Kana Kuehela Kima Ki Ku Sondolokesa Kua Jihova

1-3. (a) Mukonda diahi Josuué ua bhana phangu iambote ia ku sola ku muenhu? (b) Ihi i tua tokala ku xinganeka kioso ki tu dibhana ni maka a bhinga ku sola?

O KIZUELU “ku sola,” kiala ni kutena. O muthu u sola muéne uejiia ihi ia-nda sola, muéne uejiia ué o njila ia-nda kuambata ku muenhu uê. Mu kifika: Xinganeka muthu ua mu kuenda njila, mu njila mu moneka phambu jiiadi. Iebhi ia-nda sola? Se o muthu uejiia kuebhi kua-ndala kuia, ua-nda sola o njila íia katé bhu kididi kia mesena, se u sola o njila ia mukua, ia-nda mu ambata bhu kididi kiéngi.

² Mu Bibidia, tu sanga-mu phangu javulu ja athu a dibhana ué ni maka enhá. Mu kifika, Kaini ua tokalele ku sola se ueji kueha o njinda mba ku bhanga o ima ni njinda. (Dim. 4:6, 7) Josuué ua tokalele ku sola se u sidivila o Nzambi ia kidi mba u sidivila o jinzambi ja makutu. (Josu. 24:15) Josuué ua mesenene ngó ku kala kamba dia Jihova; mukonda dia kiki, muéne ua solo o njila ieji ku mu zukamesa kua Jihova. Kaini ka mesenene o ukamba iú, muéne ua solo njila iéngi, o njila íii ia mu sondolokesa kua Jihova.

³ Saí ithangana tu tena ku sanga ué jiphambu mu njila. Se kiki ki bhita n’eie, kana ku jimba o kididi ku ua mesena kuia—phala ku bhana kijingu kua Jihova mu ioso i u bhanga, ni ku lenga o ima ioso i tena ku ku sondolokesa kua Jihova. (Tanga Jihebeleu 3:12.) Mu milongi íii ni ia-nda kaiela, tua-nda di longa sambuadi dia maukexilu mu tua tokala ku di langa phala ki tu sondoloke kua Jihova.

IKALAKALU NI UFUNU

4. Mukonda diahi kima kiambote ku dikila o muiji?

⁴ O Jikidistá a a tumina ku dikila o miji iâ. O Bibidia izuela kuila, se muthu ka dikila o muiji uê, muthu iú ua ditunu o kixikanu, ió kiluua a xikana ndenge. (2 Tes. 3:10; 1 Tim. 5:8) Tuejiia kuila o ku kalakala kima kiambote, maji se ku di lange mu ku sola kiambote o kikalakalu, ki tena ku ku sondolokesa kua Jihova. O kuila ki tena ku bhita?

5. Ihi i tua tokala ku xinganeka kioso kia tu bhana salu?

⁵ Xinganeka kuila ua mu sota salu. Se ua tungu mu ixi mua bhonzo ku sanga salu, nange u xikina o salu i dianga ku moneka—kabasa salu ia ku bhana. Abha se o salu i ku fidisa ku belesela o itumu ia Bibidia? Se o kithangana ki u bhita ku salu, mba o kididi ku uia ki ku fidisa ku bhanga o ikalakalu ia tokala ku bhanga o Kidistá mba i ku bhangesa ku kala dikanga dia muiji uê? O kuila ueji xikina o salu íii mu ku xinganeka kuila kota nga kalakala mu veji dia ku kamba ku kalakala? Ejiia kuila o ku kamba ku sola kiambote, ki tena ku ku sondolokesa kua Jihova. (Jihe. 2:1) Né muene se ua mu sota salu, mba ua mu xinganeka ku sota salu iéngi, kiebhi ki u tena ku sola kiambote?

6, 7. (a) Nange, ihi i mesena o muthu kioso kia sota salu? (b) Ihi ia-nda ku kuatekesa ku zukama kua Jihova, ni mukonda diahi?

⁶ Kála ki tuevu ku dimatekenu, kana ku jimba o kididi ku ua mesena ku bhixila. Dibhudise: ‘Kuebhi ku nga mesena ku bhixila ni salu íii mba ni ufunu iú?’ Se u banza kuila, o salu phala ku ku kuatekesa—ni ku dikila o muiji uê, eie u tena ku sidivila Jihova—Jihova ua-nda besoala o nguzu ioso i ua mu bhanga. (Mat. 6:33) Jihova ka tena ku ku jimba se u kamba salu, mba ku bhita maka a ku kamba jimbongo. (Iza. 59:1) Muéne ‘uejiia ku bhulula abhezi’ê bhu kaxi ka ji polova.’—2 Phe. 2:9.

⁷ Abha se ua mesena ngó ku kala umvuama? Nange u di tunda kiambote. Né muene se u “di tunda kiambote,” ejiia kuila kia-nda ku bhinga kima—maji kua-nda tena ku ki futa. (Tanga 1 Timote 6:9, 10.) Ejiia ué kuila, o ku di suínisa kiavulu phala ku kala ni jimbongo, kia-nda ku sondolokesa kua Jihova.

8, 9. Ihi ia tokala kuijiia o jitata mu ukexilu uâ ia lungu ni salu? Jimbulula.

⁸ Se u tata mba u mama, xinganeka mu phangu i ua mu bhana ku an’ê. Ihi ia mona ene, ia beta-kota ku muenhu uê—o ufunu uê anga o ukamba uê ni Jihova? Se ene a mona kuila o jimbongo ni fuma iene i u dianga ku ta ku pholo, o kuila ene a tena ku ku kaiela mu njila íii ia iibha? O kuila ene keji ku xila dingi kala u tata? Saí kilumba Kidistá uambe: “O tat’ami ua thandanganha ngó ni salu iê. Mu dimatekenu, muéne ua kexile mu kalakala ngó mukonda ua mesenene ku dikila o muiji uetu. Muéne ua mesenene ué kuila, ki ku tu kambe kima. Maji mu izuua íii, ki kiene dingi. Muéne u kalakala kiavulu, u bheka ima ia katunda ku bhata, mu veji dia ku bheka ngó o ima i tua bhindamena. Mukonda dia kiki, muiji uetu uala ni kitadi kiavulu, maji ki muiji u suínisa akuetu mu nzumbi. Kia betele kota ku kala ni tata u bhana valolo mu ima ia nzumbi.”

⁹ Enu mu Jitata, ki mu ehele ku di sondolokesa kua Jihova, mu ku ta dingi ku pholo o ufunu uenu. Bhu kaxi ka phangu ienu, londekese-nu ku an’enu kuila o umvuama ua beta-kota mu nzumbi, mu xitu kana.—Mat. 5:3.

10. Ihi ia tokala ku xinganeka o munzangala kioso kia sota salu?

¹⁰ Se u munzangala ua mu sota salu, kiebhi ki u tena ku sola kiambote? Kála ki tua di longo kiá, ua tokala kuijiia ihi i ua mesena ku muenhu uê. O kuila o salu i ua mu sota ia-nda ku kuatekesa ku ta ku pholo o Utuminu ua Nzambi, anga ia-nda ku sondolokesa kua Jihova? (2 Tim. 4:10) O kuila ua mesena o salu íii phala ku sokela ni athu, a sanguluka kioso kia kala ni kitadi, maji a luuala kioso kia kamba o kitadi? Anga ua-nda londekesa ku muenhu uê o kidielelu kiexile na-kiu Davidi, kioso kia soneka: ‘Tunde mu undenge, katé ki nga kuka; nuka ngi mona mubhezi ua kidi a mu ehelela, mba muiji uê ku bhinga jimola.’ (Jisá. 37:25) Ejiia kuila saí njila, i tena ku ku sondolokesa kua Jihova, maji saí ia mukua, ia-nda ku kuatekesa ku kala ni muenhu uambote. (Tanga Jisabhu 10:22; Malakiia 3:10.) Njila iebhi i ua-nda sola?a

O ITONOKENU

11. Ihi i longa o Bibidia ia lungu ni itonokenu, maji ihi i tua tokala kuijiia?

¹¹ O Bibidia ki i fidisa o itonokenu, ki i longo kuila o ku tonoka ku zanga kithangana. Phaulu ua soneka: ‘O ku tungutisa o mukutu ku bheka mbote mu kithangana kiofele.’ (1 Tim. 4:8) O Bibidia izuela ué kuila, saí “thembu ia kuolela,” ni “thembu ia kutuka-tuka,” i suínisa ku kala ni kithangana kia ku nhoha. (Ndo. 3:4; 4:6) Se ku di lange, o itonokenu i tena ku ku sondolokesa kua Jihova. Kiebhi-phe? O iluezu tu i sanga mu maukexilu aiiadi—itonokenu iahi i u sola, ni thembu kuxi i u zanga mu itonokenu.

12. Ihi i ua tokala kuijiia kioso ki u sola o itonokenu?

¹² Kia dianga, xinganeka se itonokenu iahi. Ijiia kuila, u tena ku sanga itonokenu iambote. Se-ku phata kuila itonokenu iavulu ku mundu iú, i bhana kijingu ku ima ia zembe Nzambi, kála o usuéia, o uanga, ni maukexilu oso a ufusa. Mukonda dia kiki, ua tokala u sola kiambote o itonokenu i ua-nda bhanga mba i ua-nda tala. I ku longa ihi? O kuila i ku longa usuéia, ku mesena ku sokela ni akuenu, mba ku zangeleka o ixi mu ua tokala? (Jisa. 3:31) O kuila o ukexilu iú u zangesa o kitadi kiê? O kuila kieji bhangesa akuenu ku di bhala mu nzumbi? (Lom. 14:21) O kuila o itonokenu i u sola i ku kuatekesa ku kala ni makamba ambote? (Jisa. 13:20) O kuila i ku suínisa ku bhanga ima ia iibha?—Tiia. 1:14, 15.

13, 14. Ihi i ua tokala kuijiia ia lungu ni kithangana ki u bhita mu itonokenu?

¹³ Xinganeka ué o kithangana ki u zanga mu itonokenu. Dibhudise: ‘O kuila ngene mu zanga kithangana kiavulu mu i tonokenu, anga ngi kala ni kithangana kiofele phala ku bhanga o ikalakalu mu kilunga?’ Se u sola itonokenu iavulu, ua-nda mona kuila kua-nda kala ni kithangana kia ku nhoha. Oso a sola kiambote o itonokenu, a beta-kota mu ku sanguluka. Mukonda diahi? Mukonda a mona kuila a tena ku bhanga ‘o ima ia beta-kota,’ ni kuila a kala ué ni kithangana kia ku nhoha.—Tanga Filipe 1:10, 11.

¹⁴ Sumbala o ku bhita kithangana kiavulu mu i tonokenu nange ki moneka kála kima kiambote, maji o ku sola o njila íii, ku tena ku ku sondolokesa kua Jihova. Saí phange ia muhatu uala mu 20 a mivu a mu ixana Kim, u tu tangela ia bhiti na-iu. Muéne uambe: “Nga kexile múia mu jifesa ku sukilu dia semana ioso—kia Sesa, kia Sábhalu ni kia Lumingu. Maji lelu, ngejiia kuila saí ima ia beta-kota i nga tokala ku bhanga. Mu kifika, lelu eme ngi muboki ua thembu ioso, ngi balumuka mu 6:00 a kamene ngiia mu boka, kienhiki ki ngi tena ku kala mu fesa katé mu makolombolo. Ngejiia kuila o itonokenu ioso ki ia iibha, maji saí ithangana i tena ku tu landukisa kiavulu. Kála o ima ia mukua, o itonokenu a tokala ku i bhanga mu kithangana kiê.”

15. Kiebhi o jitata kia tena ku sanga itonokenu iambote, i sangulukisa o tuana?

¹⁵ O jitata a tokala ku dikila o muiji, ni ku u langa mu nzumbi, ni ima ioso ia tokala ku tuana. Kála o itonokenu. Se u tata, ku tokala ku fidisa o itonokenu ku muiji, mu ku xinganeka kuila o itonokenu ioso ia iibha. Maji ua tokala u langa o muiji uê ku ima ia iibha. (1 Kol. 5:6) Se u sota kiambote, ua-nda sanga itonokenu iambote phala o muiji uê.b Se u bhanga kiki, eie ni muiji uê mua-nda zukama dingi kua Jihova.

O UKAMBA KU MUIJI

16, 17. Maka ahi ene mu bhita nau o jitata, ni kiebhi ki tuejiia kuila Jihova uejiia o ndolo iâ?

¹⁶ O ukamba ua tata ni mona, kima kia uvualukilu. Mukonda dia kiki Jihova ua bhana o kifika kiki phala kulondekesa o henda iê ku mundu uê, kála o mama kia zolo mon’ê. (Iza. 49:15) Mukonda dia kiki, ki kima kia iibha ku luuala se muthu ku muiji u sondoloka kua Jihova. Kioso kia kaie mon’ê ua muhatu mu kilunga, saí phange ia muhatu uambe: “Nga luualele kiavulu. Eme nga dibhudisa, ‘mukonda diahi muéne ua xisa Jihova?’ Nga di tatela, nga mono kuila eme nga kexile ni kikuma.”

¹⁷ Se eie ua mu bhita mu maka enhá, Jihova uejiia kiebhi ki ua mu divua. Mukonda muéne ué, ‘kia mu bhekele dilamba ku muxima,’ kioso o an’ê a diangela, a mu bhukumukina. Muéne ua divu dingi kia iibha, kioso o athu ande dia Dilúvio, a mu bhukumukina mu ku kamba kuívua Noué. (Dim. 6:5, 6) Nange o athu ka bhiti luua ni maka enhá, kia a bhonza kuijiia kiebhi ki divua o athu enhá. Maji o jitata ka tokala kuehela kuila o ukexilu ua iibha ua mon’ê, a mu kaie mu kilunga, ua a bhangesa ku sondoloka kua Jihova. Kiebhi ki u tena ku dibhana ni dilamba, se muthu ku muiji uê u sondoloka kua Jihova?

18. Mukonda diahi o jitata ka tokala ku di tatela, se o mon’a u sondoloka kua Jihova?

¹⁸ Kana ku di tatela. Jihova ua bhana o ufôlo ku athu ua ku sola o kima kia mesena, ni kuila muthu uoso ku muiji, ua tokala “uambata o kimbamba kiê.” (Nga. 6:5) Jihova ka ku tatela eie—maji u bhinga ji konda ku muthu ua te o kituxi. (Ize. 18:20) Enu ué ki mu tokala ku tatela akuenu. Xile-nu o itumu ia Jihova ia ku bazela o ati a ituxi. Bhânge-nu ni Diabhu—kana ku tatela o tufunga ene mu bhanga ioso phala ku langa o kilunga.—1 Phe. 5:8, 9.

19, 20. (a) Ihi ia tokala ku bhanga o jitata ala ni an’a a a kaie mu kilunga, phala ku dibhana ni dilamba? (b) Kidielelu kiahi kiala nakiu o jitata jiji?

¹⁹ Maji se u kala ni njinda ia Jihova, ua-nda ku mu sondoloka. O mon’ê ua tokala kuijiia kuila eie ua solo ku ta Jihova ku pholo—o ukamba ni muiji ndenge. Phala ku dibhana ni maka enhá, ua tokala u di langa mu nzumbi. Kana ku di sondoloka ku jiphange mu kilunga. (Jisa. 18:1) Tangela Jihova mu musambu, kiebhi ki ua mu divua. (Jisá. 62:7, 8) Kana ku sota ndunge phala ku xibhakela o kitumu kia Jihova mu ku dibhana ni muthu a mu kaie mu kilunga. Kana ku kala nê kumoxi, mba u sota ndunge mukonda ndandu, kana ué ku mu tumikisa njimbu. (1 Kol. 5:11) Di bhakule mu ikalakalu mu kilunga. (1 Kol. 15:58) O phange tua mu tange kiá uambe: “Ngejiia kuila nga tokala ku di bhakula mu sidivisu ia Jihova, ni ku kolesa o kixikanu kiami, phala kioso ki vutuka mon’ami kua Jihova, eme ngi tene ku mu kuatekesa.”

²⁰ O Bibidia i longa kuila, o henda “i xididika mu ima ioso.” (1 Kol. 13:4, 7) Ki kima kia iibha ku dielela kuila, o mon’ê u vutuka kua Jihova. Mivu joso athu avulu a sondolokele kua Jihova ene mu vutuka mu kilunga kiê. Jihova ka a sondolola. Maji muéne “u lenguluka kuloloka.”—Jisá. 86:5.

SOLA KIAMBOTE

21, 22. Ihi i ua solo ku bhanga ni ufôlo uê?

²¹ Jihova ua bhana ku an’ê o ufôlo ua ku sola o ima ia mesena. (Tanga Matendelelu 30:19, 20.) Maji a tokala ku sola kiambote ni ufolo ua tambula. O Kidistá ua tokala ku dibhudisa: ‘Njila iebhi mu ngala? O kuila ngi ehela kuila o salu, ufunu, itonokenu mba o ukamba ku muiji i ngi sondolokesa kua Jihova?’

²² O henda ia Jihova ku mundu uê, ki iene ni mbambe. Tu tena ku sondoloka ngó kua Jihova se tu sola njila ia iibha. (Lom. 8:38, 39) Maji ki tu tokala ku sondoloka kua Jihova! Sola ku kolokota mu ukamba ni Jihova, kana kuehela kima kioso-kioso ki ku sondolokesa kua Jihova. Mu milongi ia kaiela, tua-nda di longa dingi maukexilu a uana mu u tena ku sola phala ku kolokota mu ku kala mu ukamba ni Jihova.