IBHUIDISU IA BIBIDIA IO TAMBUIJILE

Mukonda diahi Jezú a mu ixana Mon’a Nzambi?

Nzambi kala ni muhatu mu xitu phala ku mu vualela mona. Muéne o Mubhangi ua ima ioso iala ni muenhu. O athu a a bhange ni kutena kua kulondekesa o ídifua ia Nzambi. Kiki kia bhangesa kuila o muthu a diangele o ku mu bhanga kua Nzambi, Adá, a mu ixanene “mon’a Nzambi.” Kiene kimoxi ué, Jezú a mu ixana, “Mon’a Nzambi” mukonda a mu bhange ni ídifua ia Tat’ê.—Tanga Luka 3:38; Nzuá 1:14, 49.

Jezú a mu bhange thembu iebhi?

Nzambi ua bhange Jezú ande dia ku bhanga Adá. Mu kidi, Nzambi ua bhange o ima ia mukuá mua muéne, kate muene ni ji-anju. Mukonda dia kiki, o Bibidia ixana Jezú kuila, muéne “o thungunu, uala ku thandu dia ima ioso” io bhange kua Nzambi.—Tanga Kolose 1:15, 16.

Ande dia ku mu vuala mu Beleme, Jezú ua kexile ku diulu kumoxi ni Nzambi. Mu thembu ia tokala, Nzambi ua tula o muenhu ua Jezú mu divumu dia Madiia, phala ku mu vuala kala muthu mu xitu.—Tanga Luka 1:30-32; Nzuá 6:38; 8:23.

Mukonda diahi Nzambi ua tumikisa mon’ê mu ixi phala ku mu vuala kala muthu mu xitu? Kikalakalu kiahi kia dikota kieji bhanga Jezú? U tena ku sanga o itambuijilu ia ibhuidisu íii mu Bibidia, ia-nda ku kuatekesa ku tendela dingi kiambote ihi iene mu bhanga Nzambi ni Jezú phala eie.