixi” mu kifika ngó, kilombolola o athu a tunga mu ixi—ió o athu oso a iibha. Phetele ua a sokesa ni Dilúvio dia bhiti mu izuua ia Noué. (2 Phetele 3:5, 6) Mu izuua ienioió, o athu a iibha, ene ngó a a buika; o ixi, ni Noué o muthu ua iuka, ni muiji uê, a bhuluka. Kiene kimoxi ué, Phetele ua tumbula o kizuelu ‘maúlu’ mu kifika ngó. O ‘maúlu’ alombolola o jinguvulu mu ixi. Kienhiki o athu oso a iibha, a-nda a buika, o jinguvulu joso ja iibha a ka ji sasujula, o Utuminu ua Nzambi uene ua-nda ku a bhingana.—Daniiele 2:44.

O kuila o ixi a-nda i buika? Kana. A-nda buika ngó o athu a iibha, a a tumbula kua Phetele kala o ixi. O ixi ni athu ambote, ia-nda nangenena katé ku hádia.—Jisabhu 2:21, 22.