O Kuzonza o Muxima Ni Kitadi Kua-nda Bhua!

‘Kinga kua Jihova, u kuate njila iê . . . kizuua kia-nda batuka ió a bhukumuka, eie ua-nda ki mona.’—JISÁLAMU 37:34.

O KUILA eie u banza ué kála o athu a mukuá, kuila o kuzonza ni kitadi ki kua-nda bhua? Ki kima kia iibha ku banza kiki. O musoso ulondekesa kuila, tundé ukulu o athu a fikisa kiá maunguvulu avulu. Ene ka tena ku zubha o kuzonza ni kitadi. O kuila tu tena ku dielela kuila saí kizuua athu enioso a-nda kala athu a kidi?

O Bibidia izuela kuila kidi! I tu tangela ué kuila, kua kambe ngó Nzambi ua-nda bhulula o ixi ku ukexilu ua kuzonza o mixima ni kitadi. Kiebhi kia-nda bhanga kiki? Bhu kaxi ka Utuminu uê ua diulu, ua-nda lungulula o ima ioso mu ixi. O Utuminu iú, uene umoxi ua longo Jezú ku maxibulu mê ku bhinga mu musambu. Mu musambu a uixana musambu ua Ngana mba Tata Ietu, Jezú uambe: ‘Utuminu uê uíze. Vondadi iê a i bhange bhoxi.’—Matesu 6:10.

Kia lungu ni Nguvulu ia Utuminu iú, Jezú Kristu, o Bibidia ia kanene kuila: ‘Muéne u bhindumuna o ngadiama kioso kia dikola; ni ua tate, ni uoso ua kambe o dilemba di mu kuatekesa. U lendukila ió ua kambe kikuatekesu ni ngadiama, u kala kibhamuenhu kia iá atate. U jituna o mienhu iâ ku hadi ni ku usuéia.’ (Jisálamu 72:12-14) Jezú u kuatela henda ia oso ene mu tala hadi mukonda dia ukexilu ua athu ua kuzonza o mixima ni kitadi, muéne ua-nda bhulula o athu ku hadi íii! O kuijiia o kidi kiki, ki ki sangulukisa o muxima?

Kioso kia-nda tumina o Sobha íii mukua henda, o Utuminu ua Nzambi ua-nda zubha o ukexilu ua kuzonza o mixima ni kitadi. Kiebhi kia-nda bhanga kiki? Ua-nda ki bhanga kioso kia-nda zubha o maukexilu atatu a suínisa o ukexilu ua kuzonza o mixima ni kitadi.

O Kituxi ki Suínisa o Ukexilu Iú

Lelu tua tokala ku bhânga ni jihanji ja xitu, ji tu suínisa ku mesena ngó o mbote ietu. (Loma 7:21-23) Maji né kiki, sai-ku hanji athu ambote a mesena ku bhanga o ima ia iuka. Athu enhá a dielela mu sata ia Jezú, mu kiki a tena ku a loloka o ituxi iâ.a (1 Nzuá 1:7, 9) O athu enhá, a kingila ku tambula mbote ku henda ia Nzambi, kala ki tu tanga mu divulu dia Nzuá 3:16: “Nzambi ua zola o mundu, katé kia suku mu kubhana Mon’ê umoxi-èlele, phala uoso u mu xikana muène, káfue, maji a kale ni muenhu ki uábhua.”

Nzambi ua-nda bheka mabesá avulu ku athu akua kixikanu. Ku mundu uobhe, muéne ua-nda zubha o kituxi, o athu oso a fiiele a-nda kala athu a iuka. (Izaia 26:9; 2 Phetele 3:13) O kituxi ki kia-nda suínisa dingi muthu ku kala ni ukexilu ua kuzonza o mixima ni kitadi. Bhu kaxi ka Utuminu ua Nzambi, o jifiiele ‘hádia a ka jituka ku ubhika ua kituxi.’—Loma 8:20-22.

O Mundu ua Iibha mu Tua Tungu u Suínisa o Ukexilu ua Kuzonza ni Kitadi

Lelu o athu a ta akuâ mu iluezu. Ene a tatesa o jingadiama, a longesa akuâ ku kala ni ukexilu ua kuzonza o mixima ni kitadi. O Bibidia i tendelesa o athu enhá: “Mukua-ituxi ehe o njila iê, o ua iibha muxima a tule mabanzelu mê.” Se o akua kuzonza o mixima ni kitadi eha o ukexilu iú, o Bibidia ikanena kuila Nzambi ua-nda ‘ku a loloka kiavulu.’—Izaia 55:7.

Mu kiki, Nzambi ua-nda buika o athu oso a dituna kueha o ukexilu uâ ua iibha. O Bibidia i kanena kuila bhu kaxi ka Utuminu, o kikanenu kiki kia-nda di kumbidila muene: ‘Kinga kua Jihova, u kuate njila iê . . . kizuua kia-nda batuka ió a bhukumuka, eie ua-nda ki mona.’b (Jisálamu 37:34) Kioso kia-nda buika o athu a bhukumuka, o jiselevende ja Nzambi ka-nda tala dingi hadi mukonda dia ukexilu ua kuzonza o mixima ni kitadi.

Satanaji o Diabhu u Suínisa o Ukexilu Iú

O muthu ua beta o kota mu kituxi, Satanaji o Diabhu. Tu sakidila kiavulu Jihova mukonda ua-nda fidisa Satanaji ku nganala o athu mu ixi. Nzambi ua-nda buika muene Satanaji. O kiama kiki, nuka dingi kia-nda tena ku bhangesa o athu ku kala ni ukexilu ua kuzonza o mixima ni kitadi.

O ku banza kuila Nzambi ua-nda zubha o ukexilu ua kuzonza ni kitadi, nange ki moneka kala nzoji. Nange u di ebhuidisa: ‘O kuila Nzambi uala ni kutena kua ku lungulula o ima mu ixi? Se muéne uala ni kutena, mukonda diahi ka ki bhange luua?’ O Bibidia i tambuijila o ibhuidisu íii.c Tua ku bhingi ku di longa mudiê, phala kuijiia ihi i longa o Bibidia ia lungu ni ima ia-nda bhita ku hádia, kioso ki kua-nda kala dingi kuzonza o mixima ni kitadi.

[Tanga mu luji]