Zukama ku Mukua Kuívua o Misambu

ATHU avulu amba kuila a xikina Nzambi, maji ka tena kulondekesa se mukonda diahi a xikina Nzambi. Ka tena ku jimbulula se mukonda diahi mu jingeleja muene mu bhita ima ia iibha, mba se mukonda diahi Nzambi uehela o hadi mu ngongo. O athu enhá ene mu samba ku Nzambi ka ijiia.

Maji kiki, ki ki tokala ku bhita n’eie, eie u tena ku zukama kua Nzambi. U tena ku suínisa o kixikanu kiê, ni kuijiia ihi ia bhange Nzambi phala eie ku mu zola ni ku mu bhana valolo. O kixikanu kia kidi, kijila mu ima i tu mona. (Jihebeleu 11:1) Se u di longa o kidi kia lungu ni Nzambi, ua-nda muijiia kiambote, ua-nda tena kuzuela né kála kamba diê. Di longe o misoso ia athu akexile mu samba, sumbala akexile ni phata ia kuila ki kuene Nzambi.

◼ Patricia, a mu tange mu milongi ia dianga. Uambe: “Saí kizuua nga kexile ni dikuinhi dia makamba, ene a mateka kuzuela maka alungu ni Jingeleja. Eme nga a tangela kuila, nga xisa o dibhata, phala ki ngivue o maka akexile mu zuela tat’etu ka xikanene kuila kuene Nzambi ni Mbangi ia Jihova uejile mu tu kunda. Saí kamba diami uambe, ‘nange o mbangi ia Jihova ua lungu’ê.’

“O mukuá uebhula, ‘mukonda diahi ki tuiê mu kilunga kiâ, phala tu katule o phata?’ Kiki kiene muene ki tua bhange. Sumbala tua kexile ni phata iavulu, maji saí iá a kolokota kuia mu iônge, mukonda o Jimbangi ja Jihova a kexile mu tu tambulula kiambote.

“Saí kizuua kia Lumingu, ngevu kima kia lungulula o ukexilu uami. O mulongexi ua jimbulula se mukonda diahi athu ene mu tala hadi. Ki ngi kijidile kuila o muthu a mu bhange ua iuka, ni kuila o kituxi ni kalunga, muthu umoxi ua ki bheka, ni kuila kiene kia di muange mu ngongo ioso. O mulongexi ua jimbulula ué se mukonda diahi, Jezú ua tokalele kufuá phala o athu a kala dingi kala kia kexile ku dimatekenu, ande dia ku texika o palaízu.a (Loma 5:12, 18, 19) Mu kithangana kieniókio, nga xikina ku milongi ioso i ngevu. Nga-mbe, kuila ‘saí Nzambi uene mu tu suua.’ Nga suluka ni ku di longa o Bibidia, nga mono-phe kuila kuene muthu ua kidi uivua o misambu iami kioso ki ngi samba.”

◼ Allan, a mu tange mu milongi ia dianga. Uambe: “Saí kizuua o Jimbangi ja Jihova, eza kubhata dietu, muhatu’ami ua a bokuesa m’onzo, mukonda o milongi ia kuila o athu a-nda kala ku muenhu ua kalelaku mu ixi, ia mu uabhela kiavulu. Maji kiki kia ngi iibhile kiavulu. Nga xisa o ajitu bhu muelu, ngai ni muhatu’ami mu kuzinha, eme nga mu ambela: ‘Kana ku tobha. Eie ku tokala ku xikina o milongi íii!’

“Muéne ua tambuijila, ‘ndé u ua zuela kuila o milongi iâ, ia makutu.’

“Mu kidi, eme ki ng’ejidile kima kilondekesa kuila o milongi iâ ia makutu. Mukonda ene athu ambote, a ngi bhana divulu dizuela se o ima a i bhange, anga ia moneka ngó. Kiki kia ngi bhangesa ku mesena kuijiia dingi ia lungu ni Nzambi. Nga mateka ku di longa o Bibidia ni Jimbangi ja Jihova, nga mono kuila o milongi iâ, ki i sokela ni ibanzelu iami ia lungu ni Nzambi. Mu ku di longa ia lungu ni Jihova, nga mateka ku samba kua muéne sé hele. O ukexilu uami ki uexile uambote, eme nga bhingi o kikuatekesu kia Jihova. Nga xikina kuila Jihova ua tambuijila o misambu iami.”

◼ Andrew, ua tungu mu ixi ia Inglaterra. Uambe: “Sumbala nga kexile ni ibanzelu iéngi, nga uabhele o milongi ia jingijiie, nga xikinine mu milongi ia kuila o ima ia moneka ngó, mukonda saí athu a zuela kuila kidi. Nga ditunine ku xikina kuila kuene Nzambi, mukonda dia ima ia iibha iene mu bhita.

“Maji saí ithangana nga kexile mu xinganeka: ‘Se kuene muene Nzambi, nga mesena kuijiia se mukonda diahi tuala ku muenhu. ‘Mukonda diahi kuene usuéia, ni ita?’ Kioso ki ngi kala ni ibhidi, ngi samba mu ku bhinga kikuatekesu, maji ki ngejiia se nga mu zuela ni nanhi.

“Saí muthu ua bhana o kamukanda kua muhatu’ami a ka bhange ku Jimbangi ja Jihova, kambe: O Mundu iú u Tena ku Bhuluka? Kiki kiene o kibhuidisu ki ngene mu di bhanga. O kamukanda kaka, ka ngi suínisa kuibhuidisa ia lungu ni Bibidia, kuila: ‘O kuila ku bhinga muene kuijiia o itambuijilu iê?’ Mu ku bhita thembu, kioso ki nga kexile mu nhoha ku salu iami, saí muthu ua ngi bhana o divulu: A Bíblia—Palavra de Deus ou de Homem?b Kioso ki nga mono kuila o Bibidia izuela ué ia lungu ni milongi ia jingijiie, nga mono kuila nga tokalele kuijiia dingi ia lungu ni Bibidia. Kienhiki, kioso Mbangi ia Jihova kia ngi bhingi phala ku ngi longa nau, eme nga xikina o ku di longa. Kioso kia ngi longo o vondadi ia Jihova, nga tendela kuila muéne muthu ua kidi, eme nga kexile mu zuela né mu misambu se hele.”

◼ Jan, a mu sase ku jitata akua Protestante mu mbanza ia Londre. Uambe: “O ima ia iibha ia kexile mu bhanga mu ngeleja ni hadi iene mu ngongo, iene ia ngi bhangesa o ku bhuila kuia mu ngeleja. Nga xisa ué o xikola ia katunda, eme nga kuata o kuimbila ni ku xika o mbánza phala ku nganhala kitadi. Eme nga di sange ni Pat, etu tua sokana. Muéne a mu sase ku jitata akua Katolika, iu ua xisa ué o ngeleja kala ki nga bhange.

“Tua tungile kumoxi ni athu a mukuá a xisa uá o xikola, ia mesenene kuijiia maka alungu ni jingeleja. Saí kizuua, tua bhiti o usuku uoso mu kuzuela se mukonda diahi tuala ku muenhu. Sumbala eme ni Pat ki tu xikinine kuila kuene Nzambi, etu tua banzele kuila kuene muene muthu ‘ua bhange o muenhu.

“Kioso ki tuai mu tunga ku thunda ia ixi ia Inglaterra, mu ku sota kikalakalu kia kuimba, eme nga vuala mon’a diiala. Saí usuku, muéne ua kate, eme nga xinganeka kuila, nga tokalele ku samba kua Nzambi, né muene sé ku xikina kuila kuene Nzambi. Kioso ki nga di senge ni Pat, nga mu xisa, eme nga iami ni mon’etu. Mu veji ia mukuá nga sambe se kua kexile muthu ua kexile mu ngivua phala ku ngi kuatekesa. Eme ki ngi kijidile, maji Pat kiene ué kia bhange.

“Mu ku bhita kithangana, mu kizuua kieniókio, Mbangi jiiadi ja Jihova a pupu ku dibhitu dia muadi uami Pat, ia mu londekesa o milongi ia Bibidia. Pat ua ngi xana mu mutelembe ua kafuetele, iu ua ngi ibhula se nga mesena ku di longa- né kumoxi o Bibidia ni Jimbangi ja Jihova. Mu ku bhita thembu, a tu longo kuila, se tua mesena kuila Nzambi u tu xikina, tua tokalele ku kazala. Kiki kieji tu bhonza kiavulu, mukonda tua kexile ni phata se tua tokalele muene ku kala kumoxi.

“Tua mesenene kuijiia dingi ia lungu ni i kumbidilu ia ikanenu ia Bibidia, se mukonda diahi kuene hadi iavulu, se o Utuminu ua Nzambi ihi. Mu ku bhita thembu, a tu longo kuila Nzambi ua mesena o mbote ia athu, kienhiki tua mesenene ku bhanga vondadi ia Nzambi. Kienhiki, etu tua kazala. O kuijiia o Mak’â Nzambi, kuene mu tu kuatekesa ku sasa o tuana tuetu tu tatu. Tua mono kuila Jihova uevu o misambu ietu.”

Tonginine Mudiê

Kála o mazunda a athu a mukuá, o athu a a tange mu milongi íii, a mono kuila o jingeleja a nganala o athu, ia a mono ué se mukonda diahi Nzambi uehela o hadi mu ngongo. Eie ua mono kuila, o milongi ia Bibidia iene ia bhangesa o athu enhá kuijiia kuila Jihova uivua o misambu?

Ua mesena kuijiia se kuene muene Nzambi? O Jimbangi ja Jihova, a-nda sanguluka kiavulu ku ku longa o kidi kia lungu ni Jihova ni kiebhi ki u tena ku zukama ku ‘Mukua kuívua o misambu.’—Jisálamu 65:2.

[Tanga mu luji]

[Kilombuelelu ku mbandu 10]

“Kioso kia ngi longo o vondadi ia Jihova, nga tendela kuila muéne muthu ua kidi, ngi tena kuzuela né mu misambu se hele”

[Foto ku mbandu 9]

O kixikanu kia kidi, kijila mu ima i tu mona ni mu vondadi ia kuijiia o kidi kia lungu ni Nzambi