IBHUIDISU IA BIBIDIA IO TAMBUIJILE
Mukonda diahi o athu ka tena ku bheka paze ku mundu?
O unguvulu u tena ku lungulula o mixima ia athu, uene ngó u tena ku bheka paze mu ngongo
O Bibidia i zuela se mukonda diahi. Kia dianga, Sumbala ni nguzu ia bhanga, o athu ka a bhange ni kutena kua kuendesa o makanda mâ. Kaiiadi, o athu ene mu lueza mu ima ia bhanga mukonda “o mundu uoso-phe ua zeka mua Kadiaphemba,” Satanaji o Diabhu. Mu kiki, o athu kene mu tena ku bheka paze mu ngongo.—Tanga Jelemiia 10:23; 1 Nzuá 5:19.
O luímbi lua athu ni unguma, iene ué mu fidisa o athu ku bheka paze ku mundu uoso. O unguvulu u tena ku tumina o mundu uoso ni ku longa o athu o ku zola o ima ia tokala ni ku di kuatekesa mudiâ, uene ngó u tena ku bheka o paze mu ngongo ioso.—Tanga Izaia 32:17; 48:18, 22.
Nanhi ua-nda bheka o paze mu ixi?
O Nzambi Muteni-ia-Ioso ua kanena ku bheka unguvulu umoxi ua-nda tumina o ixi ioso. Ua-nda bhingana o jinguvulu ja athu. (Daniiele 2:44) O Mon’a Nzambi, Jezú, ua-nda tumina kala Kilamba kia Paze. Muéne ua-nda zubha o kuiibha kuoso mu ixi, iu ua-nda longa o athu o njila ia paze.—Tanga Izaia 9:6, 7; 11:4, 9.
Bhu kaxi ka Jezú, midi ni jimidi ja athu ku mundu uoso ene mu di longa o Mak’â Nzambi, o Bibidia, ni ku longa o athu kiebhi kia dibhana ni paze ni akuâ. Kua kambe ngó bhofele, kua-nda kala paze ku mundu uoso.—Tanga Izaia 2:3, 4; 54:13.