Mozé—Diiala Dia Kixikanu

O KIXIKANU IHI?

Kála ki zuela o Bibidia, “kixikanu” kilombolola ku xikina mu ima kiluua i moneka. O muthu uala ni kixikanu kua Nzambi, u dielela kuila muéne ua-nda kumbidila o ikanenu iê ioso.

KIEBHI MOZÉ KIA LONDEKESA O KIXIKANU?

Mozé ua londekesa kuila ua dielele ku ikanenu ia Nzambi. (Dimatekenu 22:15-18) Mozé ueji kala mvuama mu Ijitu, maji ‘ua solo-bho o ku tala hadi ni mundu ua Nzambi, mu veji dia ku tambula mbote ijila mu ituxi, ji bhanga ngó kithangana.’ (Jihebeleu 11:25) O kuila muéne ua solo sé ku xinganeka, iu ueji diela ku pholo? Kana, mukonda o Bibidia i zuela ia lungu ni Mozé kuila, muéne “u kolokota ni ufiiele kala uala ku mona Nzambi, ió ka moneka ku mesu.” (Jihebeleu 11:27) Mozé ka diela ku ima ioso ia solo, mukonda dia kixikanu kiê.

Mozé ua suínisine o kixikanu kia akuâ. Xinganeka ihi ia bhitile kioso akua Izalaiele kia mono o masoladi a Ijitu ku dima diâ, o ku pholo diâ kuexile o Kalunga ka Kusuka. Ni uôma uavulu, o mundu ua Izalaiele ua di kolele kua Jihova ni kua Mozé. Ihi ia bhangele Mozé?

Mozé kejidile kuila Nzambi ueji jikula o Kalunga ka Kusuka phala o mundu ku bhita. Maji Mozé ua kijidile kuila Jihova ueji bhanga kima phala ku bhulula o mundu Uê. Mozé ua mesenene kuila, o mundu u kala ni kixikanu kua Nzambi kala kia kexile na-kiu muéne. O Bibidia i zuela: “Mozé anga uambela o mundu, uixi: Ki mu kale ni uôma; ximbakatenu nda mu mone o Ubhuluilu ua Jihova, ua-nda ku mi bhanga lelu.” (Makatukilu 14:13) O kuila Mozé ua tena ku suínisa o kixikanu kia akua Izalaiele? Ua tenene, mukonda o Bibidia i zuela ia bhitile ni Mozé ni akua Izalaiele: ‘Kiejila mu kixikanu, an’a Izalaiele a zaúka o Musanza ua kalunga ka kusuka mu mavu a kukuta.’ (Jihebeleu 11:29) O kixikanu ki ki bhuluile ngó Mozé, maji ni mundu uoso.

PHANGU IAHI I TU KATULA KUA MUÉNE?

Kala Mozé tu tena kulondekesa kuila tua dielela ku ikanenu ia Nzambi. Mu kifika, Nzambi u tu kanena ku dikila o ibhindamu ietu, se tu dianga ku ta ku pholo o ubhezelu uetu kua muéne. (Matesu 6:33) Mu kidi, ku bhonza ku kolokota ku ta ku pholo o ubhezelu ua Nzambi, mukonda o athu ku mundu, ene mu lalama dingi ni ima ia mundu. Maji kioso ki tu kamba ku sota o ima ia mundu, phala ku ta ku pholo o ubhezelu ua Nzambi, Jihova u dikila o ibhindamu ietu ioso. Muéne u tu kanena: “Eme nuka nga kà mi xisa, ki nga kà mi ehelela ue, kana.”—Jihebeleu 13:5.

Etu ué tuene mu bhanga ioso phala ku suínisa o kixikanu kia akuetu. Mu kifika, o jitata ja unjimu, a kuatekesa o tuana tuâ ku kala ni kixikanu kua Nzambi. Kioso kiaia ni ku kula, o tuana a bhingi kuijiia kuila kuene Nzambi ni kuila muéne u tu longa kioso kia uabha ni kia iibha. Ene a tokala kuijiia kuila o ku belesela Nzambi, o kima kia tokala ku muenhu. (Izaia 48:17, 18) O ujitu ua dikota u tena o ku bhana o jitata ku tuana tuâ, o ku a kuatekesa kuijiia kuila “sai-ku Nzambi, kuma muène mukua kubhandulula oso a mu sota ni muanu.”—Jihebeleu 11:6.