Di Longe O Mak’â Nzambi

O Kuila Nzambi Ua-nda Bheka Unguvulu Ua-nda Tumina ku Mundu Uoso?

O mbandu íii, ia-nda tambuijila o ibhuidisu i ua mesena o kuijiia, ia-nda kulondekesa se kuebhi ku u tena ku sanga o itambuijilu mu Bibidia iê. O Jimbangi ja Jihova, a mesena kiavulu ku di longa o itambuijilu íii n’eie.

1. Mukonda diahi o mundu ua bhindamena unguvulu u tumina o mundu uoso?

Lelu, o athu oso ku mundu a dibhana ni ibhidi iavulu. Ku jixi javulu nzungule dia athu jingadiama, ni kua a talesa hadi. Ku jixi ja mukua athu avulu jimvuama, maji a mesena ku bandekesa dingi o umvuama uâ. Kua bhingi unguvulu u uanena kiambote o jimbongo ku athu oso ku mundu.—Tanga Ndongixi 4:1; 8:9.

2. Nanhi u Tena ku Tumina o Mundu Uoso?

O athu ku mundu, ka xikina unguvulu umoxi ngó, mukonda se-ku muthu u tena ku tumina kiambote. Se-ku unguvulu a mu xikina ku athu oso. Nguvulu iebhi u tena o ku tumina sé ku mu nganala mukonda dia kutena kuala na-ku? O kibanzelu kia kuila unguvulu umoxi ngó u tumina, maka a dikota.—Tanga Jisabhu 29:2; Jelemiia 10:23.

Jihova Nzambi ua solo Mon’ê, Jezú phala ku tumina o mundu hádia ni hádia. (Luka 1:32, 33) Jezú uala ni uhete ua ku tumina, mukonda ua kexile kiá mu ixi. Kioso kia kexile mu ixi, muéne ua sake jihaxi, ni ku lenduka kuoso ua longo athu, iu ua kexile ué ni kithangana phala o ana ndenge. (Marku 1:40-42; 6:34; 10:13-16) Mu kiki, Jezú muéne ua tokala ku Tumina o mundu uoso.—Tanga Nzuá 1:14.

3. O Kuila o mundu u tena ku kala ni unguvulu umoxi?

Nzambi ua tumbika Mon’ê phala ku tumina o mundu uoso tundé ku diulu. (Daniiele 7:13, 14) Kála o nguvulu mu ixi, ka bhingi ku kala mu jimbanza joso phala ku tumina, Jezú ué ka bhingi ku kala mu ixi phala ku tumina o mundu uoso.—Tanga Matesu 8:5-9, 13.

O kuila o athu oso ku mundu a xikina Jezú kala Nguvulu? Kana. O athu ngó a zolo o ima iambote, ene a-nda mu xikina. Jihova ua-nda buika oso a dituna o Nguvulu iê ia solo.—Tanga Matesu 25:31-33, 46.

4. Ihi ia-nda bhanga o Nguvulu ia mundu uoso?

Kála o mubhidi uongeka o jimbudi jê, Jezú ua mu kuongeka athu a lenduka a ifuxi ni kua longa o mak’â Nzambi. (Nzuá 10:16; 13:34) O athu ni muxima uoso a kuatekesa Jezú ni ió a a solo phala ku tumina ni muéne. (Jisálamu 72:8; Matesu 4:19, 20) Ku mundu uoso, o jiselevende ja Nzambi a belesela, a boka kumoxi kuila Jezú muéne o Sobha a mu solo.—Tanga Matesu 24:14.

Mu kutena kua mu bhana Nzambi, Jezú ua-nda bhulula o athu ku jinguvulu ja lelu. Muéne ua solo o akaiedi’ê phala ku tumina nê mu ixi tundé, ku diulu. (Daniiele 2:44; 7:27) O Utuminu ua Jezú ua-nda ku izalesa o ixi ni kuijiia kua Jihova ni ku bhangesa o ixi ku kala dingi palaízu kála ku dimatekenu dia mundu.—Tanga Izaia 11:3, 9; Matesu 19:28.

[Foto ku mbandu 11]

Phala kuijiia dingi, tanga o kibatulu 8 kia divulu didi, a di bhange ku Jimbangi ja Jihova. Mu Kidi Ihi i Longa o Bibidia?